.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

30.9.07

من تأمن له


من تقدر تأمن له


في زمن صار الوصل فيه صعب
والغدر يطوي في بطنه كل صفات
والمشاعر يغلفها الزيف
والقرب غاية للطعن
و الحب ينشرى وينباع
والحبيب ماهو حبيب
والصديق يحملك الجميل
ينتظر يوم اللي يندفع فيه الثمن
والكذب ينولد مع كل ذكر وأذان
وصارت الأمور كلها مختلطه ببعض
وصار الغلط له الف اسم ومليون عذر وكذا لون
صارت الأقنعه هوايه نلبسها ونغيرها مع ملابسنا
وصار الوضوح عمله مالها وجود
و الصراحه تنذكر باسم الرياء والنفاق
وصار النفاق هو سمة كل العلاقات
من تأمن له اذا كنت تحس انك من زمن ثاني
وعالم آخر و البساطه فيك عيب
وانك تكون انت ضعف
من تأمن له لين صرت بليا سلاح
بلا سند
والذيابه محاوطتك بكل اتجاه
تنهش بلحمك وتلذذ
من تأمن له لين تلونوا البشر
وصاروا مو بشر
والطفل اللي ربي بحضنك
كبر ورفع عليك السلاح
والحق يندفن بليا جفن
من تأمن له
اذا صارت الضحكه مجرد صوت يكمل باجي الحديث
ودليل على هزيمتك ونصر غريمك
والحروب حواليك تدور
والدم صار طعمه مستساغ
والأبتسامه عشان تشوف الأنياب المسنونه عليك
من تأمن له اذا كنت محصور بحالتين يا غارم يا مغروم
يا ظالم يا مظلوم
والمشاعر عملة رخيصه رخيصه بين ايادي المتسلقين
من تأمن له اذا كان نورك يعمى عين عدوك
ويشعل الغيره بين حناياه
ينتظر لحظة يلومك بكلمة شينه
يخنق حروفك بيدينه
من تأمن له اذا اكتشفت ان السواد داخل اقرب الناس
واقرب الناس هم ظلمتك
هم غربتك
هم كل صرخه وكل آه
وشكوتك لحن ينطرب له من تصيد لك الهفوات
وعد عليك الزلات
وحفر لك الف حفرة وحفره
ينتظر طيحتك .. انكسارك
ويا ويلك لين طحت وانكسرت
يا ويلك
من تأمن له لين صارت دمعتك قريبه
تكشفك وتعلن صفاءك
وتنرجم بألف حصوة وحجرلأنك ضعيف
كتلة مشاعر
ما تبي شي
غير الحنان غير الأمان
وأي أمان هذا اللي تنباع فيه الأوطان
بحفنة مصالح مالها صالح
من تأمن له لين رفضت الكبر
ولبست التواضع
ونسوا انك آدمى معجون بالكبرياء
من تأمن له
لين استباحوك
وللناس قصوك وقالوك ولاكوا سمعتك مثل السر المباح
من تأمن له
لين صار ليلك فجره بعيد
والشمس تيي وتروح
وعلى ارضك ما تلوح
وين الوطن وين السكن
اذا كان حتى القمر يغير اوطانه بليا ثمن
واذا كان السكن ما يعنى الا حفنة تراب
ينشرى وينبنى ويرد ينباع
من تأمن له اذا كانت غربتك داخلك
والحزن ياكلك بكل لحظة تحاول تبتدي فيها من جديد
تبتعد عن كل اللي متعبك
تقطه ورا ظهرك
وتحاول تكون آدمي
بين ناس نسوا معنى الآدمية
من تأمن له لين تعب قلبك
وجربت تستريح
تدور على واحة فيها تروي العطش تنسى اللى راح
تلقى واحتك اصلا سراب
وقصر انت بنيته بخيالك ماله ابواب
تلعب الأشباح فيه
وتاكل جدرانه عصوف الرياح
من تامن له
يا دنيتى يا واحتى تاهت منى الأسباب
من تأمن له
غير رب كريم
وتصرخ باعلى صوتك
الله كريم
الله كريم

هناك 29 تعليقًا:

بنت الشاميه يقول...

