.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

4.6.07




كل منا يبحث عن الحب لغاية في نفسه ، بشكل او بآخر ، لسبب أو لآخر.. لملأ الفراغ .. لإشباع فضول أو غريزة .. أو للحب نفسه...

جاءت محدثتي مشرقة نضرة تملأها الحيوية تحكي لي قصتها بعد أن تساءلت عن سبب تألقها المستمر...

ابتسمت وقالت .. "إنتي من صجج يا بختى " اخرجت المراية لتتمعن بملامحها "ايه والله صايره شحلوني" طلاعتها وانا مستغربة " ليش انتي محد قال لج هالحجي من قبل .. فلان ما يقولج انج حلوة وتشوقين
جاوبتني بابتسامة مهزوزة " تدرين إني اقص شعرى وما تفرق وياه إلا لما أسئله شرايك يطالعني وكأنه يدور على الأخطاء السبعة وبعدين يقول ايه زين!!!!!
تصدقين حتى لما اتعطر بعطر يديد يلتفت ويقول شنو هالريحه مغيرين صابون الملابس"!!!!
ابتسمت لها وقلت " لا عاد مو ليه هالدرجة"
ردت على وقالت " حبيبتي الريال عقب فترة من الزواج بتعود على شكلج وريحتج وسوالفج ويصير لا يشوف ولا يشم ولا يسمع ولا يحجي بعد ... اصلا الحوار بينا صار كلمات متقاطعة"
هنيه انا سكت وطالعتها باستغراب " عيل وين راح الحب ومكالمات تالي الليل قبل الزواج .. واللهفة على شوفتج والتغزل بقوامج وجمالج وحلا صوتج"
ردت على وكلها ستسلام للواقع " طار بالهوى شاشي حبيبتي .. ذاك اول قبل العيال وقرض البيت وقسط السيارة ومسئوليات الحياة"
قلت لها " شنو يعني ماكو حب

anymore ؟؟؟"
سرحت شوية وطالعتني بنظرة ما فهمتها كلها حسرة ويمكن احتياج نظرة فيها فراغ فيا شي ناقص وقالت " بلا في حب بس بشكل ثاني .. حب عشرة .. حب تعود .. مادري .. بس مو ذاك الحب اللي خبرج"
هنيه انا تساءلت " سوري على السؤال بس انتي تقصدين ان مافي حميمية بينكم .. ماكو شغف ماكو دفء لقاء الحبيب بحبيبته؟؟؟؟!!!!"
ردت وقالت" هممم .... حميمية فيه بس صارت روتين وساعات وايد روتين ممل . شغف!!! حبيبتي الشغف ايي من الحرمان .. وانتي بين ايديه وتحت عيونه على طول من وين بيي الشغف ؟؟؟ اما بالنسبة للدفء فهو موجود .. بس مادري شلون اوصفة لج.. اهو دفء الراحة .ز دفء الإستقرار ودفء احساسج بالأمان"
رديت عليها وقلت " أي امان ؟ .. ليش الرياييل الحين لهم أمان؟؟ أنا بس اسمع عن قصص خيانات عجيبة غريبة وعلاقات زوجية أغرب ، وصارت الزوجة للبيت والعيال وواجهة اجتماعية وحلت مكانها العشيقة للوناسه والسفر والسهر "
رفعت راسها وقال لي " لا حبيبتي .. الريال اللي يخاف الله ما يهزه الحرام"
رديت عليها وقلت لها" أي حرام مو لازم حرام ليش انتي ما سمعتي بالمسيار وربعه؟؟"
قالت " بلا بس فلان ماله بهالسوالف"
قلت لها" يالهبلة ماكو ريال ماله بهالسوالف .. انتي تدرين زوجج لين كان بره شيسوي .. وين يروح .. من يكون معاه؟؟؟؟؟"
انا خلصت جملتي ولقيت ويه البنت انصفق وقالت " صج اهو وايد يغيب بره البيت ولين سألته يقول مع الربع .. بالديوانية .. يعني تعرفين بعد سوالف رياييل الكويت"

