.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

1.6.09

حكاية .....؟

تتسلق طرف الجدار ... تنكفئ فوق انعكاس الضوء ... تنكسر بذاك المنحنى ثم تنسكب متوارية خلف لون الظل ...

تنحني ...
تتبدل ...
تتلون ...
تتخثر ...

تتخصر ... وتختزل التفاصيل تحت انعكاس ملمس دروبها المسلوكه .... تتأنى ... تتراقص مع أفكارها ... تقصر الخطوة تارة ... وتطيلها تارة أخرى ...

تلتف حول الخواطر ... وتلفها الأمنيات ... تثلج أطرافها برودة مواطنها ... تنخفض منحدرة ... تحلق قليلا ... تزهو برشاقة حركتها ... وسرعة بديهتها ... ثم تعود لترتقي سالكة دروب أخرى .... متراقصة بين اللحظة والفكرة ... مستكشفة كل ما حولها بمتعة ... وترقب أحيانا ...

هو عالمها ... رغم صغره الا انه يخصها هي ... ومثيلاتها كثيرات ... ولكنها اليوم وحدها تملك تلك المساحة ... تتغنى برحابتها ... تستمع بمفرداتها وفرديتها ... خطوة بعد خطوة تسلك دروبها .... تتغنج ...تتمجد .. تمجج انعكاسات الصور ... تستقي من كل صورة روح جديدة .... تتذوق الحياة ... تسرق المتعة ... تستبيح الضوء والعتمة ... وصوتها يعلو ... ويزهو ... ويغني لحنها هي ....

تملك الزوايا ... تكتب الحكايا على وجه المرايا ... تعشق انعكاس صورها هناك .... تتفنن بالتقاء تلك الصورة مع نسختها .... تلعب دور البطلة والكومبارس ... جميلة هي كما ترى تفاصيلها... متهادية بذلك القد المياس ... هي تراه كذلك ... ترتديها النرجسية ... وهي تدرك ذلك ... من يفوقها بالشكل والإحساس .. من ينكر عليها ذلك ... هي حرة فيما تشعر ... وتعشق ما ترى وما تنظر ... عالمها ... إحساسها ... لونها ... همهمتها ... وعيناها ... ويا لتلك العينان من كحلها حتما فنان ....

حرة هي ....

تمسح على تفاصيلها برشاقة .. بالا رينا بعالمها .... ورغم انعدام المشاهدين أحيانا ... ورغم انتهاء المشهد على غفلة وبسرعة أحيانا أخرى ... والتهديد المتواري خلف نوايا القادمين من بعيد

الا إنها سعيدة بكل هذا ... تعيش يومها ... تطوي أمسها .. وتنتظر الغد بكل بأس

عمرها قصير قصير ... أسبوع لا أكثر ... ثم يواريها النسيان ... لتحل محلها من أورثتها .. عالمها الفاني

تلك هي ....




................ حكاية ذبابة


وخوووش كسرة مود

بليز لا تطقوني
:))))

هناك 58 تعليقًا:

mellow يقول...

لأ بطقج لأن حسيت إن الوصف ينطبق علي

:((

I7na 3shagnaha يقول...

والله مكشختها !!

وانا قاعدة اقرا و مشتطة

الحين خلصنا من الدياي

يه دور الذبان :))

بس هم حلوة و هي تخصر و تجابل روحها بالمنظرة تلعب بروي, تذكرني بوحدة أعرفها:))

صباح الوفرة و الذبان :))

chandal/danchal!! يقول...

looooooooooooooooool
@ ميلو

:)




خلصنا من الطيور ويا دور الحشرات

نون النساء يقول...

عاد ذباانة صارت بالارينا


شهالبالارينا اللي تخلي الواحد يفقد اعصاابه






يا صباح البف بااف
ههههههههههههههههههههههه






اي والله كسرتي فينا
U تيرن صار حد الدعسه

الحــــٌر يقول...

:)

`~MnO YeNSa! ~` يقول...

زيووووووووووون

كلنا حشرات :(
لا لا لا مو قبول
كسرة قوية


بس ذكـــــاء
بنفس الوقت
:*

Yang يقول...

جميل ....

صرت احب الذبان الحين :))

هذا شي عادي ؟؟؟؟

اعتقد مع اسلوبك في الكتابة كل شي صار عادي :)))



تحياتي

ميمة السبيت يقول...

دياي قلنا ماشي صوصه دمها خفيف بس ذبان الله يهداج ليش ؟

مساء الورد عالورد

DiLLi O MiLLi يقول...

ويييييييييع !!!!


تلعب دور البطلة والكومبارس ...
جميلة هي كما ترى تفاصيلها ...
متهادية بذلك القد المياس ...


