.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

17.8.08

سوالف نص الليل






بعد يوم طويل ... يغزوه حر الصيف ... وتتزاحم فيه الأفكار ... قلق ما قبل السفر ... ترقب ... وانتظار يوم الرحيل
يقبل المساء مزاحما تعبي ... مقتحما ضوضاء يومي ... مكتسحا نغمات أدمنت سماعها مؤخرا...

استلقي هناك ... مخدتي باردة منعشه تدعوني للنوم ولكن هيهات ... صوت الشارع القريب ... وسكون الوجد في السماء .... وانعكاس صداه هنا في صدري .....

أبي أنام ..... أبي أنام ... ليش النوم دايما يعاندني!!

أشعل الأباجورة ... ابحث عن كتاب معين ابتدأته ولم انهيه قط ... ابتدئ من حيث وقفت
صفحة واحده ...

استريييييح .... انطقها بكل حنق

احتياجنا للصحبة عندما تخلد السماء للنوم أحيانا يكون ملح ومتعب ... ويني طول النهار ما سولفت ... منو صاحي لي الحين ... وباجر دوام ... والناس نيام ..... نامي إنتي بعد يا بنية .... أخاطب نفسي

أطفئ الأباجور ...

اهي الأفكار موجودة .. المؤلم والمبكي منها يسبق المفرح ... والمخ أصلا شغال من غير هوادة .... أحس فيه مثل الدينامو ... بلش يدخن كثر ما يفتر ويتصفح كل الدفاتر

وعشان اقدر اهدي وقع هالأفكار ... وأغير اتجاهها كان لازم أفكر بشي بعيد عن ما يؤرقني ويتعب مخدتي ويرهقها من كثر ما اعدل وضعها

وعلى أول منحني طقيت فوق تحت ورجعت مع أفكاري لتساؤلات طفولية جدا ... أشياء جدا مضحكة بس تصدقون صج أبي اعرف جوابها رغم سخافة السؤال



مثلا ... كنت أتساءل باباي ... منو فينا ما يعرف باباي ... زوجته زيتونه صح .. Olive ... شحبت فية؟؟؟ شنو شافت فيه ... ياربي ريال جيكر حده مده ... جسمه ضئيل ومذارعه تخرع .. وويهه عوي ... استغفر الله ... حتى صوته مزنجر ... وعين عوره وعين صحيحة ... and he function only if he eats spinach @@ انزيييين !!! على شنو حبته؟؟؟؟ عشان يعني اهو الطيب وبروتس عشان سمين ومو حالق لحيتة يصير اهو الشرير !!!!


نقلب الصفحة ..........


السندباد البحري ... تذكرونه ..... اوكي .... ليش كان قصير ومدربح .... ليش؟؟؟ وطول الحلقات ما كبر ولا طال ولا تغيرت ملامحه مع إن رحلته استمرت سنوات @@ تهقون عنده مشكلة هرمونات!!

انزين ... ليش على بابا أحلى منه وأوسم .... شزينه مع القذلة اللي على جنب ... وهذاك الطول والزول الحلو ... لاحظوا بس آنا قاعدة أتغزل فيه ..... بيني وبينكم بذاك الزمان أول ما بلشت أتابعه أغرمت فيه وكله على بالي لين كبرت بتزوج واحد يشبه على بابا ... Oh My GOD حدي كنت خواره


هم نقلب الصفحه............


بوكاهانتس ... شفيها مشفحه ... من شافت واحد أشقر حمر عطر حبته رغم اختلاف الثقافات والعقيدة ...ولا مو جذيه ... ربعه طايحين تذبح بقبيلتها ... واكتسحوا قريتهم .... وكانوا ينظرون لهم على أساس إنهم متخلفين ووثنيين .... يعني بوكاهانتس حبت واحد تحت ظروف الغزو الغاشم ... واحد من الناس اللي غازينهم ... افاااا يا بوكا ... ما كان العشم ....من صجي .. الحين اهي وثنية شلون تحب مسيحي يعني اتصور هذا كفر بالنسبة حق ايمانياتهم .... (ادري خوارة ) والأدهى إنه يايهم من بره الديرة لااااا وبالنسبه لهم مو أصيل .... طبعا هذا لو قسناها على حسب المجتمع الكويتي ..... طاااااااف من قلب


اللي بعده .............


