.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

4.5.10

ليه غاب بدري ... الثالث


ارتشف قهوتي فتتعلق مرارتها على اطراف شفاهي ... لأعود وارتشفها مرة اخرى كلما الهبني العطش واعتصرت حمرتهم بحثا عن الإرتواء ... اجمع اوراقي الملونة ... احتويهم بيد باردة ... واصابع تشتاق ارتداء الدفء بعد يوم متعب طويل ... تكتسحه الوحدة وصمت المنزل ...



كم امقت نهاية الإسبوع .... بصمتها المطبق ... بكسلها الذي يجعل افكاري تتراكم فوق عقارب الساعه ... لتسقط فكرة تلو الأخرى مع صحوة النهار إلى غفوة المساء ... كل دقيقة تذكرني بخلو المنزل ... الا مني .... فأتلهف لحمرة المغيب حتى يحين وقت عودتهم لتمتلئ حياتي من جديد بصخب اطفالي ... وينتاب ذكرياتي معهم الخدر ... فتختبئ معلنة انتهاء يوم آخر دون بدر



تعالوا نكمل من مكان ما وقفنا بالبارت اللي فات



بعد ما تصادفت مع حمد بالممر ... تمت سالفة ان ناداني بخالتي جدام بدر حارتني لدرجة ان اول ما وصلت البيت بجيت بحضن امي وانا اشكي لها شلون يسوي فيني حمد هاللون ... وليش يفشلني جدام واحد ما اعرفه ... ولم تكن ردة فعل امي سوى ابتسامه وكلمات قليله أكدت لي شكثر انا هشه ... ودلوعه
مادري ليش ... مع ان حمد من زمان يقول لي خالتي واتضايق وبعدين انسى السالفة
اشمعنى اليوم بجتني هالكلمة ؟!!! اشمعنى اليوم بس اللي ما ابيه يكررها ؟!!!
اشمعنى جدام هالشخص ما ابيه ينطقها
ما ابيه يقولي خالتي
ما ابيه يكبرني
وشيللي جذبني ناحية هالشخص بالذات
شكله ؟! لو لونه ؟!
عيونه ؟! لو نظراته ؟!
ابتسامته الهاديه ؟! لو صوته اللي سمعته واهو يكلم حمد
في شي داخلي وما كنت عارفه اوصفه حزتها
بس اللي آنه متأكدة منه ان التتنح مال الفيزيا راح
فهمت شي اسمه المجال المغناطيسي ..... واني آنه.. كنت واقعة في المجال المغناطيسي لبدر وكان يشدني بصورة غريبة وحتى قوانين نيوتن فهمتها بهذاك اليوم
فهمت قانون الجاذبية .. وفهمت الفعل ورد الفعل كيف تكون مساويه له بالقوة ومضادة له بالاتجاه



بعدها بيومين تلاقيت مع حمد بالباركنج ... وكثر ما كنت مغتاضه اول ما قال ناداني خالتي هجمت عليه وقرصته على يده بقوة ابي اعوره كثر ما كلمته عورتني بهذاك اليوم
انت ما تعلمني متى بتيوز من هالسالفه
وهو يصرخ من الألم : آآآآي ... علامج صايره عنيفه هاللون
عشان تحرم تحرجني جدام ربعك ... وبعدين منو هذا اللي ناديتني خالتي جدامه
ابتسم : هدي يدي وانا اعلمج
موب هادتك لين اعرف
زينووه ...
نطقتها بتهديد : حمـــــــــد
زين والله بعلمج ... بس هدي يدي
طالعته بشي من الشك بس بعدين كسر خاطري وهديته
وهو يفرك مكان العوار : هذا صاحبي بدر ... وبعدين انتي ليش زعلانه .... ترى علمته اني اطفرج لا تخافين على برستيجج
يالله عليج صايره قوية ... شوفي شلون قرصتج علمت بيدي
ياربي عليك ... حمادي تعرف تتدلع بعد ... وبعدين شله تعلمه بالسالفه .. قلتها وانا اكور يدي الصغيره .. واضربه على كتفه
صرخ بألم ... علامج اليوم ... انتي داشه كلية المصارعة لو كلية الفنون ... شتوكلج خالتي بالبيت
اقتربت منه ثانية وانا مهدده ...
زين زين ... بقول والله بقول ... لأن سألني شلون اناديج خالتي وانتي شكلج اصغر مني بوايد ...
حينها ابتسمت وكأن اطمأن قلبي ... ليبتسم حمد ويسألني بخبث
شله هالإبتسامه
وانا اتركه متجهه لمحاضرتي : موب شغلك



