توقفت امام مرآتي .. ارسم ملامحي بعد ان تاهت فوق انعكاسات ذكرياتي معك ... امشط شعري .. اخط كحلي .. واجمع بريق سوادي المنطفئ وراء همسات الشوق العتيق ... شوقي لك يا بدر ...
الون شفاها قد تاقت لنطقها باسم قد حرمته عليها .. محوت ابجدياته من قاموسي .. ابجديات قد علمتني كيف انطقها بلغتك البحرينية المحببة ... اتذكر يا بدر ...
"قولي اقطه .... " فأرفض وانا غارقة بخجلي من احرفي المتمردة على اصولي النصف بحرينية ..." انزين قولي هني" ... اتردد قليلا ... وانطقها ... متغنجة بلهجتي المهجنة ... فتغرق انت بدموع ضحكك .. واغضب أنا من سذاجتي ... واعوجاج لساني ... وتعود لتمازحني سائلا عن كلمة معينة وماذا تعني وتطلب مني نطقها ... فاتبعك مطيعة .. لتبتسم بتفكه وتقول لي " مزيان ... لا تقولينها جدام احد "
بدر ... تحاشيت ذكرك ... تناسيت عبقك ... صددت سحرك .. ولبست بعدها ثوب البعاد ... ولون الغروب ... وليل ينكسر على شواطئك وابدا لا يتوب .....
هل ترى كم تغيرت ... كم كبرت .... وكم من الأماني حررت وعتقت ... فأنكرت هي حريتها .. واصرت على البقاء هنا ... بين ابتسامة فرح مزيف ... ورعشة عشق يقتله الظمأ ... ووجد لا يعرف الهزيمه ابدا ..
اجلس على طرف السرير .. اضفر اطراف شعري ... اجمعه لأخفي حكايتي معك ... حكاية بدر ومزيان
واتوقف لبرهة ... استمع لأنفاسي ... اجمع صمتي ... امقته ... العنه ... ادفنه بين أضلعي ... اعيده لمسكنه قسرا ... والتحف بالإستسلام ... احاول ان اتصالح معه ... واعلم قلبي كيف يرضخ ... كيف يرضى .. وكيف يستسغيغ ارتداء الأقنعه ...
فتمتد يدي مغيبه عني ... لتحتضن رقمك وانا اطلبه ... واتوقف مرة اخرى هناك ... قبل ان اضغط على ارسال ... هل اضعف الآن ... وهل تعلم كم وقفت هنا .. على حافة الإستسلام .. يعصرني الشوق .. ترهقني الحاجة لك ... وتهيم روحي باحثة عن وصلك .. لأتراجع بآخر لحظة .. واتذكر عهدا قد اخذته على نفسي بأن لا اعود اليك ... لأني لا املك الحق بالعودة
اخفي وجهي بين كفين لم تلمسهما غير تلك المرة .. ولا زال يغمرني احساسي بك كلما اجتررت ذكرياتها .. واعود لأقصيك بكل قسوة ... حتى اجترار ذكرياتي معك حق لا املكه ... ولكنه لازال يملكني ... يضعفني .. ينتهك مقاومتي ... لأعود واحاربه بكل شراسه ... شراسة ان تعهدها بطبعي ..
احتضن رأسي ... ارجوه ان يتوقف عن الدوران في فلكك ... الغرق في ملكوتك ... مستسلما لمصيره دونك ... ولكنه يأبي ان يفعل ... ويلين .. ويركن للطاعة
والتفت لصندوق اسراري ... لمواطئ اصابعي على مفاتيحه ... واقرر ان اكتبنا ... وان اكسر جدار صمتي الذي ضاق علينا ... واختنقنا بين زواياه ....اكتب بدرا غائبا ... ومزيانا تشتاقه للأبد
......
اذن .... لنبدأ
كل ما اتذكره هو لمحات خاطفة من عمر طفلة صغيرة كانت في المرحلة الابتدائية انطوائية وخجولة يقيدها الإحساس بالإختلاف عن الأخريات ولا تستطيع ان تضع يديها على السبب
كنت اذكر ان اللي كانت قاعدة يمي بالكرسي بنت مصرية اسمها جيلان ...جيلان عبد الصبور
كانت مربية الصف مقعدتنا يم يم لأن محد كان راضي يقعد يمنا وما كان عقلي الصغير قادر يفهم ليش .. وشنو الفرق بينا وبينهم
حزتها حسيت اني وجيلان غير لسبب اهم يعرفونه بس ما يصرحون فيه .. اشوفه بعيونهم ... بتصرفاتهم معانا ... وعزلنا عن لعبهم بالفسحه ... وسوالفهم بين الحصه واللي بعدها ... وحتى نظراتهم كانت تتخطانا جنه احنا مو موجودين ... او اشباح ما يشوفنا ...
