.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

30.5.10

الزين والتاج السلطاني





قوانين التاج السلطاني:

اذكر اسم من طلب منك حل هذا الواجب
تحدث عن ستة أسرار قد لا يكتشفها من يقابلك للمرة الأولى

حول هذا الواجب إلى ستة مدونين، واذكر أسماءهم مع روابط مدوناتهم في موضوعك

اترك تعليقا في مدونة من حولت الواجب إليهم، ليعلموا عن هذا الواجب
صاحب السؤال هو سامي من مدونة سوالف يال

هممم ... شنو اسراري السته :
شكلي وايد هادية بس انا وايد عصبية
شاطرة وايد باخفاء مشاعري وعمرك ماراح تعرف شنو ردة فعلي
اموت خوف من البريعصي والزهيوي بس ما اخاف من الفار
اطبخ وايد زين بشهادة الناس طبعا بس ماني اكيله كلش
ممكن تلوع جبدي من اي شي بس ما تلوع جبدي من ريحة الييم
سواء كان مصارين دياي او خثاثيق او حتى ميد
ما اداني الهذرة الزايدة لدرجة اني ممكن ادوخ وجبدي تقلب اذا سمعت احد يتكلم يمي بشكل متواصل

احول الواجب حق منو يا تري!!


ومشكوووور يا سامي على التوهيقه المعتبره
:)



هناك 41 تعليقًا:

BookMark يقول...

أشاركج بكره الهذرة الزايدة ومت من الضحك على ادوخ وجبدي تقلب

انا بأسوء الأحوال أبجي :)

الزين يقول...

بوك مارك

:)
لا انا بجيتي كلش مو سهله
بس عن جد تقلب جبدي واحس ابي انسدح واغمض عيني
واذا كان هالشخص جريب اقول بس بليز اسكت ما اقدر اسمع زياده

بس اذا كان غريب هذي الطامه العظمى
عادي اقوم اروح الحمام عزج الله اغسل ويهي وعقبها اطلب برييه عن اللوعه
:)

chandal/danchal!! يقول...

تصدقين اني شفته عند شاي الضحى بس ما كنت عارفة انه الزامي


اتييج الاخبار ومشكورة على الاختيار

:*

mjkout يقول...

لول عاد الييم شعندج معاه توني اكتشف مهارة الحداق عندج
اما مصارين الدياي ويييييييييييييييييييع

الزين يقول...

جندل

لا لا الزامي
خصوصا اذا كنت انا اللي مكلفتج فيه
:)))

وناطره الأخبار على احر من الجمر

:)

الزين يقول...

mjkout

مو قلت لك ما يبين علي
:)
انا مهووسة حداق
ومصارين الدياي حد الويع
بس تصدق حزتها ما تفرق
ولين ضرب عليها هذاك الشعم الولمي
تنسى الريحه واهلها

:)

may يقول...

ماشا ءالله عليج ، صج مو مبين انج عصبية!

البريعصي والزهيوي ! :( بدون تعليق!

الطباخ ! خلي علي الحلو بس !

الاوركيده يقول...

الزين عصبيه ما أصدق !

وانا معاج بالزهيوي وكل الحيوانات

:)

Sami يقول...

طلعتي حداقه .. انا احب التشخيط

Seema* يقول...

البريعصي مسكين...يكسر الخاطر!
كله مطقوق! ;P
الزهيوي يلوّع الجبد ما يخوّف! ;P

وماكنت راح أتوقع تكونين عصبية...نهائيًا!

قرمت يقول...

تصدقين عاد؟ الأعصاب مو راكبه عليج كلش!

الزين يقول...

مي

:)
عصبيه شويه يمكن

البريعصي لفترة معينه من حياتي كانت هوايتي قنص البريعصيه
لين مريت بحادث مع بريعصي تقشعر له الأبدان
وبطلت

والموالح علي
:)

الزين يقول...

سامي

من مبطي
:)

ما حب لوية التشخط
احب اقعد براحتي
موسيقتي اللي احبها
وقهوتي يمي
واقط خيطي وانطر النابر

الزين يقول...