واشتعل فيني احساس جديد وفضول ما كنت اقدر اعرف مصدره ولا فاهمته اصلا ...وتميت في الايام اللي بعدها أحاول اني اتلاقى ويا حمد باي طريقة ....حتى لو بيقولي خالتي انا راضيه
بس ابي اشوفه ... قصدي ابي اشوف اللي وياه

وشفته ...
شفته وآنه رايحة محاضرتي
حزتها كانت محاضراتي موزعة بين مبنى الآداب ومبنى البزنس
وكانت وحدة من محاضراتي في مبنى البزنس
وشفته هناك في الممر ...
لمحته من بعيد ... مثل ما هو لمحني من بعيد ..



وكل شي تغير حزتها ... الإحساس بالترقب والبحث المتعب ... تحول لشعور بالغبطه والفرح ... ويتراوالي ان الجو حولي صار ابرد ... وجنه .. جنه روحي ردت ...وصرت اشوف الألوان بشكل ابهى ... والأصوات اللي كانت تزعجني صارت مالها وجود .. والزحمة اللي كانت تضايقني بالممرات صارت انسب مكان عشان اخش احساسي فيه ... وبوجوده بقربي ... وعيوني اللي كانت تتبعه ... وما تتبعه بنفس الوقت ... ومحاضرتي اللي كنت استثقلها ... صارت مصدر سعادتي ...



وتكررت الشوفات .... بحكم ان عنده محاضرات في نفس المبنى ونفس الوقت من كل سبت واثنين واربعا
وكل شوفه تزرع بقلبي مليون آآهه ... وفوقهم مليون فرحه منخشه مثل الطفل الصغير اللي مستانس بس مستحي من وناسته ... كنت آنه وياه نشوف بعض بدخلتنا وطلعتنا من المحاضرات
وكنت في كل مره .... انخش من مشاعري ... والاقيها تصيدني ... تحكرني ... وتوجهني ناحية اتجاه واحد ... خط مستقيم ... يوصلني دايما لعيونه



تعرفون الشعور لما اتمون تنتظرون المحاضرة حتى اتشوفون شخص معين
وتحبون المحاضرة حتى لو كانت دمها ثقيل ...واللي يحاضر حتى لو كان القاءه رتيب ...والمبنى حتى لو كان بعيد .. واليوم حتى لو كان طويل ... والساعه حتى لو كانت نحيسه وتتمغط وكل هذا لأنكم بتلتقون فيها بهالشخص
تعرفون لما اييكم احساس ان هاليوم انخلق كله بزحمته .. بتعبه ... بهواه .. بريحته ... بحرارة شمسه .. بتفاصيله عشان تشوفون هالشخص



آنه كنت هاللون



كانت الساعات الثانية ما تعنيني ... والمحاضرات الثانية مجرد خطوات تقربني من هالمحاضرة ... وزحمة الممرات ولوية الطلبه كلها مخلوقه عشان تعطيني احساس ان موعدنا اللي ما اتفقنا عليه قرب ...
ومن ادخل الممر اللي يوصلني لمحاضرتي احس ان كل الحركه اللي حولي تسكن ... والأصوات تخفت ... وانفاسي تثقل ... ودقات قلبي تتناثر على الدرب اللي يوصلني لآخر الممر ...



واتساءل ... شلون كنت المحه من بعيد .... بين هالجمع كله ... وشلون اهو كان ينتبه لوجودي ... وعيونه تتبعني ... وابتسامته اللي فيها سلام من بعيد... فيها سؤال عني وعن احوالي تلاحقني حتى لو حاولت اصد ... او اسوي حالي ماني منتبهه



شنو هالرجفه اللي تتملكني كل ما التقت عيني بعينه ... وكل ما حسيت ان الفرح ملون ملامحه كلها لأن لمحني من بعيد ... وشكثر كان يتعب عشان يخش لهفته ... عني ... او عنهم ... مادري



كنت اتمني انه يجرب اكثر ... يقول شي ... تعبت من نظرات نختلسها ... وابتسامات تلوح على ملامحنا من بعيد ... تعبت من ترقب شي ما اعرفه ... بس ابيه ... ورغبتي فيه تشدني لدرجة الجنون ... ولدرجة اني ممكن افقد توازني بلحظه وما اتوقع ردة فعلي تجاه اي موقف ....