كنت استغرب .. ويشغلني الف سؤال وسؤال ... بس عمري ما استفسرت ... يمكن لأني كنت خايفه اعرف وما يعجبني اللي بعرفه ... ويمكن احساسي الفطري كان يقول لي احسن لي اني ما اعرف ... مادري
بس مع الوقت ادركت ان اللي غير هي انا... مو جيلان
فيني اشيا مختلفه ... يمكن كانت تستفز فيهم هويتهم البحرينية الخالصه ... علشان جذي محد راضي يرافجني
شكلي كان غير عنهم ..... لا كنت سمرا مثل السواد الاعظم في الصف ولا كنت بيضا مثل الباجي ... لا كان شعري اسود وناعم مثلهم ولا كان أشقر ومتمرد مثل شعر امي ... كان مخلوط بين الأثنين مثل ما انا مخلوطة الدم .. والملامح
كان لوني خليط من بياض وشقرة أمي التونسيه الأصل وسمرة وملحة البحرينين اللي اخذتها من صوب ابوي
كل شي فيني مختلف ... حتى كلامي بحكم وفاة أبوي ربي يرحمه بسن صغيرة وتربية أمي لي وحدها ترك بصمة كبيرة على شخصيتي
فكنت مموهة الهوية ... ولهجتي تحمل الكثير من الكلمات اللي ما كانت تتداول بالبحرين ويمكن ما يفهمها البعض ... مع القليل من الكلمات البحرينية البسيطه
وحتى في سالفة الابو كنت مختلفة
كنت اليتيمة الوحيدة بالصف ... وكنت اسمع البنات يقولون أبوي و أبوي ...
بس آنه مب عارفة شنو هاذي اللي يتكلمون عنه لأن ما عندي ... ما عمري نطقتها ولا وظفتها بسوالفي ... ولا اعرف شنو تعني
يومها أتذكر رحت لأمي وسألتها وين أبوج ؟؟
سكتت شويه وبعدين ردت علي ..... عند الله
وفضولي ما خلاني اتوقف عند اجابة امي فرحت وسألت أمي فاطمة جدتي ام ابوي وين أبوج ؟؟
فقالت لي اسمه يدج يا الملسونة وقولي ربي يرحمه .... مات
تميت فترة افكر بالموضوع وبعدها رحت وسألت أمي شريفة ( زوجة أبوي ): وين أبوج ؟؟
ابتسمت لعفويتي بالسؤال ورفعت رأسها للسما وقالت لي .... في السما
يمكن حسيت وقتها ان كلهم يشاركوني بنفس الشي وان ما عندهم ابو مثلي
يعني انا مو بروحي بهالدنيا اللي ما عندي ابو ....في ناس بعد مثلي
بس شعور اليتم وان ما عندي ابو خلاني اتحسس وايد وكل هاذي ظهر بعد فترة بشكل او بآخر على شخصيتي
حقيقة الموت بالنسبه لي كطفلة كانت مبهمة ... كل اللي كنت اعرفه ان اللي يموت يروح مكان ثاني شلون وليش وشكثر مادري
الى ان توفى ولد عمي ( واللي امه أخت أمي شريفة اللي كانت ماخذة عمي) في حادث سيارة هاذي كانت أول مرة يكون احد اعرفه مات وما اشوفه بعدين ....ففهمت ان اللي يموت يروح و ما نرد نشوفه
الشي المضحك والغريب واللي كان بمثاية مواساة لشعوري اني مختلفه عن باجي البنات واعتبرت نفسي حظيظة لأني املكه وهم ما يملكونه ان اهما كان عند كل وحدة فيهم أم وحدة ....لكن آنه كان عندي 3 أمهات وكلهم أناديهم يمه
وعلى الرغم اني مع الوقت عرفت أن عندي أم وحدة ولدتني وربتني ... الا اني لازلت اعدهم امهات لي
أمي توفت والدتها عنها وهي بعمر السبع سنين وما عندها الا أخو واحد ورباهم يدي وما تزوج الا لما تزوجوا خوفا عليهم من زوجة ابو ممكن ما تحسن معاملتهم ..