تمت البنت صافنة وتفكر وانا احاول اغير الموضوع .. افرفش الجو .. ماكو فايدة
انا بعد ملقوفة شللي خلاني ابطل حلجي وافتح بيبان مسكرة .. البنت راضية ومرتاحة انا شكو؟؟

فزت فجأة وقالت " بروح اتصل فيه .. اشوفه وينه"

شوف البلادة " تعالي ما قلتي لي شنو السر؟"
ردت علي وعيونها مغورقة دموع " اوباجي .. كريمات اوباجي" وطلعت

الله يانا ساعات اصير بدون احساس وغبية بعد....

بس تدرون انا اعتقد هذا حال كل الحريم لا العزابية مرتاحة ولا المتزوجة مرتاحه
وإلا جان فوزية دريع مالقت لها سوق عندنا بالكويت.





هناك 26 تعليقًا:

نون النساء يقول...

حبيبتي الريال عقب فترة من الزواج بتعود على شكلج وريحتج وسوالفج ويصير لا يشوف ولا يشم ولا يسمع ولا يحجي بعد ..




:"""(
صج ؟؟؟

لأنها بتكون مصيبة



مادري ليش
عورني قلبي عليها
خاصة لما أخر شي


أوباجي

:"""""""""(

نون النساء يقول...

امس كنت اقرا ببلوغج



تذكرين .....
يوم قلتي انج انتي بترحلين
وان بعدج بتتركين قصص صغيرة



انتي كاتبتها؟؟
واايد وايد حلوة
مادري ليش طرت على بالي ماجدة الرومي
بأغنيتها طوق الباسمين

يمكن علشان القافية
:P

it's a nice blog..

ZoZOta يقول...

عزيزتي نون النسوة
غمرتني السعادة لما شفت تعليقك الأول
ولما شفت تعليقك الثاني ما اقدر اوصف لج شنو حسيت
وجودج في مدونتي انتي بالذات اطراء لي

بالنسبة لتذكرين
سؤالج شوي ضيق خلق
هذي القصيدة كتبتها وانا كلي احساس بالألم لفقد صديقة واخت وحبيبة
كتبت اللي انا حاسة فيه وبس
وصدقيني ترى كل بيت سطرته كان صحيح وحصل معاي وقصة من قصصى الصغيرة انا وياها
وذا قريتي اللي قبلها عندما رحلت الغالية
راح تشوفين ان الإحساس واحد والألم واحد والإسلوب والأحداث وحدة
الله لا يضوقج ولا يراويج
ويصبرني ويمسح على قلبي

اما بالنسبة للريال بعد فترة
انا سمعت هالحجي من متزوجات وايد
عقب عمر طويل وكوكش يهال يتعود عليج قلبا وقالبا
بس اكيد في استثناءات
واستثناءات جميلة
ولا تنسين ان احنا بيدنا نوع الحياة اللي نعيشها
بيدنا نقرر نعيش حالة حب دائمة
بيدنا نقرر نكون سعداء او تعساء

والمسكينة هذي حتى انا عورني قلبي عليها
وكان ودي انصحها
بس شقول؟؟
الله يساعدها ويلهمها الحل حق مشكلتها

ReLaaaX يقول...

وييي واقردناااااااااا




--




بس هم الواحد مايفقد الأمل !؟




اوكي غيرت من شكلها .. هل كانت على طول تغير من شكلها ؟ والا توها هابة بهالحركه :)



لأن صعب تغيرين شي ماكنتي متعوده تسوينه .. وقيسي هالشي عليه




+



لازم يكون فيه مصارحه بينهم .. ليش ساكته؟ وليمتى بتظل ساكته على هالموت البطيئ !؟





ولازم تنتهز الفرصه المناسبة يعني مو بوقت الهواش مثلا والا وقت اللي يكون المود مش ولا بد تتحجى فيه .. يعني اهيا ادرى بريلها مننا






--



ولاتنسى الدعااااااااااء ان ربي يسخره لها


ويتعدل ويتسنع ويصير خوش ادمي ==> اشتطيت


--





انزين السؤال الياي قوليلها شكثر استمرت على كريمات اوباجي :))))))




المشكله ياوخيتي عقب مانوقف هالكريمات !!!؟




لأن المكان حددددده تجاري أكثر من اهوا علاجي هذا اللي مخرعني منهم

MANAF يقول...