ليتل ميرميد اللي اهي حورية البحر .... آنا حدي مستغربة منها .... تخاطر بكل شي .. وتتخلى عن عالمها بكبره ... رغم حكارة أبوها ... وشدته .... الا إنها تقع بالحب وتبيع الأولي والتالي عشان حبيبها ... وتتنازل عن صوتها للساحرة ... اهي كانت ساحرة صح؟؟؟؟....... المهم تتنازل عن صوتها عشان الساحرة تبدل ذيلها بريول يا عوينتي ... يعني تصير آدمية مو سمجه ... وتالي عقب ما ياخذها الأمير ما تقول له إنها تحبه؟؟؟؟ هل كيف !!!!

انزين ما عندج صوت ... تعلمي لغة الإشارة وقولي له ... تعلمي الكتابة ... ما صار قولي له على غرار الأفلام الأمريكية ... حرام وانتي من أسرة محافظة وتخافين الله... خليها على غرار الأفلام المصرية ... وصيري له دينا ... هههههه......هم عيب ... خلج مثل هيفا وغني له الواوااا ... وحتى لو ما حبج بتصيرين غنية من وراه
استغفر الله ... جني قمت اخوره


من قلب اللي بعده ............

قطرة الندى .... شسالفتها مع التفاحه ... كانت يوعانة تهقون ... وليش تفاحه بالذات ... ليش مو خوخة مثلا ... أو مانجا ... من صجي ... ياربي التفاح ما يغرى حتى طعمة يعني مو الواااو ......... تهقون الموضوع له دخل بورث أمنا حوا ... مو يقولون إنها قصت على آدم وخلته يقطف لها تفاحه من شجرة بالجنة ... طبعا هذي النسخة المشكوك فيها من الرواية ... بس هم كانت التفاحه لها دخل ... وليش دائما اغراءات الحياة تتمثل بتفاحه ... وحمرة بعد ... انزين ليش مو تفاحة صفرة ... او حتى خضرة ؟؟؟؟ و شنو دخل اللون الأحمر بالموضوع .. ليش كل شي احمر ننتبه له ... شنو تأثير اللون الأحمر علينا؟؟

الموضوع يبي له بحث وعلى فضاوة راح اكتب عن تأثير الألوان على كيميائية الجسم لأن الموضوع جدا مشوق


قلبوا الصفحة ...............

الشهير توم والحبيب جيري


الحين احنا بحياتنا الواقعية ما نحب الفيران ولا ندانيهم صح ... عيل ليش نتعاطف مع جيري ونكره توم إذا صاده أو أذاه ... مع إن بالحياة الحقيقة نحط للفيران سم ... ومصايد ... واقرب شي إذا كان الفار صغير ... وشوووووووووو بالنعال وانتوا بكرامة ... شنو هالتناقض بالتفكير والمشاعر ... يا نحبهم يا ما نحبهم ... يعني ما يصير نكرهم بحياتنا الواقعية ونحبهم بالكارتونز
كلش ماكو سالفة




نوصل لآخر صفحة عشان شكلي بلشت أخدر .. والنوم قاعد يهاجم صحوتي بكل شراسه

سندريلا .... اييييه ... هالقصة حلم كل بنت صغيرة ... كلنا نبي الأمير يحبنا بلحظة مملوءة بالسحر ... وندخل الحفلة بفستان من تصميم أشهر عروض الأزياء الفرنسية ... والأمير ما يشوف احد غيرنا ... وكلنا نبي قصة الحب تنتهي نهاية سعيدة ... عرس بالراية ... وكوشه مسوينها لنا في بيروت .. والكاكاو يايبينه من بلجيكا والبدلة مصممها ايلي صعب ... والشبكه من لازوردي ... والمعرس صناعة كويتية!!! ... انزين ليش الباجي كله مستورد ... بعد جان بالمره المعرس نفس الطقه .... لا صج .... نسيت ما يصير الكويتية تاخذ مو كويتي

انزين تهقون سندريلا الحين سعيدة بحياتها؟؟؟ صار عندها عيال .... خالتها أم زوجها زينة معاها لو مراويتها نجوم السما ... وكل ما عطتها ظهرها قال ويييه مالت عليج سليمة صكتج ... لكن ما الومج ... الوم هال........... ولدي اللي اخذج @@ ... آنا ادري ... كله من السحور والطبوب

ترى اهي صج سحرت له ... تذكروا القصة !!!!