كنت يوم اللي اشوفه فيه ... اقضي طول النهار انتظر هاللحظه ... واقضى باجي الوقت بعد ما اشوفه بانتظار اللحظه اللي بتكون بعدها .... وطول الدرب وانا راجعه البيت ... اخلق مواقف ... وارسم صور ... واعيش احلام طفله ... او يمكن مراهقه ... اعيش قصص سندريلا ... وقطر الندى ... وكل الجماعه اللي قصت لي امي عنهم عشان اقدر انام وانا صغيره ...



بس تدرون شنو المشكله ... اني ما عدت صغيرة ... وما عادت هالقصص تنومني ... بالعكس ... صارت تشغلني ... وتحيي فيني مشاعر اول مره احسها ... ابي اتذوقها .... وابي اغرق فيها ... ابي اعيشها بجنونها ... وبتعبها ... بشوقها ... ولهاثها ...



ووصلت مرحلة اني ودي اهزه ... ودي اقول له ليش ناطر ... شنو ناطر .... انت شايفني ... وانا شايفتك ... انت لقيتي ... وانا لقيتك ... انت تنتظرني مثل ما انا انتظرك ... اثنينا نحاول نخلق اللحظه ... ونصنع الصدفه .... ونجتمع في ممر



شناطر يا بدر ...



بس اوقف عند هالفكرة ... واهز نفسي ... واصرخ بكل مشاعري اللي معاندتني ....



هذا جنون ... وقفي هني



انتي اكيد .... ينيتي







يتبع















هناك 38 تعليقًا:

حالِمه .., يقول...

تكتبين حالمة أخرى ..،

شكراً زيون //
توقضين مشاعر قاعده أنومها مغناطيسياً :q

فيني كتابة بوست بس ماني عارفه شكتب بعد
:(

chandal/danchal!! يقول...

خوش جزء... احب سوالف الجامعة وغرامي اتطمش عليهم

:)


بالانتظار




ترى القرين بيم اللي دزيتيها ضاعت
:(

بقالي 3 بيــم و 2 بايب, والحر تكفيه الاشارة والكلام لج يا جارة... جني بحطها ستاتس, تغيير عن السب

:)

سلة ميوّة يقول...

متابعين

may يقول...

إيـــــه يالزين..

ياحلو الإدمان على حرفج ،،

وتقولين تفكرين توقفين كتابة !!

حرام عليج ،، ما نكسر الخاطر ،، انا وكووووول اللي يتابعونج ..

:(

المهم..

حييييل تعجبني القطعة الأدبية اللي تبدين فيها بوستاتج ،، دايما تختارين مقدمة تشد بطريقة عجيبة ، بعدين تنتقلين للأحداث ونحس روحنا بوسطها..
لدرجة ان لما كتبتي آخر الاسبوع ممل ،، قلت صح ممل ،، مع اني حيييل احب الويك اند ، بس مع كلامج عشت الدور!!

***
واللوهجة البوحرينيه عوجيبة

;)

***
يتبع ،،
والله لا يحرمنا من اليتبع

خاتون يقول...

صج صج صج انتي هاذي البنت و هل انت بحرينية
لأنج دايما تعيشينا بالقصة و تخطفينا و تربطينا داخل القصة بكل الاضاءات الليي فيها الروايح و حتى لاول مرة و بس هني على كثر ما قريت لناس روعة بس ما اقدر اقول لحد اللحين لقيت اروع منج يخليني المس الشخصيات و اتحسس حتى ملامحهم

و صج و في وحدة من صديقاتي اللي ما تعرفينها و تعيش في هذا العالم ربما بعيدا عنك لكن اهي تقول سلمي لي عليها
تدرين انج صرتي احد المواضيع اللي اتكلم فيها علشان ازيل الممل من المكان
و باستأذن منج بعد ما خلصت و سويت الشغله طبعا و الا ما اصير اانا
هالايام قاعده انسخ بوستاتج و ادزهم ايميلات و احط بالنهاية بقلم الزين مثل ما انت حاطه و كل البنات فرحانين بهالحركة فأرجوا انج ما تمانعين اهم ما يعرفون لأسلوب المدونات و مشغولين فيفضلون الايميل
و شكرا و عفية ابلة زيووون وافقي
*_^ و لا تنسين تجاوبين على السؤال لأنج عفستي الخريطة بمخي ههههه

نون النساء يقول...

يا حلات اللهجة البحرينية اللي طالعه مستحية بالقصة

:P~

خنينه

le Koweit يقول...