تصدقين اني اكثر انسانه احب اسولف معاها زوجتي


وساعات تكون المسكينه فاصله تبي تنام

اقوم افصل عليها واسولف

:)

واحب دعائها

واول ما احس بضيقه احب اشوف ويهها

احس براحه

واهي دايما تاخذ رايي باي شي بتسويه

بتغير لون شعرها او بتقصه

بهدوم الطلعه

....

استغرب من كلامكم عن رياييلكم

لا واغلب ربعي مثلي


....


اختارو رياييلكم عدل وانتو بتحسون بالفرق

لا تدورون الغني وولد فلان وفلنتان

واختارو اللي تعيشون معاه بأمان وحب

Mishari يقول...

مو منطق الصراحة وظلم

لى الحين الحب موجود و الحياة الطيبة موجودة
بس اليوم كنت اتكلم مع واحد

يعنى شنو ذنب واحد اجتماعى ويضحك ويسولف ان يتزوج وحدة نكدية وكله بوزها شبرين؟
ليش يتحمل
هم الريال يبى وحدة تضحك وتتكلم وتناقش ويحس ان فى حياة بالبيت

يعنى الواحد مو يقول ان مثالى ولكن اللى يخاف الله فى مرته الله يوفقه بكل شى

يعنى الزواج كمفهوم مو نفس قبل حلاة العلاقة الزوجية الحين علاقة ربع والواحد يحس ان متزوج رفيتجته مو بس ام عيال
المسألة مو مسألة تفريخ

lawyer يقول...

زوزووووووووووووتا
حرام عليييييييييج

ليش اتخلينها اتشك بريلها

ترا والله في وايد رياييل ايواد

و ريايييل طيبه

ترا المرا تعرف و تحس بريلها اكثر من اي احد

و يمكن ريلها من الريايل الي خايفين ربهم فعلا

و في منهم وايد

و اذا على قولتج
بيت و مسؤليه يمكن يكون ريال طموح كل تفكيره بيته

و شغله

مو لازم مرا ثانيه

و لا لازم مسياااااااااااااار


الله يخليلها ريلها

و يسعدها

ZoZOta يقول...

ريلاكس
======
اسم الله عليج من القراده
حطي في بالج ان مو كل الرياييل ريلها ومو كل الحريم اهي
بس المره الذكية ما تاخذ حب زوجها من المسلمات
لازم تسعى له وتحاول تجدده على طول بتغيير شكل بسفرة على السريع
بعشوة حلوة تكسر فيها روتين الإسبوع او حتى الشهر
بحوار ذكي يشد انتباهه مو بس حق شكلها حق عقلها بعد
الريال في البداية يشده الشكر والأنوثة والغنج
بس بعدين يدور على الحوار والمنطق والفكر
يعني لازم تشتغل على روحها\
ما تكون الزوجة وام العيال بس
لازم تكون الحبيبة والعشيقة والأخت والصاحب والعقل والقلب

حزتها اهو ما يبي يفارجها صدقيني
واكو تجارب وايد حولي تثبت كلامي

اما بالنسبة عن كريمات اوباجي يا حلوة فأسألها وارد لج :)

ZoZOta يقول...

