.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

14.2.10

قصاصات حمراء اللون

بحثت بين تفاصيل يومي عن كلمات اهديها لك
فلم أجد غير قبلة أرسلها عبر الأثير
وفستان ارتديه يشتعل باللون الأحمر



أتوق لغزل الشاطئ
واشتاق لمداعبة أمواجه
وافتقد صحبتك معي هناك
فهلا أتيت لنصطاد اللحظة
ونقتنص اللؤلؤ
ونختبئ وسط محارة قد عشقت انعكاساتنا فوق صدرها



طفلة نزقه متمردة من تختبئ بين كلماتي
فهل تمتلك من العقل ما يستوعب جنوني
!!




لازلت ثملة بصدى ضحكاتك الصباحية
ولا زلت ارتشف من ابتسامتك اشراقة يومي
اتعلم ماهو شرابي المفضل
عصير جزر منكه بهمسك
مطعم بالقليل من عصير البرتقال
وقطرات من اعترافاتك اليوميه بأنك تعشقني




يجمع قلبي تفاصيلك
يحلل دقاته من خلال وجودك
يضع دراسة جدوى لرغبته بالقرب منك
يحاول معرفة نسبة الربحية وتقليل المخاطر بقصة قد تجمعه معك
وبالتالي يقوم بمعرفة مدى نجاح هذا المشروع ..
أو خسارته مقارنة بالسوق العاطفي واحتياجاته المتمردة على صرخات عقلي

تعتقد اصلح اكون مستشارة عاطفية!!





وخارج الموضوع الفالنتايني ... من تابع قصه فضه ... اسرته الشخصيات ... وملكته الأحداث .. وانهكه الحزن والإحساس بالظلم .. وتعاطف مع من تعاطف معه .. وحنق على من حنق معه

هي مساحة حره ... اهبها لكم ... ليكتب كل منكم نهاية ترضيه .. وسوف اقوم بنشر تلك النهايات تباعا ... وخلونا نشوف شنو اللي طلع معاكم ...

هناك 52 تعليقًا:

الاوركيده يقول...

هلا فيج يالغالية
ماتفقدين غالي انشاء الله

كل عام وانتي الحب ، انا بخير الحمد اللة واليهال زينين بس والله من رديت من السفر و آنا الصداع مو راضي يفج عني ما أدري شنو السالفة على قولت زوجي شكلج تبين بيروت وجوها :)

why me يقول...

أتوق لغزل الشاطئ
واشتاق لمداعبة أمواجه
وافتقد صحبتك معي هناك
فهلا أتيت لنصطاد اللحظة




دايما تييبينها :)

SHOOSH يقول...

تصير سنة الهدامه و كلهم يغرقون

:)

skittles يقول...

love is overrated, and valentine's is a marketing scheme to make profit. :)

الزين يقول...

دمعه

اسم الله عليج
اخاف حايشج هوى يا قلبي

:*

Engineer A يقول...

انا عن نفسي ما احب اختلق نهايات لنهاية موجودة بالأصل :)

ناطرة نهاية قصة فضةوشاهين (اللي كتبتها الزين) بفارغ الصبر :)

الزين يقول...

واي مي

:)
شطوووره انا

:*
شلونج

الزين يقول...

شوش

دراما هنديه يا شوش

:)

الزين يقول...

SKITTLES

who said any thing about valentine!!


Marketing is ur game
o luv is mine
dude

hehehehehe

:*

الزين يقول...

Engineer A

Soon hon

soon

:*

why me يقول...

انا بخير عساج بخير

أكيد شطوره . البلوق اللي يلامس احساسنا ويكشفنا



انتي يالزين :)


:**

Sami يقول...

نبي نهايه سعيده ... بغض النظر عن شكل النهايه

H يقول...

Kalamch ys7rneee ;D

And about the story !

U said it is a true story 9a7 ?? Then u have to end it the way it is in real life ;*

بنت الشاميه يقول...

كل يوم وانت بحب وسعاده وامن وامان
يارب.... وكل احبائك ياكريم

تعتقد اصلح اكون مستشارة عاطفية!!
ومنو يصير اكثر منج بمستشاره لقلب تعرفينه وتحفظين ادق تفاصيله منك انت
؟؟؟؟؟؟؟

يابخته فيج ويا بختج فيه





اما نهايات فضه وشاهين
ما يصير هى قصتج ونحب نقرا نهايتها منج انت.....هن بنات افكارج
وبنحب كل اللى تكتبيه




بس حصيص ....الله يخليج شوفي لها صرفه قبل ما لا يرجع شاااهين.....زوجيهااا
او خليها ترد على ريلهاااا
هههههههههههههههههههه
كل يوم حب وانت بحب دائم يارب

7osen يقول...