اما الأمين الثانيين واللي اعدهم تاج راسي
أمي فاطمة وأمي شريفة
أمي شريفة هي زوجة ابوي الله يرحمه.... كانت وايد طيبة وكنا دايم نروح عندها البيت وكانت تحبنا حيل وتحب تقولنا القصص عن ابوي ربي يرحمه وتعوضنا عن غيابه ... وتخلينا دايما نحس بوجوده ونذكره من خلال قصصها وسوالفها عنه
كانت امي شريفة مثل ما تقول أمي مو شريجة لها ......كانت أخت
كنت دايما اقول حق نفسي أمي شريفة مو مثل مرت ابو أمل اللي وياي بالصف
مسكينه امل ....كانت مرت ابوها ما تحبها وتطقها وتخليها تنظف... ولماوصلنا للصف السادس كانت تبي تزوجها وتطلعها من المدرسة
حزتها كان عندي اعتقاد ان اللي كتب قصة سندريلا اكيد يعرف قصة امل وكاتبها عنها ... شتقولون بتفكرين اليهال
اما امي فاطمة فكانت الجدة والأم الثالثة بالنسبه لي ... واللي حاولت تعوضني عن غياب ولدها الله يرحمه بالدلال والمداراة
المهم ... نكمل
تميت بالمدرسة للصف السادس ما عندي ريفيجات الا جيلان المصرية ....دينا المصرية ....ميلدا اللي امها امريكية ... ميرنا اللي امها مادري شعدالها ... ومن على شاكلتهم والمخلوطين مثلي
......
ولما ارجع بذاكرتي ورى ... لما احاول اني اصف ايامي يم بعض ... واسلسل القصه عشان اكتبها لكم ... لقيت فراغات كثيرة ... مساحات بيضه مو معبية ... غابت تفاصيلها عني ... وين راحت .... شلون راحت ... مادري ... بس الأكيد اني اسقطتها عمدا من حساباتي ... عشان اوفر على نفسي الم رفض من مجتمع ينظر لي على اساس اني دخيلة عليه لأن امي مب بحرينية ... ولهجتي وشكلي يختلفون ... ورغم صغر سني الا اني فهمت ان كل شي مختلف لازم يلاقي رفض معين من ناس معينين في مجتمع مغلق مثل مجتمعنا
......
بوقف هني .... وبنرجع نكمل تالي
هناك 48 تعليقًا:
زيون فجأه طرت علي
يالزينه ذكريني ، لي غيبتني بحور
وبشوق ناديني ، يمكن الدنيا تدور
اموت عالبحرين واهلها وهالمره بترويلنا شي عن اهل البحرين و بقلمج؟
ما اعبر الاغنيه تون باذوني :P
وأنا بعيد بعيد ، ما عندي غير ال آه
حملت نَيّم السما ، شوقي لكم وياه
وصيت طير الفله .. ولا حمل لي وصاة
حملت موج البحر سلامي ماوداه
حلفت يالزينة ، ما أفارق البحرين
مساء الخير
الزين ما يطلع منه الا الزين :*
متابعة بكل حب وشوق
ناطره التكملة :)
عجيييب الإسلوب اليديد...عجيييب
قريب للقلب..
اتخيله..اسمعه...
وحبيته
مسّاج الله بالحب والكرامة
ماني قايلة شي يازيووون !!
اكسرت خاطري البنية ..
بس هذا واقع !!
توني وانا اقرا قاعد استرجع ذكريات الابتدائي, صج ما كنا نختلط اللا باللي نفسنا !! أي وحدة تكلم غير ولا شكلها غير محد يبيها !!
مادري كنا يهال شريرين ولا تأثير أهلنا اللي ينبهوننا لاترافجون أي أحد !!
ولا يسوون تحقيق عن أي صديقة منو أمها ومنو أبوها !! ليش بناسبهم ؟؟!!
تاليّـج متى يا الزين ؟!
بانتظار ما تخطه اناملك و صباحج خير و مطر و نوير :)
بالانتظار
وتقومين بالسلامة
:*
آآآآه يا قلبي
جميل اسلوب سردك في انتظار البقيه بس حسيت شوي مطوله وتحكي وتحليلين ما خليتي مساحه للقارئي يفلسف فيها الحكايه
تقبلي مروري ومتابعه معاك
يازتلي القصه
متابع
:)
[[ كنت استغرب .. ويشغلني الف سؤال وسؤال ... بس عمري ما استفسرت ... يمكن لأني كنت خايفه اعرف وما يعجبني اللي بعرفه ... ويمكن احساسي الفطري كان يقول لي احسن لي اني ما اعرف ... مادري ]]
الله ياقلب الياهل.. شوفي شلون تفكير طفلة صغيرة .. وقدرتها على ضبط النفس..