مناف
=====
مثل مافيه الزين
فيه الشين
والزواج قسمة ونصيب
وصدقنى ساعت الحظ ما يفلح ورياييل وايد لابسين اقنعة
ينكشف ويهم بعد الزواج
والكلام المعسول يصير مر
بس في استثناءات
واعتقد انك واحد منهم :)
انا ما امدح
بس عندي صاحبتي الله يهنيها
زوجها ما يتخير عنك
عقب 17 سنه زواج لازال الحب والرومانسة موجوده
اهو صديقها حبيبها زوجها
شنوالسيكرت
اقولك بعدين بعد ما استجوبها :)

ZoZOta يقول...

Mishari
=========
شوف يا مشاري
ايد وحدة ما تصفق
الأثنين منهم لازم يبذلون جهد عشان مركبهم يمشي
اهي تشتغل على حالها واهو بعد
واهم شي الحوار
يقول لها شنو اللي مو عاجبة
واهي تصارحه باللي مضايقها
لكن كل واحد يضرب بوز لأن الثاني مو عاجبة بدون ما يتكلم
ما اعتقد الأمور بتمشي

سعيدة بوجودك يا مشاري

ZoZOta يقول...

lawyer
========
:(
والله ما قصدت
بس ساعات الوحده لسانها يسبق تفكيرها
شنسوي حريم
وانا من النوع اللي وايد صريحه
وهذا عيبي
عقب ما اقول الكلمة اتحسف من قلب
بس صدقيني انا اخذت وعد على نفسي
بحاول اساعدها
بشوف شنو اقدر اسوي
البنت هذي امرها يهمني وماني تاركتها لين احل لها مشكلتها
حتى لو نروح حق فوزية دريع :)

sharazad يقول...

حديثك اضحكني وابكاني ولكني لا انكر انه اثار شجوني كان مختبئة هنا في كل الغرف السرية

جميلة احاديثك الانثوية الصادقة

شهرزاد

كادي يقول...

هلا زوزوتا
كلامج صحيح من واقع الحياة إلي نعيشها
الواحد ما وده يشمل كل الرياييل بس هذا الحاصل كل شي صار سهل حتى خراب لبيوت
وأنا أستغرب من الرياييل إلي عندهم حريم مثل الورد يدورون حسب مفهومهم وناسة بمكان ثاني مع وحدة ثانية سبحان الله يعني الوناسة لازن فيها نون النسوة
شي يحير
والله يستر عالبيوت العمرانة
ويخلصنا من الرياييل والحريم الخربانة

عثماني يقول...

مساج الله بالخير زوزوتا

ما اقول الا اللي ختمتي فية البوست الرائع

محد مرتاااااااااح

عَـــــــــــــذبه يقول...

غريبة جولتي هذا الصباح في اروقة مدونتك
من حكاية حب وشعور عشناه جميعا حين نكذب الكذبةاننا نعيش الحب ونصدقها
حتى يرمينا الواقع و الوجوه التعيسة من ثالث دور
الى حكاية اماني الله يرحمها و يغفر لها
ويغمد روحها الجنة
اثارت بي مكامن الفقد لأعزاء غادروا ووحشوني كثير
..
اينما حللتِ
اينما سقطت حروفك
وبلا مجاملة
زوزوتا
انتِ جميلة
كل شيء مميز ..
الاسلوب .. الكلمة . طريقة العزف على صدق المشاعر..
كل شيء رائع..
..كوني دوما بهذه الروعه..ياصديقه

ZoZOta يقول...

شهرزاد
=======
جميلة انتي بقصصك واساطيرك السرمدية
كل الحب لك لزيارتي
كل العشق لكتاباتك الخيالية والواقعية
وردي الزيارة لأنك دائما لك مكان هنا في مدونتي وفي قلبي

ZoZOta يقول...

كادي
======
الريال الزين عملة نادرة
بس موجود اكيد
قصة فلانة مو مقياس
وكل شي قسمة ونصيب
دائما سعيدة بوجودك معى يا كادي

ZoZOta يقول...

عثماني
=======
صباح العود المبخر
صباح الثوب المعطر
صباح الزين لكل الزين
دايما وببساطه وباختصار
كلماتك تثلج صدري

ZoZOta يقول...