بوست حلوو مناسب لتاريخ اليوم :)

أحس من زمان ماكتبتي هالنوع من الكتابات ... أنا تعجبني الكتابات الدافية مثل إللي كاتبته اليوم ..

بالنسبة للنهاية أنا عندي نهاية .. بس أعتقد إنج لو كتبتيها ماراح تسلمين من المتابعين هههه علشان جذي حنا ننطر نهايتج إللي إنتي مفكرة فيها

واتمنى إنها تأتي بدون تأثير التعليقات ......

تحياتي لج زيون

سبمبوت يقول...

يا سلام عليج :)

ميمة السبيت يقول...

** ابد و راسج الغالي محد يخط نهاية فضة غير ادياتج الحلوة و نبي ابداعج يالزين بس عفية بدووون عوار قلب ونسينا بالفالنتاين

و ترى صج صج ناطرين النهاية لأن مشالله من بداية القصة لي اخر جزء انكتب كله ابداع

لاتطولين علينا يا شيخة البنات

Antonio يقول...

تعتقد اصلح اكون مستشارة عاطفية!!

نعم تصلحين :)

مبدعة دائما دام الله ابداعك لنا

.....

فضة تنظلم والنهاية حزينة

شاهين راح يكتشف الحقيقة متأخر

وفضة ترفض الرجوع اليه والى كل من وقف ضدها

الحسرات ستأكل الجميع بسبب ظلمهم لفضة

اتوقع جذيه :)

وبانتظار الزين دائما

صبا يقول...

عزيزتي الزين

بداية تقبلي سلامي وتحياتي مملوئة بالحب والذي يعيش في هذا اليوم وكل يوم كما يعشقه أهل الحب واتمنى ان نكون دائما من أهله لان هذاالكون قد خلق وهو عامر بإشعاعات الحب في كل بقعة من بقاعه ....


أتعلمين وأنت تذكرين اليوم بما نود ان ننهل به على صدر هذه المدونه الرائعه استرجعت شريط الذكريات ما بين شخوص تلك الروايه ان كانت فضه على راسهم وشاهين ....تأملت لو كانو بيننا في هذا الجو الذي نعيشه ويكاد اللون الاحمر يلف اماكنهم واركانهم وكانت تلك الورود الحمراء الباسقه واليانعه بلونها واعطارها كيف ستكون ارواحهم وتعاطيهم مع الاحداث والتي اقصد بها مشاعر الحب والعطاء والخوف وبهجة اللون الاحمر لانه يعتبر لدي شخصية استثنائيه في حياتي مع هذا اللون الذي ارتبطت وارتبط معي منذ طفولتي
:)

ففيه اجد شخصية انسان تبحث عن جمال الحياه .....فهل سيكون للون الاحمر فاعلية عند

شــــاهـــيني !!!

الذي دائما ما اراه يحلق في سماء الواني واخصه باللون الاحمري
:)

لون الشمس
والجاذبيه

فليت نفهم ونعي معنى

الجــاذبــيــه

فكيف ان كانت ممزوجة باطياف اللون الاحــمــري

.
.
.

بالمناسبه
كنت في نقاش مع شخص منذ قليل فيه الكثير من الجاذبيه الحمراء التي دائما ما اتعلق في طيفها

سالته ..ما سر جاذبية هذا اللون الى نفسي ؟؟؟

فكانت الاجابه ...ابتسامة تكسوها ثوب
من البهجة الحمراء ...ليعلق على سؤالي


السر بداخلنا فنحن من يضيف ويخلق جاذبية اللون الاحمر
انها تقطن وجنتيكي
؛)

لا اعتقد انها سوى اجابه فلانتانيه
يقصد من ورائها الجاذبيه
:)

فانني سالبي له هذا الطلب

(زيون لا تضحكين )ترا صج
:)


وهناك تلال من الشوق يكسوه ليس الثلج بل نيران ..لانها لون احمر

فهل نعي معنى الجاذبيه
هذا ما يدلوه دلوي

:)

ما عليه كتبت بوست اصغير سامحيني خذيت مساحه من صفحتج مدونتي مهجوره وهذا بيتي الثاني


احبـــج ودوم يارب تعيشين الحــب
؛****

المقوع الشرقي يقول...