تهقون أول هوشة صارت بينها وبين الأمير شنو صار بينهم ...... همممم ....شنو قال لها لما قص بالسالفة وراحت السكرة ويت الفكرة ......الشرهه علي آنا اللي اخذتج .... ولا إنتي وين وآنا وين... حمدي ربج عقب ما كنتي خدامه في بيت ابوج ... سنعتج وسويتج آدمية @@ .... تبين هذا الموجود ... أمي ما تغلط على احد ولا تعيل على احد ... ما تبين الباب ياسع جمل!!!!!!




تدرون شلون


أروح أنام أحسن

السالفة قلبت بغم



سلام

P.S
:) Dear Ben
HaPpY BiRtHdaY 2 U
Wish U LONG
HAPPY
HEALTHY
WEALTH Y
LIFE
18/08



هناك 54 تعليقًا:

SolaimaN يقول...

اهم شخصيه نسيتيها !!!

:(

Barrak يقول...

اللحين ماخليتي احد ماطريتيه

ونسيتي فلونه


حرام عليج

7osen يقول...

ابي اعلق على بوكاهانتس

حبته لأن الحب مافي له قانون معين واذا وصل مافي اي شي بالدنيا يمنعه

------

وسندرلا أنا شفتها اهي والملك بعد جم سنه من السلفة
كان عندهم عيال حلوووين واايد وبعده حبهم مثل ما شافها اول مره
وكانت معاهم ام الملك كانت تعتبر سندرلا نفس بنتها ويحبون بعض وااايد وعايشين بسلام وبحب
والملك قال راح اظل احب سندرلا ليما اموت

:)

LonDonY يقول...

looooooool
loooooooooooool

مشكلـة المبدع ان

حتى في هذيانه.. يكون مبدددع

يازت لـــــي الفكرررة حيييل!


بطبقهاااااا


الليلة الليلة لووول

نون النساء يقول...

صح ليش ماطريتيها" فلونه "

جازورا من شو بيشكي ؟؟ :P

انا كنت احبه مع انه ديناصور وعنده دويحه بعينه هههههههههههههههههههه



ذكرتيني يوم كان عمري 13 سنه كنت اطيح بحب الريوم المتحركه حبيت شخصية اسمها روبن هود ومن صجي كنت اتمنى اصير باباي عشان اتزوجه....

شكووووووووووووو



ادري بره الموضوع

الزين يقول...

سليمان

نسيت @@

منو؟؟؟؟

الزين يقول...

براك

يا صبااااااح الخير

ليتني طارية مليون

مع انك احسن من المليون بترليون مره

:)

فلونه همممممم

ما طرت على بالي البارحه

بس هم زينه ونحول ما طروا علي
وجراندايزر

وناس وايد

شلون

احطهم في بوست بروحهم يعني

هههههههههه

صباحك اطيب من الطيب يالشيخ

الزين يقول...

حسين

اهم شي انت عايش الدور معاي وقاعد تحلل

هههههههههه

انزين اذا شفت سندريلا سلم عليها وايد

وقول لها تسلفني جوتيها؟؟؟

الزين يقول...

لندني

:)

طبقها وعلمني عن النتايج

مبهرة لو لأ

:))

صباحك خير يارب

الزين يقول...

نوووون

ابيييه

شفيكم على فلونه

مع ان صوتها وصواصه وساعات تتفلسف

يعني ما كانت وايد تيوز لي

ههههههههههه

يعني مو انا بروحي اللي انغرم بشخصية كرتونية

اشوه طلعت طبيعية

:**

صباحج سكر يا سكر

Amphibious يقول...

البوست عجيب ولا سندباد المدربح
صج بطل قصير و مدربح :))

وعلشان البرك :


هذه الحكاية..احلى حكاية
عن بنت حلوة ...
اسمها فلونة .. فلونة اللطيفة
ما احلى .. ما احلى فلونة
فلونة يا احلى وردة
وردة جميلة متفتحة

Amphibious يقول...

البوست عجيب ولا المدربح
صج سندباد بطل قصير ومدربح :))


وعلشان البرك :




هذه الحكاية..احلى حكاية
عن بنت حلوة ...
اسمها فلونة .. فلونة اللطيفة
ما احلى .. ما احلى فلونة
فلونة يا احلى وردة
وردة جميلة متفتحة

نون النساء يقول...