الأوركيده

لووول
شفتي شلون
راح تتفاجئين لما تشوفيني معصبه
يقولون اخرع

:)

الزين يقول...

سيما


البريعصي اييييو من قلب
الزهيوي يخليني اشمئز

:)
والكل مثلج مو مصدق اني عصبيه

الزين يقول...

قرمت

والله يالقرمت انا اشوفها داء مو عارفة له دواء

خفيت عن الأول
وصار لي تعامل خاص مع نفسي اذا عصبت
عشان اخفف من الخسائر
:)

بس بالنهاية
عصبية وايد
:$

بنت الشاميه يقول...

وانا اقره شميت ريحة الزفره
يم ومصارين دياي..... زيون ماني رفيجتج
لووووووول

خلينا على الطبخ احسن
عليج تقصص البصل
وانا علي تقشر الثوم

بس انصج لا تخفين مشاعرج مو زين..... لازم تعبرين عنها باي طريقه لانها علاج للنفس ناجع

زيون تهبيلن وانت معصبه لوووووول
تصبحينعلى خير

سلة ميوّة يقول...

يامسى الاسرار

حليت الواجب حبيبتي...

واسرارج لذيذة هيهيهيههي
بس سالفت القرقة..اممممم

عيل مو زين تعقدين معاي وانا فاصلة..عادي اسولف معاج لي الصبح...



يامسى الطيبة :**

aL-NooR . يقول...

ياااا حلو اسرارج
خفيفة لطيفة p;

تصدقين انا الهذرة الزايدة تقتلني
ساعات ودي احط mute
تيين نجربها ؟


******************

Unknown يقول...

الله يا اليواره في البنات

يعني انا اصدق انك انت والشاميه
اللي قلتوه اهو فقط اللي عندكم من اسرار ؟
من صجكم انتي وياها
قوووووووولوا الصج انتن من المعتقات
بالنت ولكم صداقات وخلافات خل نعرف
ونتعلم منكم ويتعلم الجدد من البلوغات والمخديين اللي مابي اقول اسمائهم
كششتيل الصادق

الزين يقول...

بنت الشامية

يا بعد كل من اصبح وامسى على ويه هالدنيا
:**

لووول
على طاري الزفرة
تصدقين اوله على زفرة الحداق
له عبق لااا يضاهى
لوووول
طبعا عند ميانين الحداق مثلي


بعد قلبي
اقص لج اللي تبينه
من يحصل له يطبخ معاج
يالله عزمي
ورتبي للإيفنت
والوعد عند حديقة وهران ولا يهمششش

سالفة اخفاء المشاعر هذي حاولت اغيرها
ما نفع
ساعات افضفض هني بمدونتي
بس حتى هالشي بطلته مؤخرا
يمكن لأني انسانه اعشق خصوصتي بشكل مو طبيعي
ويمكن لأن عندي احساس ان محد ممكن يفهمني مثل نفسي
والحمدالله
الموضوع مو متعبني وايد
:)

خصوصا ان ما يبين علي كلش


:)))
يمكن انتي الوحيدة اللي شافتني معصبه بالتعليقات بعد معركتي مع بو عبدالملك

:)

عسى ربي يحفظج
:*
احبششش وايد

الزين يقول...

سلة ميوة

:*
مشكووووره
مع ان حلج ناقص
:$

انتي قعدي معاي ونشوف
ويمكن تتفاجئين

:)

ومساج عسل مثل روحج

الزين يقول...

النور

:))))))

نجربها ليش لأ

تدرين انا عندي صديقه تعودت على طريقتي
فتم ساكته لين اتكلم
وهذي الوحيدة اللي اقدر اسافر معاها
لأنها تفهم صمتي وهدوئي وايد زين
وتحترم مساحتي لدرجة ان كل شي نسويه يكون على هواي
بما اني انسانه اكره القيود
فكلش ما تقيدني

:)
مشكوره يالنور

الزين يقول...