الزين كله
ماذا تركتي لنا لنكتب

لامستي الوجدان
من الداخل يا زيوون

الله يحفظح
ويحفظ لنا هالقلم المبدع الراقي

..

أعتقد ان النهايه.. محسومة كونها قصة حقيقية

ما نتمناه أمر

والحقيقة أمر آخر

أوليست الحياة

!!!
ما نتوقعه أحيانا..يكن صفعة
تعيدنا الى الواقع
أن
(الحياة ليست عادلة)

هذا ما كنت أبتغيه يا زنزون

خاصة وأن القصة حقيقية

كم وكم من قصص مرت ..
نتمناهم ..بسعادة ..وتسدل ستارة النهاية
كما الأفلام المصرية القديمة

وأذا بها بداية
لحياة ,,أقسى ..,أمر

..

كم

من الاماني
راحت فشووش

..

تحياتي

غير معرف يقول...

للأسف ماراح يرضيني
الا النهايةا لي ترضيج


واليوم

احبج:)

:*

الزين يقول...

واي مي

:*

الزين يقول...

سامي

:)

ماكل ما يتمناه المرء .... اكمل الفراغ يا سامي

بس حط في بالك ان القصه حقيقية
:)

الزين يقول...

H

يا بعد كل من راح وييه

والقصه بالفعل حقيقة
بس التفاصيل كلها من وحي افكاااري

:)

حبيبتي انتي وراح تنتهي مثل ما المفروض تنتهي

الزين يقول...

بنت الشامية

يا بعد قلبي انتي
:**
كل عام وانتي وحبايبج يميع تحيطكم محبة الرحمن وحفظه

وحصيص بسلمها للمقوع الشرقي
عطتني خوش اقتراح لها

:))))

وكل يوم حب وانا معاكم برضا وصحه وعافية ورزق من رب العالمين

:*

الزين يقول...

حسين

اهو بالضبط بوست خفيف
قلت اكسر المود شويه

والنهاية ماراح تكون بناء على ما يطلبه المشاهدون

:)
بتكون نهايتي انا

تحياتي لك يا حسين

الزين يقول...

سبمبوت

:**

يا سلام سلم
المود احمر هاااا

مشمش يقول...

مرحبا بالزين هذي اول مشاركة لي في اي مدونه انا متابعة يومية لمدونتج الصراحة يعطيج ألف عافية بس ما يصير جذيه تعلقينه كملي القصة لي الآخر وبنعرف شنو النهاية عل العموم فكرت بالنهاية بي نبيج تصيغينها
باسلوبج وكلامج المنمق اللي مثل العسل
أنا عن نفسي الصراحة احب قراءة القصص بس ما عندي القدرة على صياغة القصة على شكل سيناريو حوار
الأحداث مثل ما تخيلتها
1- بنت حصة سارة اللي ربت في بيت ابوها الحين متزوجة وفي بيت ريلها يصير معاها نفس اللي صار مع فضه ينط عليهم حرامي وينحاش والهالمرة وما يبوق شي و ما يصيدونه وهالخبر يوصل حق أمها عن طريق الجيران من الصدمه ومن خوفها ان بنتها ينطعن في شرفها تنشل وما تقدر تنطق وتصير عاجزة وهذا كله قبل لا يرجع شاهين
2- شنينة لما تشوف بعيونها شصار حق عمتها حصة تخاف وتعترف بغلطتها وتطلع الدشداشة اللي خاشتها تحت السرير خصوصا ان عمتها صارت عاجزة وما تقدر تأذيها . تطلع براءة فضة . هالاحداث مقابلها احداث ثانية بالديرة الرياييل بالدير يسمعون ان في خطر خارجي وان المطلوب من أهل الكويت المساعدة لصد الهجوم هالاخبار توصل لي بومبي يسمع شاهين بالاخبار ويغير رايه بالزواج ويقرر يرجع الكويت على طول خايف ان يصير شي وما يقدر يرجع الكويت بعد يوصل شاهين ويجتمع شملهم وفضة تساعد حصة وتباريها
3- تولد فضة وتييب توم بنت وولد وتسميهم على اسم عمها وخالتها يملون عليهم البيت فرح وسعادة .

chandal/danchal!! يقول...