مو عن شي ولا عشان احبها وايد هالشخصيه
بس لان يعيبون علي انا وياها منمشين

x_x

الزين يقول...

نووون

Oh My God

U’ve got freckles

ههههههههه

اكيد عيل انتي حلوة

ما عليج منهم

:**

أبو لطيف يقول...

بين المأساة والملهاة

نختار الملهاة

ذكرتيني بقبل ..... سنة

كنا لما نخلص من الغدا
نحل الواجبات بسرعة

ويبقى وقت على ما يفتح التلفزيزن ويحطون اول شي :

السلام الاميري ( كان اسمه الاميري قبل ما يتغير للحالي ) تذكرونه ؟

وراه القران الكريم

ما فينا صبر

نروح نلعب بالحوش او بالسكة
ونخلي وحده من البنات عند التلفزيون

ونقولها اذا خلص القران ... نادينا

استغفرك الله ... يهال ما كنا نفهم هههه

زمن وعدى
كانت النفوس طاهرة نقية

............

جزاج الله خير

ابدعتي

lawyer يقول...

واي انا مو مثلج كلش

يوم اني كنت صغيره كلا احلم في سالي و الخدم الي ينطون عليها و يحطون لها هذاك العشا الي يهببببببببل

الظاهر امي اتنومني يوعانه

ويوووووووووم كبرت مافككر في هالبراءه كلش

:pPp

DiLLi O MiLLi يقول...

أأأأألحيييييييييين !!
أأأبي أنااام .. وشلووون النوووم يعااااندني !!!
خــررررعتييييني ..
قلت : لاحووووو !! هالبنت مووو مترقععععه !!! ماااأدري أشفييهااااا هالأياااام ؟؟؟!! كلــه ضــاااايق خلقهاااا ؟؟!!
عبــــاااالي عنــــدج ســاااالفه !!!


طلعتي ســــهراااانه عشــــااان "ميكيماوساااات" الطـــفوله !!!!

يااااالله قلــــبي ويهـــج !!
:)


وبععععدييين أشـــدعووه Olive الموت الحمر !!؟؟ شــــييييييفه !!! مع كُبتها .. وشقة حلجها اللي من أذن ليه أذن !!؟؟
تـــرا ماااا أرضى على باباي


:**

الزين يقول...

ak-47

بذمتك مو مدربح
كلش يعني ما يناسب لدور البطوله

:))))

ومنا لبراك

شعليك يغنون لك

الزين يقول...

لوير

يعني ما عندج شخصية كارتونية انبرهتي فيها؟؟؟

الزين يقول...

ابو لطيف

براءة الطفوله
وراحة البال
وبساطة الأمور بعيونا

يا من يرد طفل بس يوم واحد

تنهيده من اقصى القلب

:)

مشكور يالشيخ

الزين يقول...

ديلي

لووووووووووووووووووووول

:)))))))))

قلبته خلاص

يغربل ابليسج

ذبحتيني ضحك
قاعدة بالمكتب اكركرك


اهاااا
الحين انتي طلعتي من ربع باباي

خلاص عرفت

:****

يازين دخلتج علي اليوم

وربي فرحتني

هذيان يقول...

وحشتيني


هالسوالف نص الليل قبل السفر أعرفها افا عليج بديت أشك فيج مراقبتني ؟؟؟
الحل عندي يا الزين

هالسوالف قمتيها بسفره تجعلين جيش السوالف يجر أذيال الهزيمة بعدها ؟؟؟

أسأل مجرب

:))))))))

why me يقول...

مساء الخير
مساء الورد زيوون



القصص عجيبه بس جنج نسيتي سالي
شنو هدفي من سالي ان انشالله تالي يصير نفس سالي اللي نهايتها عجيبه



وسندريلا اتظل خيال .. حسرتنا ابي اصير سندريلا شلووووووووون !!





التوقيع

لا للعنصريه

;p

ReLaaaX يقول...

احلىىىىى شي ساندريلا ..


وبعدين الاحداث على حسب جنسية كل واحد فيهم واخذي عاد شيصير ..