كشتيل

:)
مثل ما البيوت لها اسرار
المدونات لها اسرار ايضاااا

:)

واكيد عندنا اسرار وايد
والله يبعدنا عن الخلافات
لو بتلاحظ الكل ربعني
وانا من النوع اللي ابتعد عن الخلافات بشتى انواعها
لأنها سبب رئيسي لأمراض الرئة والسرطان
:)

من صجي
الخلافات تسمم الحياة
فشيلها من بالك

اما عن الصداقات
:))
ما تعدش
وقول ماشاء الله

غير هذا ما عنديش
حياك الله يا كشتيل
وساعة المباركه

Reem AlHajri يقول...

LOOL تذكرت يوم دش علينا فار بالخيم ، صار فلم رعب .. كان من ينط يصير طولي ، و شباب العايلة الكريمة على أساس بيصيدونه ، بس من الضحك على اشكالنا مو قادرين .. فعلاً كان موقف لا نحسد عليه ، قاعدين بأمان الله بخيمتنا المجيده نلعب جنجفه و جاي و الجو بديع ، و يدش علينا محفوظ السلامة !

و عالهذره ، أنا راسي يصدع .. لول حتى إذا كنت أنا الطرف المتحدث ، مرات بنص السالفه أسكت .. أحس وايد تكلمت لول ! .. بس بنفس الوقت ما أحب أحد يسكتني ، حدي أفتشل و أندقر و أزعل من صج .. إحم

و قواج الله ..
ولهانين عالكتابات اللي تخلينا نفكر و نسرح .. و بالنا ينشغل فيها :)

عساج بخير

KQ-Designs يقول...

ana a7b kil shay feech ya aghlaa e5t ma a3rfhaa mn greeb .. :)

ana ma awa6n el grgaa nfsch ;p

bs sa3at ahthr bs m3 nfsi lol

miss u so much :*

your sis Fskra

Deema يقول...

تصدقين إني أخاف من اثنين إذا تهاوشوا جدامي!
و ما أخاف من النقد مثلاً أو الموت حتى!

تصدقين هذي أول مرة أحس فيها إنج انسانة صجية! لأن كتاباتج في الغالب فوق الغيم :)

I7na 3shagnaha يقول...

:) hagaitich hathara

-----


shlon matkhafeen min el far !

yamkin laish inah mingirith o mo mawjood

صبا يقول...

زيووووووووون
اقولج شي ... عاد والله كان عندي احساس انج عصبيه استغربت انه الاغلبيه مو ملاحظين ...!!

المهم والاهم يا حلو الزفره جم مره حاولت اروح اصيد سمج(يعني بحدق ويا ويهي ) بس كله اخاف من دوار البحر الله لايوريج تطلع روحي وترد الف مره عذاااااب ما بعده عذاب شالحل ؟؟!!

الي طايحه معاهم الميانه لو يقرقون من الحين لي باجر عسل على قلبي بس المصيبه اذا واحد\وحده معرفه بسيطه سطحيه ويسولف ويطولها ,,,أوووووف


وماتنلامين لي خفتي من هالزواحف الكريهه

يلا شدي حيلج نبي تكملة بدري ..
:**

ARTFUL يقول...

نطالب بطبخه من ايد سعادتج

ونفضل مطبق زبيدي

وراوينا شطارتج

:)

mellow يقول...

اطبخ وايد زين بشهادة الناس

و هاااااااذا شي ثاني مشترك :)))

بس آنا "هوايتي الأكل" :)
هل آنا متينة؟ لأ بس أحب الأكل...الحمدلله.


أما الهذرة إذا زادت عن حدهافبالفعل تقلب الجبد (ما شاء الله عليج يبتيها ييب) بس آنا قمت أعطي لنفسي الإذن بأني أسرح بدون إستحياء ...مثل ما إلي جدامي ما إنحرجت يوم إنها خذت من وقتي بهذرتها، آنا عندي مطلق الحرية في إني ما أسمع (نقطة على السطر)

أهنيج على هواية الحداق ..تعلم الصبر و طولة البال :)

المقوع الشرقي يقول...

الزين كله
يسعدلنا هالاعترافات

ادوخ وجبدي تقلب
لووول
هوا بالزبط كده

...

له له يا زنزووون من صجج ما تخافين من الفاار
يماااا..أتبعثر أجزاءا صغيرة
لي لجحته
:)

الزين يقول...