[[ ولما ارجع بذاكرتي ورى ... لما احاول اني اصف ايامي يم بعض ... واسلسل القصه عشان اكتبها لكم ... لقيت فراغات كثيرة ... مساحات بيضه مو معبية ... غابت تفاصيلها عني ... وين راحت .... شلون راحت ... مادري ... بس الأكيد اني اسقطتها عمدا من حساباتي ... عشان اوفر على نفسي الم ... ]]
هي تنظر لها الآن على أنها فراغات ، لكنها بالواقع حفر عميقة عليها أن تبتعد عنها ..
متابعة للزين ياكل الزين..
اجر وعافي يالزين
شلونج يالغالية بشريني عنج وشلونج قاعده احاتيج ؟
دعواتي لج بالصحة والعافية يارب :*
لقيت فراغات كثيرة ... مساحات بيضه مو معبية ... غابت تفاصيلها عني ... وين راحت .... شلون راحت ... مادري ... بس الأكيد اني اسقطتها عمدا من حساباتي ...
إشارة عميقة
وعلم نفس
بين بحر مزيان
وبحر الزين
مستمتعين بالبحرين
شكرا
:)
سلامتج زيون حبيبتي ..
ما تشوفين شر :)
>متابعه
زيوونه
امتابعنج يالحلوه وخيوط الشوق تسحبني
واستمري بالسرد ويديمومه من الصحه والعافيه
ربي يحفظج يالزين
قبل كل شي ، ألف إسم الله عليج ..
و مأجورة إن شاء الله :)
و القصة جميلة .. جميلة
و أنا متابعة
وايد حلو. ناطره التكمله :)
ما تشوفين شر زيون
طيبة ؟
انت مختلفة هنا
بين طيات هذا النص
امتزاج تفاصيل محبب/ جديدة
والبحريــــــن ..
احس هالديرة طيبة..
كوني بخير .. و طمينيني عنج :*
***********************
اسم على مسمى يالزين ...
متابعة..
متابعة بشغف ..
المشكلة إن موضوع الفصل واقع،
و لكن وجودة على حسب البيئة نفسها
و هل تسمح بالتفرقة !
أنا عندي ثلاث أمهات بعد هههه ..
الله يرحم موتانا و موتى المسلمين
و يطول بعمر أحبابنا ..
عفويتج رائعة،
ما تشوفين شر إن شاء الله
عجيبه أنتي
=)
أحب أقرالج
متابعة بحب
مختلفه بالقصه
أسلوب الكتابه ..سرد التفاصيل
بالزاف حلاوه
الأم اللي تربي صح
ومرت الأبو يمكن الدراما ما أنصفتها وظلمتها ..الأكيد أصابع الإيد مو سوى ..
بقولج شي مستغربه منه جــــدا..إن شاء الله بطرش لج إيميل
أجر وعافيه وأنشاءالله تقومين بالسلامه
عذرا على الإطالة
لي عودة مع همساتكم الكريمه
الى حين
اترككم بحفظ الله ورعايته
فرامبويز
الله احبها هالأغنية
تهقين احطها بواحد من الأجزاء
ومافارق البحرين مافارق البحرين
:*
الأوركيدة
مساء الورد والعنبر
مساء القند والسكر
بعد قلبي انتي
والتكمله يبي لها صحه
وانا لما الحين تعبانه
وما فيني اقعد وارتز جبال اللاب توب
منكم السموحه
سلة
:)))
يا بعد كلي انتي
ياللي دايما مرفعة فيني
قلت اكتب باسلوب مختلف عشان اطلعكم من مود فضه
واشوة لقيت احد ياز الله الإسلوب
مساج كل الحب
:*
يو نو هو
ماكنا يهال شريرين
ولكن هذا تأثير اهالينا من غير ما يشعرون
يغرسون فينا امور عن طريق احاديثهم
وتصرفاتهم التلقائية جدامنا
واحنا نتبناها ونمتصها ونتصرف على اساسها
كل غريب مرفوض
وكل جديد منكر
ومشى الموضوع لين كبرنا وعرفنا الفرق
وشكثر كنا غلطانين
وشكثر اهلنا كان ميزانهم للأمور مختلف
القصه تحمل الكثير من الأفكار الإجتماعية اللي مرجعتنا ورى
خلج معاي
الا لا
تاليي لما اقدر اقعد على حيلي
قولي ان شاء الله
ربي يسهل
جندل
يسلم عمرج ويحفظ لج غاليج يا جن جن
ما تقصرين يا قلبي انتي
:*
واي مي
اسم الله علي قلبج
:)
صباح الخير
مشكورة على الإطراء
:)
القصه عبارة عن سرد لسيرة ذاتيه
وخطاب مع النفس
وعرض زوايا الشخصية الرئيسية بافكارها
ومخاوفها
ونظرتها للأمور شي مكمل للسرد
اللي يبي يفلسف يقدر يفلسف براحته
:)
وهذي قصه يالشيخه
مش لغز عشان يتفسر
سعيدة بزيارتك وشكرا للمتابعه
ارتفل
حياك الله يالشيخ
تسعدني متابعتك
:)
مي
الطفل عنده القدرة على تبسيط الأمور والتعاطي مع المشاكل بصورة ممكن تذهلج
هي تنظر لها الآن على أنها فراغات ، لكنها بالواقع حفر عميقة عليها أن تبتعد عنها ..