انا اول مرة اقرالج شي الصراحة
وماشالله اسلوبج شدني

لي عودة لقراءة البارتات السابقة وهالبارت
ولي لفة انشالله على ارشيف المدونة من بعد اذنج :)

esTeKaNa يقول...

صباح الرقه والإحساس
:**
أدري ان الجزء نازل من امس
ولكن...
من خوفي من قراءته سريعا أجلته لصباح هذا اليوم لتتزامن حلاوته مع مراره قهوة الصباح
.
.
.
أجمل الحب البدايات:
شغف الانتظار
وحلاوة النظرة
وأرق الليل والتفكير
.
.
.
احببت هذا البارت اكثر من ما تتصورين :
الربط بين الفيزياء والمشاعر
جاذبية نيوتن وجاذبية القلوب
وكل هذه التفسيرات اللذيذه التي لا يفهمها الا اصحاب القلوب المحبة
:)
دمتي جميلة
يا صديقتي الجميلة دائما
:**

Antonio يقول...

لي غاب بدري ..

انا ناطر الاحداث الي تفسر هالعنوان ودخلت معركة التفكير الحين مثل قصة فضة وشاهين ذبحها وذبحنا معاها حسبي الله ونعم الوكيل بالي كان السبب خو احنا عارفين منو ..

عيوني تتبع الزين في معركة المشاعر

وبانتظار الزين دائما

حسافتج يا كويت يقول...

حبينا نمر ونسلم عليج يا الزين

من زمان مالي خبر فيج ولا بالتدوين والمدونين

المشكلة لويه الشغل والحياة اخذتنا من احبابنا المدونين ومن التدوين نفسة
اتمنى ان تكوني بخير

المقوع الشرقي يقول...

الزين كله

وجنه..جنه روحي ردت

هاهاها

الا ردت ونص

:))

متابعة..

bu-saad يقول...

وليييييه
شنو يتبع !! الله يسامحج بس


تنرقب ؛)

الاوركيده يقول...

يسعدلي صباحج يالغالية

ياحلو بداية الحب ولما تحسين فيه اول شي والاحاسيس متداخله بعض ماتدرين شنو توصفينها :)

حبي لج
:******

الزين يقول...

حالمه

:)

مو قلت لج هالقصه فيها شي لج

كتبي ... كتبي كل اللي بخاطرج
ولا توقفين كتابه

:*

الزين يقول...

جندل

:)

عيل بتيوز لج باجي القصه

كملي


وتم قبول النداء

:*

الزين يقول...

مي

ايييييه يا مي

وياحلو طلتج علي
وتعليقج اللي ما ودي يخلص

ايه والله وايد افكر مو شويه
بس اكو ناس مجابليني وماسكيني عن تنفيذ قراري

:)

اسم الله عليكم من كسرة الخاطر بعد قلبي

بقول لج سر

بداية كل بوست يكون مشبع بمشاعر انا تجاه القصه اكثر من ان يكون بداية احداث
بين الكلمات راح تشوفين ملامحي
احساسي
ودقات قلبي

:)

واللهجه البحرينية قاعدين نجتهد فيها
ولو انها مو بعيده عني

وربي لا يحرمني منج
:*

الزين يقول...

سله

:**

احبج تدرين

الزين يقول...

خاتون

الصج الصج الصج
يمكن ايه ... ويمكن لاااء
:)))

مهم وايد تعرفين؟؟

عليهم بالعافية
خليهم يقرون
بس انا افضل يدلون طريجي
تركي لهم لنك المدونه
وشجعيهم يتابعوني
واتمنى اشوف تعليق منهم
او اعرف على الأقل رايهم باللي يقرونه
واذا يحبون يراسلوني ما عندي مانع
عطيني خبر وانا اعطيج الأيميل

ومشكووووره على الدعاية المجانية
:***
بعدي انتي انا كلي لج

وسلمي على صاحبتج واااايد

حالِمه .., يقول...

كتبت
:(

وقتلني السؤال،،
كيف للكتابة أن تزيدنا وجعاً ؟!

الزين يقول...

نون

انتي وينج؟؟؟؟
وليش غاااطه

مو مبينه بالفيس بوك وعلى بالمدونات

عليج غرامه ترى

الزين يقول...

حقوقي

حياك الله
وتسعدني متابعتك
وان شاء الله يكون اللي بتقراه على هواك

المدونة باللي فيها مكانك وحلالك

مشكور وايد

خاتون يقول...

أي مهم أعرف
please please please
؟؟؟
ها شقلتي ما اسمع

خاتون يقول...