عذبة
======
عذوبة
يا عذبة الكلمات والروح
يامن عزفتي على اوتار قلبي بكلماتك الرقيقة
اشكرك على كل هذا الإطراء
اتشرف بودودج دايما بزوزوتا

Яeema يقول...

دوام الحال من المحال

لو ما تسوي جدي صديقتج ماراح ترتاح في حياتها

لا المتزوج عاجبه
ولا العزابي راضي
هي سنه الحياة

التغافل عن الشي يخلي المركب يروح

و مهما راحح الريال عن مرته
راح إييله يوم و بيرجع لها



بس تدرين وين المصيبه
المرا يكون طاب خاطرها منه و بتجامله عشان لعيال و العشرة

zozota
راح يكون لبلوقج مساحه خاصه بقلبي

جميل جدا ما تكتبين

الله لا يحرمنا من قلمج

و شكرا لأنج عرفتينا بنفسج

SHAHAD يقول...

ساعات العشرة والحياة الروتينية تسبب ملل وجمود في العلاقة
رغم وجود الحب في قلبه لها
اعتقد الحب يبيله شي ينعشه من يديد
عاد هذا يعتمد على المرة وشطارتها
بوست رائع
بس مو تعودينها وتشككين المرة بريلها لول

Shather يقول...

والله مادري شقول ...

ما عشت التجربه
..
لكني مؤمنه بان الحب الحقيقي يظل طول العمر ..



و كلي امل و تفاءل بالمستقبل ان شاء الله ...

بس صج شي مؤلم اني احاول الفت نظر شخص و بالذات زوجي و بالمقابل ما القى تفاعل منه ...

و الله يهدا الجميع

ZoZOta يقول...

Reema
=======
انا وياج
المشلكة لما تكون ردته خلاص فات اوانها
وقلب المره خلاص عافه
وصار ما يحمل اي مشاعر ناحيته
والحياة معاه صارت التزام عشان العيال
وعشان خلاص اهي عدت العمر اللي تبتدي فيه من اول ويديد
وبما ان احنا نعيش بمجتمع ذكوري
تخضع وترضخ وتستمر حياتها معاه عشان العيال وعشان اشياء وايد يفرضها عليها هالمجتمع

وجودج في مدونتي لمسة دفا
واطرائج لي يخليني فوق السحاب
واعجابج باللي انا اكتبه يعطيني حافز اني استمر
شكرا لأنج عطيني مساحة من قلبج
وجزء من وقتج عشان تعرفين زوزوتا
لا تقاطعين
رايج دايما يهمني

ZoZOta يقول...

شهد
====
ياقارئتي الدائمة
يا صديقة الحرف والكتابه
ياجزء كبير من مدونتي
وجودج الدائم يثلج صدري

ولا تخافين ماراح اشككها مرة ثانية بريلها :)

ZoZOta يقول...

Shather
=========
اكيد الحب الحقيقي بصورته الحلوة موجود هناك في مكان ما
كل اللي علينا ان احنا ندور شوية
واذا لقيناه
نداري عليه
نحميه
نحضنه وندفيه
لأن متى ما برد
قولي عليه السلام
يحتاج حق انعاش
عشان لا يموت

وجودج دايما يسعدني

Haitham هيثم Al-Sheeshany الشيشاني يقول...

من فترة حابب أشوف أول بوست لإلك
مبدعة كعهدك

عجبني بأول كلامك إنك ذكرت إنو البعض يحبون من أجل الحب .. فقط
من أجل شعوره ، و هذا للأسف سبب لحصول الفتور .. أن تحب شخصا ً لا يعني أن تأخذك الحياة و المسؤوليات و .. و .. من ذاك الشخص

love needs work,,, haaaard work!

not because u have to ,, but because u really want to and u 100% blv it`s worth it
:)

يسلمو يا الزين
ترا جد بانتظار كتاب لإلك و لو بعد حين :)