بصراحة انا بعيدة كل البعد عن الفالنتين, ويعجبني الحكيم شوكوكو لما قال: الحب ليه غدار لا هيا دي مجدعة, خلاني ليل ونهار العين مدمعة وتزيد عليا النار آكل مسئعة وتزيدني شعللة في الألب والكلة دا الحب أندلة أندلة



ولدي مسويلي قلب احمر بالمدرسة ويايبة حقي يقولي: سويتلج هارت عشان تتزوجين ابوي (ليش واحنا عايشين بالخطيئة؟)!!!!... امحق مدرسة تعلم هالتعلوم!



سألتيني وين منخشة؟

اجوابج: لابدة عند مدونتج الزينة

ونسيت لا اقولج (شهوتن فيها العافية)... عسى حصلتي فلافل طيبة؟

GUCCI-q8 يقول...

أتوق لغزل الشاطئ
واشتاق لمداعبة أمواجه
وافتقد صحبتك معي هناك


شكرا لعزفك المنفرد

الوتيــــــــــن يقول...

الزين كل يوم وانتي بحب

يالزين لا عاد بتزعليني عليج ... ترى أييبلج كانابيه " عندي ازمة انابيه"

الزين حياتي تعودت على اسلوبج ومهما كتبوا هم بنطر تكملتج انتاي .. ابي مقدماتج اللي تداعب مشاعرنا .. ونهاياتج المعلقة في كل جزء ... لااااااا نوت فير الزيييييييييييين

صباحج ورد :(

الزين يقول...

ميمة

يسلم راسج يارب وقلبج وكلج يا ميمه
:**

وراح ابلش اكتب اخر جزء اليوم
قولي يالله

الزين يقول...

انتونيو

ايوااا صح
:))))

مدري ليش حسيت ان وراك ناس وااايد وثنوا على كلامك بايوااا صح

وشكرا لك لمشاركتك برؤيتك الشخصية لنهاية القصه

صباحك ورد

الزين يقول...

صبا

تعالي اول شي خل المج حيل
والمدونة كلها تحت امرج
تكتبين بوست
تكتبين معلقه
تكتبين روايه
افا عليج
:***

صبوي اقول لج شي
لما تيين تعلقين عندي احسج متعطشه للكتابه
تبين تقولين
عشان جذي تسترسلين وهذا شي يسعدني وايد
انج ماخذة راحتج وعندي بالذات

مدونتج تصيح من هجرانج
وطبعا هذا قرارج الشخصي
وكلنا نحترمه
بس ما ولهتي على الكتابه
!!

احبج اكثر
وعسى ربي يسعدج وينولج اللي يطيب خاطرج
:*

الزين يقول...

المقوع الشرقي

:)
صحيح
الحياة مافيها عدل

وساعات الأماني تبقى مجرد اماني
صعبة التحقيق
وعمرنا ماراح نوصل لها
بس ما يمنع ان احنا نحلم بتحقيقها

وصباحج وله
:*

الزين يقول...

سلة ميوة

:)
عيل نطريني شوي
خل اكتب النهاية على رواااق

وانا كل يوم احبج زود
:*

الزين يقول...

مشمش

صباح الخير والنوير
صباح الورد اذا غرد على اغصانج هذاك الطير

ديباجة صغيرونه ارحب بوجودج عندي من خلالها
واحيي نفسي اللي قدرت اطلعج من صمتج
:)
بس هاا اتمنى انج تستمرين بالتواصل

اما بالنسبه للقصه
فمنو قال اني ماراح اكلمها للآخر
انا حبيت بس اعرف شنو رؤيتكم انتوا
هذي كل الحكاية

انبهرت بالأحداث اللي حطيتيها
عن جد انبهرت
قعدت اقول الله
عندج خيال جميل جميل جميل
خليتيني احب نهايتج
وافكر بالنهاية اللي في بالي
:)

وعلى طاري انج تحبين القصص
اذا كنتي تملكين الخيال اللي كافي
بلشي تكتبين
حاولي
مع الوقت راح تتحسن مقدرتج
وتصقلين اسلوبج
اهم شي انج تكتبين وايد
وبين فترة والثانية ترجعين للي كتبتيه من قبل
وتعيدين تقييمه
تشوفين وين نقاط الضعف وتشتغلين عليها
:)

وما عندي مانع اساعدج
شقلتي؟؟

الزين يقول...

جندل

:))))
الحكيم شكوكو مبدع
وانتي حافظة بدعته
:*
يا حبي لج يا جن جن

لوووووووووووول
اسم الله علينا من الخطيئه
وااي ذبحيتيني ضحك
شكوكو وخطيئة
انتي اليوم فيلم عربي ابيض واسود

ويعافيج يارب
لا والله بالدوام ما عندي وقت اكل
ويومن رجعت البيت من التعب ما تغديت
ريحت لمن السبع وتالي غداي اهو عشاي

عندج محل ترشحينه لي عنده فلافل طيبة؟

:)
يعين الله
ويعافي قلبج يارب

الزين يقول...