نثيت (نسيت) اقول
مشكورة..ThanX..غراسيس..سلامت بو..ميغسي
*_^

الزين يقول...

استكانه

صباح العودة الجميله
والروح اللي ما نملها
صباح الصحبة الطيبه
صباح الناس اللي نوله عليهم

وصباحج انتي يا استكانه
:*

وبعد نقاشنا الطويل للساحة التدوينية
وتشجيعج لي بالإستمرار
كانت الحصيله بوستين ورى بعض

:)

عسى ربي يخليج لي ولا يحرمني من وجودج
:*

الزين يقول...

انتونيو

:)
خل اصلح لك العنوان
ليه غاب بدري
ترى اهو سؤال
واجابته سرد احداث القصه
بتشوفيه تالي
وبتعرف ليش غاب بدرها

مابي اتكلم عن الأحداث واحرق عليك القصه
اكيد انت راح تتابعني
واكيد متابعتك مهمه عندي

وعساك دوم بخير يارب

الزين يقول...

حسافتج يا كويت

:)

يا اهلا وسهلا
ومن طول الغيبات
واكيد الدنيا تلاهي
واكيد اللي يغيب عن العين ما يغيب عن الخاطر

مشكور على السؤال وربي يحفظك ويسهل امورك وين ما كنت

الزين يقول...

المقوع

لووووول

شفتي شلون
جنه جنه والله

:)

الزين يقول...

بو سعد

:)))

ويسامحك معاي ويسامح امة محمد كلها

شسوي
تبيني اسرد لك القصه كامله
ماااقدر
فيها سوالف وايد

بس ان شاء الله ماراح اطول عليكم

الزين يقول...

الأوركيده

ادمان البدايات وارد
خصوصا اذا كانت بداية غرس للحب

:)

الزين يقول...

حالمه

الكتابه تؤلم عندما تؤكد وجود الجرح
وننزف مشاعرنا واحنا نحاور المنا
نطلب منه يوقف هناك بعيد
نبي نكون خارج الصوره
نبي نرتب امورنا من غيره
بس شلون
اذا احنا اصلا رافضين نكون متفرجين
ومصرين على البقاء بين التفاصيل
وعايشين هالتفاصيل بحذافيرها
نجتر معاها مشاعرنا وذكرياتنا وجزء من انفسنا


طلعي بره الصوره
وانتي ترتاحين

:*

الزين يقول...

خاتون

:))))

جم تدفعين
!!

الزين يقول...

خاتون

:***
حياج الله

غير معرف يقول...

آآخ من الحب .. بدايته لذيذه بلذه كل شي بالدنيا .. بس نهايته محد يعلمها الا ربج يا الزين ..:((

In Love

غير معرف يقول...

هذي مشكلة البنات (يبون أحلام على أوهام)
هذا حب من طرف واحد نتيجة توصلت لها بعد سنوات خبرة بالحياة لا باس بعددها
و سبب النتيجة ان لو كان بدر يبيها جان طار يخطبها قبل لا تطير اهي عنه
وتقبلي مروري

الجودي يقول...

شنو هالزين

تدرين حسستيني جني أمشي بممرات مبنى 11خ و ممرات العديلية واتفرس بالوجوه واجمع نظارتهم وأوفق بينهم ...


بوست ولا أحلى صورتي اللحظة بصورة جماليه عجيبة و روحها الغضه الشبابية تصرخ ...

حبيتها ..

غير معرف يقول...

يــــآأإه الزينْ . . .

متعِبهْ . . وجدتُ جنوناً يوافِقَ جنونَ خيالاتيِ . .
جميلة جداً , ثائرهْ , مختلفهْ , مترفهْ , عذبه , نقيّه , طاهِرهْ , فاتنهْ , كل شيء كل شيءْ . . إستمريِ

يرحم والدينك لاتوقفينْ خلاص مخي شبك معها بقووهْ . .

موفقه ياربْ وين ماكنتيِ ..

أختك . . هُدىَ محمَدْ آلْ ذُوُقْ

بآقة طُهر لروحِكْ

غير معرف يقول...

ليه غاب بدري .. . الرابعْ .. وينهْ ؟
الثالث بعدين الخامسْ ع طول ؟؟ ) :

الزين يقول...

عزيزتي هدى

الجزء الرابع موجود بالشهر الذي يليه
والقصة لم اكملها ابدا
توقفت عن خامس جزء لعارض صحي ولم اعد لها

تابعي القصة اليديدة
امرأة بوجه آخر .. راح تحبينها
وسعيدة بوجودك عزيزتي