أنا قلت الزين قاعدة أتكلم عن Penélope Cruz !!


بعدين يحليل صورتها .. كاشخه بنظارات Dior !!

:)




ألااااا يبيلج عض موو طق !!!!

glomhilda يقول...

نعم نعم

أنا حياتي بالمقلوب..وأحب أقرأ الأشياء من الآخر..شفت ان السالفة عن ذبانة..فطست وقلت لازم أكمل :d

إلا عااااد كشختيها تكشيخة ^_^

من قدج يا ذبانة =)

Q80 Blogger يقول...

هالمخلوق شنو غثيث

احسه نحيس .. بس حق الازعاج .. يهد كل الدنيا ويفتر على الاوادم

وانصحج تروحين الوفره وبعدها راح تمسحين البوست كله

الزين يقول...

ميللو

لووووول

محشومه انتي احلى منها بوايد

:**

الزين يقول...

احنا عشقناها

ههههههههههههههههههههه

قلنا نغير المود


بعدين انتي ما تساءلتي شنو شعور هالمخلوق البشع اللي مأذينا واهو يحوس على الشباك

ولا قلتي حق عمرج ياربي من وين هالذبانة يايبة هالثقة

!!

هي مجرد تساؤلات ومحاولة لرسم عالم الذبانة الخاااص جدا

وسلامتج وتعيشين

الزين يقول...

احنا عشقناها

نسيت اسئلج

من تقصدين

!!!!

الزين يقول...

جندل


هههههههههههه

شفتي شلووون

بعدي والله ميللو



كل يوم بطلع لكم بطلعة غير

صبري علي

:)

الزين يقول...

نون


يا صباح البف بافات كلها



ليش ما تحسين انا خفيفة مثل البالارينا

@@


اهم شي انج ضحكتي

الزين يقول...

الحر



طريف صح

:)

Yin مدام يقول...

لوووووووووووووووووول

اليوم في 3 بوستات خلوني أفطر عن صيامي من التعليق والتدوين
وإنتي وحدة منهم

أول شي ماشاءالله تبارك الرحمن
الله يحفظج ويزيدج من فضله
عليج خيال واسع وشيق وأسلوب رائع لروايته


وثانيا
لوووول
تدرين شتذكرت؟
ما أدر ي ليش بس يوم خلصت البوست يت على بالي مسرحية "المتزوجون"
صُرصار حُبنا
ويا ريتني كنت صُرصاار

لووول

مساج ورد وعسل من غير ذبان
لوول

أنا رديت صمت :))))))


"لا زلت بإجازة"

Manal يقول...

يا من حظها هالذبانة

:)

a7mad Nabeel يقول...

السلام عليكم
ـــــــــــ
حتى معاشر الذباب ؟؟!
وصلهم وباء النرجسية
بس ممكن نتفهم كله اسبوع و يودعون الحياة من حقهم !
احييج على اسلوبج الرائع بالكتابة و سامحيني يمكن مو انا اللي اقدر اقيم قلم رفيع
ـــــــــــــــــــ

Q8 uniQue يقول...

لأ, أنا بالي راح بعيـــد ...

مقلب "محبوك" صح :)

شكراً "الزِّين".

secret يقول...

تتخصر و بالارينا

قاعد اقول جان زين وحدة شقرة

:)

mellow يقول...

عمرها قصير قصير ... أسبوع لا أكثر

وه وه وه إسم الله علي ... لا لا لا عيل إن شاء الله ما فيها مني ولا فيني منها

بس خوش ذبانة .. من وين يايبة صورتها؟

حسافتج يا كويت يقول...

لوهلة
حسيت ابي اصير ذبابة


الله يسامحج

مادرى عنج الذباب

تفكير رائع كالعادة

بو محمد يقول...

حمود ولدي ينونه الذبان

ينتفض جنه سعفه و تلوع جبده و حالته حاله

بجرب أقول له أوصافها من الموضوع جود أغير رايه

:-)

دمت و الأهل و الأحبة برعاية الله

الزين يقول...

منو ينسى

لووووووول

ادري والله انج بتعترضين


يا بنتي كسرة مووود

متنا من الهم والجد والرومانسية

:)

الزين يقول...

يانغ


لوووووول

اهم شي انك صرت تحب الذبان

ايه ايه عادي


شوف رغم قباحتها الا ان مخلوق له كيان

وما نقدر ننكر هالشي عليها

صح

!!

الزين يقول...

ميمة السبيت


هاااو

وليش الذبانه مالها رب

:))


مساء الناس العسل

الزين يقول...