ريم

لوووول

ايه مواقف الحشرات والحيوانات الصغيره تفزز

وعلى طاري الهذرة
لا يهذر يمي هندي
يزر عقلي اذا ما سكته
والله اتعب
فيا اسكته
يا ادخل عزج الله الحمام اغسل ويهي بماي بارد عشان لا تقلب جبدي

:)


ماخذه بريك من الكتابات الرومانسية
بس من احس اني راح اكتب راح اكمل القصه اكيد

الزين يقول...

كويت ديزاين

:**

يا بعد قلبي انتي
بشريني عنج
انتي زينه؟

الزين يقول...

ديما

:)
ما احب الجو المتوتر سواء كان هوشه او خلاف

والموت له وحشه ما تتخيلينها الا اذا حضرتي احد اسم الله عليج ينازع

لوووووووووووووووووول

انا صجية وصجية حيل
وبالواقع كلش ما اعرف الغيم
ريلي على القاع وعروقي ماده لآخر مدى

سئلي زوز عني

يازينج يا ديما
ضحكتيني
:*

الزين يقول...

احنا عشقناها

:)
لا كلش ماني هذارة
وتلاقيني ساكته وشكلي شحليييلي هادية

والفار ترى ما انقرض لما الحين
مااااجووود

تبين ادز لج عينه
:)

فقدتج كبر الدنيا
والحمدالله على سلامتج يا قلبي

الزين يقول...

صبا

:)
ياااازين اللي يعرفون لي والله

شوفي حق دوار البحر اكو حبوب تاخذينهم قبل ما تحركين بنص ساعه
واهم شي لا تاكلين غير الفاكهه
وخلي البرييه يمج

مره عن مره تتعودين

وعلى الهذرة
بميانه او من غير
ادووووخ
وويهي يصوفر
ونفسي يثقل
واغمض عيوني بس ما اقدر
واذا ما سكت اشكره ممكن اتهوع
ههههههه
وربي ما ابالغ

وحيلي منقطع يا صبا
يبي لي سفره تنعش الإحساس
:*

الزين يقول...

ارت فل

:)
مطبق بس
!!

سهالات واذا تبي ادز لك الوصفه بعد
عندي وحده من صاحباتي الله يذكرها بالخير

مدونه معانا اسمها ديللي وميللي
طلبت مني الريسيبي والطريقه
وعقب ما جربتها امها وعلمتها طباخهم
صارت وصفتي هي المعتمده

وهذا واهي ما كلتها من ايدي

:)

والطباخ مثل ما تعرف مو بس تكنيك
ونفس بعد

وما طلبت شي
انت تامر وتتدلل

حيا الله ارتفل

الزين يقول...

ميلو

:)

شفتي شلون
شوفي يا ميلو
انا اكل بس اكلي قليل
واحب الأكل المتعوب عليه
ومتذوقه درجة اولى
واعرف الطبخه شنو فيها من اول لقمه
عندي حاسة التذوق والشم رهيبه
:)

الهذرة ما عندي طاقه لها
ودخلت دورات ريكي عشان اعلم نفسي شلون اعزل نفسي عن الإزعاج اللي حولي لأن يضايقني حيل

وخف الموضوع بس ماراح

الحداق احبه لأني احس اني بمعزل عن العالم
املك هدوئي ومزاجي
وانا والبحر بروووحنا

:)

الزين يقول...

المقوع

ايه ما اخاف من الفار
بس لحقيني اذا شفت زهيوي
او لجحت بريعصي

ياااا لهوي
اصير صاروخ

:)

شقران يقول...

الغالية الزيـــــــــــــن


مساء الأقحوان والبنفسج

مرحباااا مليوون بالأسرار وراعيتها
:))


الزين...أظنك لاعصبتي عصبتي...مافيه روح تعال ، لأنك هادية وهي من صفات الحليم ، وأظن عصبيتك لاتخرج إلآ بعد أن يصل السيل الزبى
:)


عساك دوم مستانسة ورايقة وبعيدة عن العصبية
:)



وجميلة أنتي بأسرارك


لكِ مني أجمل وأعذب تحايا المساء