احسن شيئ التوكل على الله وترك كل الهموم عليه.....لانه صاحب الكرم والجود

سبحانه وتعالى

esTeKaNa يقول...

كلمة تامن له لها عمق
وصدى في الروح
كلمه تامن له غير ترتاح له
غير تحبه
غير كل الاحساس
الامن احساس نادر في هالزمن
مثل ما تفضلتي بهالبوست،بس يبقى احساس موجود يا الزين وان ندر
تفائلي
وشوفي الجاونب المشرقه
قد اكون ما زلت في برج عاجي
وبيت زجاجي
او وردي
او ما زلت من زمان بعيد وعايشه باحلامي
عشان جذي ألمنى هذا البوست اكثر من ما تتصورين
!!
الله يشرح صدرج ويرزقج بدل القلب قلوب تامنين لها

`~MnO YeNSa! ~` يقول...

اللــــــــه كريــــم و الله اكبر من كل شىء .. و بلوقج من البلوقات اللي ما احب اطوف مواضيعها ابد .. اقدمي يا الزيـــــن ;)

Kuw_Son يقول...

هيييييييييه .. الله كريم !!

Shaima'a Alkandari يقول...

وصار الغلط له الف اسم ومليون عذر وكذا لون

صارت الأقنعه هوايه نلبسها ونغيرها مع ملابسنا

وصار الوضوح عمله مالها وجود


اي بكل حرف صدقتي ياوخيتي

منو نأمن له

اهو واحد موجود بكل وقت للانسان رب العباد الامين العين الساهره لكل البشر

Barrak يقول...

من تقدر تأمن له


اه منك عنوان

ray يقول...

الزين

موضوعج يا بوقته

وين الوضوح هالأيام ؟

و ليش لين قلت الصج و صرنا صريحين قالوا يبون أضواء و شهرة

عَذبة يقول...

افعلي مايريحك ولاتنتظري شئ من الآخرين


كلما قلّت توقعاتك كلما قلّت الجروح
.
.
.
حين نتولي قيادة انفسنا
نصبح محصنين
لااحد لديه القدرة على اختراق مبادئنا
ولا مشاعرنا
.
موضوع ثري
ولي عودة
.

.
دمتِ بسعادة

magnoonah يقول...

كوني انت انت لا تغيرين وامني نفسج بنفسج بعدين عطي المجال لغيرج



انت صح لا تخيلين شي ما يسوى ياثر عليج محد يستاهل الا الي يقدر الثمن


اتمنى انج فاهمتني

غير معرف يقول...

تنـهيــــــدة

من القلب .. و الله المستعان

/

يا ضايق الصدر بالله وسّـع الخاطر
دنياك يا زين ما تستاهل الضيقة

/

فريج سعود يقول...

الله ليش كل هذا شصاير تفائلي وانا اخوج تفائلي
وعندي طلب اذا امكن ؟
ممكن تغيرين الصورة بس لي اخر الشهر
وسامحيني على التطفل

1001 Nights يقول...

معظم الناس مو سيئين لها لدرجة و حتى لما يكونون جذاذبة و منافقين فاهم مو منافقين طول الوقت ولا كل حجوة تطلع منهم فيها كذب.... أنا في رأيي معظم الناس لا طيبين وايد ولا سيئين وايد بس كلهم خطاءين
كل ما الإنسان كبر كل ما تعلم عن الأشياء اللي مو زينة اللي قاعدة تصير دار ماداره و هو كان غافل عنها,
بس أحلى شي إن بنفس الوقت مع الكبر و النضوج الواحد يصير يعرف يتعامل مع المواقف السيئة بطريقة أحسن و أشجع... التفاؤل يبيله شجاعة حقيقية

Darling don’t allow yourself to see the world through dark sunglasses, no one will suffer from that except for you. You are right Allah Kareem. Inshalla Alla yhawin 3alaich oo yab3id 3anich il kidar.

sologa-bologa يقول...