ديللي

لوووووووووول

الويع طالعة من قلب



تهقين ماكو ذبانه من الجنس الآخر تشوفها مثل بينولوبي

وعيونها ذباااحه

لوووووول

بذمتج مو دمه خفيف البوست

:)

الزين يقول...

glomhilda

شفتي شلون

ذبانتي كشششششخه

:)

وحياج الله بعد قلبي

الزين يقول...

Q80 Blogger

اهو بالفعل مخلوق غير محبوب

وذبان الوفرة بالنعت

:)

حياك الله يالشيخ

الزين يقول...

مدام ين

بعدي والله اللي كسروا صيامهم

ليش حالفة!!


وشسالفة الإجازة

ترى ولهت عليج


صحيح ان مسيو ين مو مقصر

بس ما يغني عن وجودج بعد قلبي

:**

الزين يقول...

منال

:)))


لقت اللي يلقيها بال مسكيييينه

الزين يقول...

احمد نبيل

شفت شلون
ذبابة ونرجسية

:)

حياك الله يا احمد وساعة المباركة

الزين يقول...

Q8 uniQue

لوووووووول

توقع بالك وبال غيرك بيروح بعيد

يسعد لي هالصباح وبشايره

:)

الزين يقول...

سيكرت

لوووووووووول

ترى في ذبان اشقر

واخضر

واسود

همممممممممم


سيده رحت بذاك الراي يمه منه

:)

الزين يقول...

ميللو

وعمرج عمر شعيب النبي بعد قلبي

:**


والصورة من فليكر

الزين يقول...

حسافتج

لوووووول

اسم الله عليك خل الذباب للذباب

:)

حياك الله يالشيخ

الزين يقول...

بو محمد

:)))


يا عوينتي يا محمد

اقرا البوست له وبسط له المعاني

جود الله ورحمته


وصباحك خير يارب

بنت الشاميه يقول...

زيوووون
ينلامون فينى اللى مو عاجبهم اللى اكتبه

يشووفون كتاباتج ويقارنونها فينى
اكيد ما راح يعجبهم...ويدبون فينى
لو اموت ما اعرف اكتب جذي


تنحني ...
تتبدل ...
تتلون ...
تتخثر ...
تتخصر

هذى مو ذبانه هذى راقصة باليه

تصدقين انى حبيتهاااااا
ههههه
تحياتى يالغاليه

LaReina يقول...

صراحه اندمجت في الموضوع وانزل الصفحه وانزل .. واقرى اخر شي تطلع ذبابه

صدق يبالج ظرب (طق) ...

بس عن جد كسرتي المود .. لووووول

الخيلاء يقول...

ماراح اطقج

بس بذبحج يصير

و انا الي رحت عالم ثاني اخرتها ذبانه .. والله انج رقيقه زيون .. العالم تكفخها بالمطقه و انتي كاتبه فيها بوست شاعري .. هذي مال بف باف و زوم على عينها لول

lawyer يقول...

ALZAIN ZOOOOO!!!


اشفييييج صايره محضره علوووووم


يوم دياي

و يووووووم ذباااااان






ربنا يسااامحك يا ست

U know WHO يقول...

زيووونه
هاااي

أشوه ذبانة مو زهيوي

؛)

غير معرف يقول...

انتي مجرمة


ذبانة عاد

انا هقيت فراشه ولا نحلة

عندي سؤال

من وين تييبين هالأفكار

شنو هالخيال اللي عندج

انتي مو طبيعية

;)

ReLaaaX يقول...

يحليلها كل هذا بالذبانه ؟



دااااااااشه اسلم عليج :*

الزين يقول...

بنت الشامية

يا صباح الغلا كله بعد قلبي

يا حياتي لا تقارنين
كل وحده منا لها خطها ونكهتها
انتي الطيب كله
وريحة الكويت واهلها
وانا وحده ما عندي الا اشطح بخيالي
وصدقيني انا لين بغيت اكسر المود ادش عندج استمتع بسويلفاتج الحلوة

وبعدين لكل منا جانب مشرق وجميل
محد يقدر ينكره علينا
حتى الذبانه
:)))

حتى انا حبيتها

والله لا يحرمنا من زياراج يالشيخه

دمت بكل الخير

الزين يقول...

لا رينا

يا حيااااتي
وش هالغيبة

وحشتييييييني موت

:**

واعرفج تحبيني وماراح تضربيني

:)))


وان شاء الله دوم هالضحكة يارب

لا تطولين الغياب

الزين يقول...