GUCCI-q8

يا اهلا وسهلا بالغايبة الحاضرة
:)

وين كنتي بالضبط
وحشتييييني

الزين يقول...

الوتين

حبيبة قلبي يالوتين وياج يارب
:**

اكيد بتكون النهاية لي انا
بس حبيت اعرف رايكم انتوا شنو

ليش زعلانه
!!

مشمش يقول...

صباح النور شخليتي لنا من الزين يالزين كله . < ما نقايش يم كلامج الذرب >
بالنسبة للخيال أنا عندي خيال بس كسوله :)
مشكورة على تقديم المساعدة الله لا يحرمنا منج .
بس انا مخليه هالموهبه افجرها لي تقاعدت :) بس شي واحد اللي خايفة منه انه لي سن التقاعد الا انا مخرفة لوووول

عاد ذيك الساع أألف قصص من نوع ثاني .

الزين يقول...

مشمش

لوووووول يا عمري انتي
الخراف بيحوشنا كلنا

وتدرين عاد
احلى قصص واخف طينه قصص المخرفين
الخيال يكون فيهم شاااااطح

:)
يا زينج زيناه

chandal/danchal!! يقول...

لول

على طاري فيلم عربي... يسألوني شنو الفرق بين الكَنَبة والشُفُنيرة؟؟؟؟

ليش يعني تسألوني هالسؤال؟... شايفيني نادية لطفي بفيلم سبع بنات!



والفلافل متنسية فيهم استغفر الله حبيتهم بحمالي بعبيد وكرهتهم بحمالي بنونا... بس لما كنت احبهم كنت اتعنى حق فلافل شرف!

الوتيــــــــــن يقول...

خلاص .. كلامج دغدغني وراضاني :c

الزين تدرين لو علي ؟؟ النهاية بتكون حصيص تيّن وتغرق بالبحر .. وشاهين يرد وتعترف شنينة وتولد فضة وليد نفس القمر ويسمونه عبد الله ( أو بنت يسمونها الوتين ... لا يهم .. احم قصدي موزة) .. وبس

لأن قلبي خلاص تفرفت حرّه من حصوه .. وماعاد يتحمل كلامج الحلو واساليبج اللي تخطف الانفاس .. يعني دزيني واصيح *_*

مساج فانيلا وريحة بحر الفجر

بنت أحمد يقول...

جميلة جداً تلك المقتطعات الرومانسية

رائعة جداً

لااملك إلا أن أقول

شكراً لك على هذا التميز في العطاء

^_^

Unknown يقول...

في كل ثانيه من الوقت

اتمنى ان اعيش فيها بكل ارتياح ولا اي قلق هذا هو الحب عندي

واتمناه لكل الناس اللذين اتعامل واجلس معهم وناستهم هي من وناستي ولكن الاقدار غير ذلك

يالله السلامه ترى الحب يونسسسسس يونسسسسس لكنه مو بيد الانسان هذي هي الحره

كششتيل

الزين يقول...

جن جن

لووووول
كثر ما تحجين مصري اسم الله عليج
على بالهم فيج عرج يمكن


شرف مين!!

الزين يقول...

الوتين

يا زين المشاعر المدغدغة
:)

ودااائما وابدا النهاية السعيده
والبعيده كل البعد عن الواقعية

خلينا نشوف شنو بيصير
:*

الزين يقول...

بنت احمد

:)
الأجمل والأرق هو وجودج عزيزتي

ولا تباعدين

الزين يقول...

كششتيل

:)
اسم جديد في عالم الزين
يسعدني متابعتك
ويسعدني اكثر اعجابك بكلماتي ومشاركتك هنا

لا تباعدين

غير معرف يقول...

بليييز شلوون احصل قصة فضة دورتها مالقييتها ودي اقراهاا :S

الزين يقول...

غير معرف

:)
سوري
بس انا شايلتهم كلهم
وقاعده اشتغل على القصه من تعديل واضافات

القصه راح تنشر من ضمن مجموعة قصصية صغيره

ولما تنشر راح اعلن عنها
وان شاء الله تلقينها بالسوق

:)

منج السموحه مره ثانية
وتقدرين تتابعين القصه اليايه

عندي سؤال
انتي ما قريتي ولا جزء منها؟