يالله السلامة السلامة

تلقائية واسلوب خفيف
ومافيه تصنع
اقدر اعتبره قصيدة نثر باللهجة المحلية
لان وانا اقرا احس بين الكلام
في اوزان وان كان بدون قافية

بس ناقصها شوية تضبط علشان تكون قصيدة نثرية محبوكة

رغم مرارتها لكنها تبقى جميلة

ودمتم بحب وود

Najmah يقول...

مالكـ غير الله

صعب نلقى بهالدنيا اللي يفهمنا ويشيل احساسنا

صج الله كريم

اشوف مشاعري بكلامج

ربي يسعد قلبج

الزين يقول...

بنت الشامية

ونعم بالله ما يحمل همومك معك الا هو سبحانه

:*

الزين يقول...

ونعم بالله سبحانه

من يحمل همومك معك غيره

مشكوره وايد

الزين يقول...

استكانه

من طول الغيبات

بالفعل كلمة تأن منه تحمل معاني ومشاعر كثيره تتعدى حدود الكلمة نفسها


التقائل موجود

:)

وعمرها الشمس ما تطول الغيبات يا استكانه

وكل ليل له آخر

ودام الله موجود

كل شي له حل

ولولا المر يا استكانه ما عرفنا طعم الحلاة ولا حبيناه

دعوتج حلوة

مشكوووووووووووره وايد وايد

القولب اللي اامنها وايد

ميلج وشرواج

الزين يقول...

منو يسأل

حبيبى

وجودج دائما احد الفوانيس التى استنير بها

مشكوره

الزين يقول...

ولد الكويت

الله المستعان

:)

الأييييييييه طالعه من اقصى قلبك

الزين يقول...

شيماء

اثنى على كلامج مليون مره

مشكوره

الزين يقول...

براك

وآه منك يا أمان

دائما المختصر المفيد

يا زين وجودك

الزين يقول...

ray

عشان هذا زمن طقى فيه الزيف على المصداقيه

:)

تصدقين ذكرتنى كلمة بمصداقية بوحده اتهمتنى بعدم المصداقية

ساعات الواحد ما يملك الا انه يراقب ويبتسم ويترك الوضع على ما هو عليه
لأن تغييره مستحيل

ويكمل

القوة فى انه يكمل

وكافي عليه انه يكون صادق مع نفسه

خليهم يقولون اللي يقولونه

:*

الزين يقول...

عذبه

حين نتولي قيادة انفسنا
نصبح محصنين
لااحد لديه القدرة على اختراق مبادئنا
ولا مشاعرنا

اثريتى ما كتبته بمجرد تعليق بسيط يحوى الكثير من المعانى والهموم

وحشتينى

وحشتينى

الزين يقول...

مجنونة

:*

ايه فاهمة ابله

يا بعدهم والله

الزين يقول...

النحيس

يا ضايق الصدر بالله وسّـع الخاطر
دنياك يا زين ما تستاهل الضيقة


:)

الزين يقول...

فريج سعود

طلبك على عينى يا خوي

وغيرناه على شان خاطرك

بس بعد رمضان راجعين له ترى

مشكور يا خوي على تواجدك

:)

الزين يقول...

1001 nights

انا ضد التعميم

واثنى على كلامج

يمكن انا طلعت كل عيوب وقتنا هذا وحطيتها تحت المجهر

عشان جذيه الكل الويم بمدونتى يتساءل شصاير

والله مو صاير شي

بس افكار خطرت على بالي نتيجة موقف معين

خلتنى اذكر كل المساوئ بلحظة أسى

وانتهى هالإحساس مع اخر حرف بالبوست

يعنى تقدرين تسمينها فضفضة

:*

الزين يقول...

سلوقا بلوقا

انت وين تغط وترد تطلع

شوف انا بغيت اسويها قصيده

بس ضاع القصد منى

واختل التوازن

وانا ما احب الشي اللي لازم افكر فيه وايد

خصوصا تالي الليل

مثل ما سمعتها براسي

مثل ما كتبها

من غير تعديل

من غير ميزان

من غير قافيه

هذى افكاري بتلك الساعه وبس

ولا تطول علينا

ترى نفقدك

الزين يقول...

نجمه

وربي يسعدج دنيا وآخره

:*