الخيلاء

:)))

تمونين تموووونين

شوفي سبحانه ربي ما خلقها عشان الأذية بس

دوري على الجانب المشرق من وجودها بحياتنا

@@

نجمة قالت لي نوبه انها تتامل بكل شي وتكتشف شكثر العالم حولنا جميييييل

تصدقين كلامها صح
حتى الذبانه قدرت اشوف فيها ناحية جمالية
يمكن من وجهة نظرها
اقصد الذبااانه

:))

بس ساعات تصير حد الدوسه مليقه وما يبيلها الا بف باااف

الزين يقول...

لوير

لوووووووووووووووول

فطيم خلصت المواضيييييع

شسوي
ما لقيت الا الذبانه

:)))))

الزين يقول...

U know who

هاياااات بعدي انتي

ليش تستبعدين اكتب عن الزهيوي

اسويها عاااادي

:)

الزين يقول...

غير معرف

شكرااا شكرااا

انقالت لي من قبل

:))

نشكر لكم تفاعلكم مع الموضوع

وهالأفكار انا ما اييبها اهي اللي تييني

:)

وحياك\حياج الله

الزين يقول...

ريلاكس

يسلم عمرج من الشر يارب


وشفتي شلون ذبانتي كلاس

:)

وينج ليش غطيتي
ابي اعرف اخبارج

:*

Corpse Bride يقول...

شقول عنج؟؟

غير ان الزين تخلي كل شي بعيونه ازين من الزين..

حتى لو كان ..

ذبان؟!!

صباحج جوري..

:**

ذبانة يقول...

الزين



الذبانة هذه هي خلقة ربك , فهو لم يخلقها عبث او لتؤذي الاخرين .. انما خُلِقت ليبتلي الله الناس الصالحين و الذين يحبهم بما فيهم هي ..!

لأن الله لم يخلقنا عبث , بل ليختبرنا .

الحياة هي ملك الله وهو الذي يقرر ما يشاء .

هي سعيدة كونها خُلقت ذبانة لأنه قدر الله وهي لم تعترض عليه لهذا السبب هي سعيدة لانها لم تعترض على مشيئة الله.. يعني نجحت في الاختبار ..

قد تموت خلال اسبوع .. لكن لها مكافأة كبرى في الاخرة لأنها سامحت الصرصور الذي أكل أطفالها والذي قام بتوزيع لحم أطفالها على بقية الصراصير ! ولم ترد الاساءة بمثلها بل تدعو الله أن يغفر للصراصير و أن لا يتأذي أطفالهم مثلما حدث لاطفالها وهكذا نجحت بالاختبار بامتياز مع مرتبة الشرف ..

وليس الصرصور فقط بل سامحت كل من أساء اليها و سيسيء لها بالمستقبل لأنها انتصرت على ذاتها وهو النصر الحقيقي



الله يحب الجميع

حتى الذباب و الصراصير فهو خالقهم


* هامش : كتاباتك رائعة وموزونة ومترابطة مما ينم عن عقل متزن وراجح وذكي

فاشكري الله على النعم التي انعمها عليكي

وسلام

الذبانة التي حولها الله الى ملائكة يقول...

ولا قلتي حق عمرج ياربي من وين هالذبانة يايبة هالثقة

!!

هي مجرد تساؤلات ومحاولة لرسم عالم الذبانة الخاااص جدا

وسلامتج وتعيشين

1.6.09
-----------------------

الظروف هي التي زرعت بها هذه الثقة وهذه القوة .. ومحبة الله ايضا


لن تشهدي موت الذبانة بل سوف تشهدين التجدد الذي حل و سيحل بها لأنها عبدة لله و ليست عبدة للبشر ..

هي غفرت لمن أخطأ في حقها , إذن هذا معناه أن ربها وخالقها قد غفر لها هي ايضا أخطائها في حق غيرها خصوصا بعد أن نالت جزائها .. لهذا السبب لم يمحيها من الوجود بل سوف يرفعها لتحكم الأرض

الله هو الذي يقرر وقت العقاب ووقت رفعه وليس البشر .

أنتي ترينها ذبابة بشعة .. لكن الله يراها أجمل الخلق وأطهرهم لأنها نشرت الحب والسلام لأجله .

الزين يقول...

ذبانة

مشكوره على التعليق

بس ذبانة وسامحت!!

:)

انتي خيالج طلع العن من خيالي

سويتي لها قصة يا حليلج

سعيدة بمرورج عزيزتي

الزين يقول...

الذبانة التي حولها الله الى ملائكة

:)


أنتي ترينها ذبابة بشعة .. لكن الله يراها أجمل الخلق وأطهرهم لأنها نشرت الحب والسلام لأجله .

:)))


يا حلوج
عجبني تعليقج

عليج خيال عجييييييب

حبيبتي حياج الله
اسعدني تواجدج

جداً