تدرين شكثر المتني هالملاحظه
بالفعل هي حفر عميقه قد تبتلعنا لو اقتربنا اكثر
مي
احب كل ما تتركينه هنا من مشاركات
مشكووووره
الأوركيده
يعافي قلبج يارب
:*
ان شاء الله احسن
والله يسهل
مشكوره على الدعاء والسؤال وعسى ربي يحفظج من كل شر قولي آمين
جاسم
الحكاية قد تطول وقد تقصر
ولكن الأكيد انها بتكون مشوقه
يسعدني انك من الناس اللي يقرون مابين السطور يا جاسم
شكرا لك
هند
يسلمج ويعافيج ويحفظج من كل شر
:*
صبا
بعد قلبي يا صبا
ومتابعتج تهمني
لا تباعدين بليز
:*
ريم
بعد قلبي ما تقصرين
:**
والجميله انتي بعفويتج يالريم
ومتابعتج جداااا تهمني
لا تباعدين
تكانه
عن قريب ان شاء الله
:)
النور
الشر ما اييج ما تقصرين
وانا طيبه بحيل الله
وجه اخر للزين
وجه جديد
حرف متجدد
احاول
لعل وعسى تفتح لي افق جديده
وزاوية من نفسي ما كنت اعرفها
مشكوره على السؤال
والمتابعه
كوني بخير
مشاعرها
تسلمين بعد قلبي
من ذوقج
وتسعدني متابعتج
:)
الاء الياقوت
اذكر اني مريت على مدونتج في يوم على عجاله
وقلت برجع لها
وتالي نسيت
اليوم كنت هناك
ولقيت انج لا تقلين عني عفوية
وجنون
:)
احببت ما قرأت من همسك
وتسعدني جدا متابعتك
فيونه الشارخ
حبتج العافية بعد قلبي
:**
مشكوره وعسى ربي يحفظج
الوتين
:*
اكس نيم
بانتظار الأيميل
:)
على قولت يدتي"ما أدري شقول و شحجي و شخلي"
صدق من سماج الزين كل اللي تكتبينه زين على زين
روعة تفاصيل تقمص ابداع مصطلحات نكهة يديدة و بنفس الوقت تشبهج
عبور للدول و البحار
إن كان للإبداع اسم دلع فهو
"الزين"
في ناس كتاباتهم حلوة تذهلني تسحرني لكن كتاباتج تمتلكني و تأخذني من مكتبي و تحطني بنفس المكان تخلينا نفكر مع الشخصية فيها من خلالها عشانها
أتوقع حل لغز جفنشي بالنسبة للكتابة و الابداع هو أنتِ و كل ما أقوله في حقج يا حبيبة قلبي قليل
حافظج ربي من العين*_^
رآئــعة بكل تفاصيلهــآ ...
:)
سلمتِ وسلم قلمكِ عزيزتي ,,
متـابعة .. وبشوق ..
كوني بخير ..
حتى اجترار ذكرياتي معك حق لا املكه ... ولكنه لازال يملكني ... يضعفني .. ينتهك مقاومتي ... لأعود واحاربه بكل شراسه
وايد حلو وقوي
إرسال تعليق