اكيد بتفرق المعامله يعني لو كانت لا سمح الله ساندريلا ( نور ) وريلها كويتي غير عن ( رقية ) :p


ترى القياس هذا يختلف باختلاف الهبة ;)


--


وووو عندج السنافر كانو مسببين لي ارق لأني لما اقوم الصبح اشوف يلدي شنو لونه ! لأن يسموني سنفوره :/


وبيوتي آند ذي بيست .. حسبي الله على المؤلف لأن هم سبب لي أزمه نفسيه واجيك على القفااااااااش والقواري اللي في بيتنا لييييييييش يعني ليييييييييييييييش



احم بس وايد انفعلت ^_^

miss you zozo

J Daily يقول...

الحب عمي

و توم & جيري
الالفة بسيطة لان نشوف جيري طيب وعلى نياته بس يبي اكل ويرجع مكانة
اما توم شيطان كبير ((:
واحلام سعيدة

3bady يقول...

خيال عجيب :)

تراب الكويت يقول...

مساء الورد

:$ سوري على القصور حبوبة



لا تنسين جودي ابوت اوكي

:)

سي يو سووووووووووون

بايات

Shather يقول...

hehe mish ya mish ya :***

its been long time HUN


قصه ادم و حوا هذي فيها علامه استفهام كبيره و ما كنت اتوقع انها تفاحه او شي من هالقبيل و الله اعلم
:\


و توم و جيري ما عمري حبيت جيري اصلا يبط جبدي :P
اتعاطف مع توم المقرود اللي وين ما يطقها عويه :(


و ليل ميرميد .. هذي امنيه طفولتي ^-^
القصه الاكثر اثاره كانت لي ايام الطفوله و البراءه تليها قصه علاء الدين بلا منازع

ذكرتيني بالحب القديم :P
Alladdin

*blushs*

أبو لطيف يقول...

عزيزتي

اردتها ملهاة
وابيتي الا ان تكون ماساة

قرات السطور
وجذبتيني الى ما بينها

فلك ما تشائين

تنهيده من اقصى القلب
......................

الصمت يئن ... في صدري

وأضواءالظلمة ... توحشني


أفكاري فيني تزاحمني

لحظات رحيلي ... تؤرقني


أأنا ذاهبة للمجهول

أم هو قد جاء ... ليخطفني


أأخاطب نفسي قائلة...

تيهي يا نفسي وانشغلي


أم إني انتظر المأمول

فحبيبي حتما ... سيسرقني

آه يا طفلة تسكنني

لحظات ثم تغادرني


تيهي في قلبي وانتظري

قلبي في الغد سيغادرني

kuwaitawy يقول...

هههههههه

سوالف تال الليل




بس اتصدقين؟؟؟؟
صج احنا ليش نتعاطف مع جيري مع ان بالحقيقه نحطله سم ومانحبه


هالسؤال يسمونه

السهل الممتنع

محـــــارة يقول...

أستانست حدي وانا اقرأ ماعرف كل الحزايات بس استمتع حيل

سندريلا هذي قصتي كله أتخيل أكون سندريلا أعشق رزانتها وأتمنى جمالها وعشق الأمير لها ونهاية قصتها ممتعه لأن دائما نحلم بالنهاية الرائعه

تهقون أكو امير بدنيتنا انقلبوا لأسود ولا أمير بس بو طقه

يأختج انا أبي مثل يحيا بس محلقين شواربه وبنفس رجولته بس بنفس الوقت دامي متمنيه متمنيه يصير أصير مثل لميس ورقتها

ويه أنا ضيعت الدرب مثلج .. سلام يالغاليه مشتاقتلج مووووت

ray يقول...

كل شي ولا باباي

مسكين مايترقع صاجة :P

بس طيب

Najmah يقول...

مساااء الخيرات

ابيه تدرين سهرتج ونيسة:)

انا كل يوم هذي حالتي

قبل لا انام راسي يعورني من الافكار

اللي ودي ابجي واقول خلااااااااااص
خلااااااااااااص


كنت ماحب بباي
ولا سندبااد
ولا توم وجيري

احب سندريلا
واحب واايد ليدي ليدي
واحب لحن الحياااة
كله اتخيل نفسي فيهم

وسالي كنت مااااحبها
كل مااشوفها اعصب ليش ماتتكلم
وتدافع عن نفسها
ومن صجي اتحلطم ليش ترضى وتسمع كلام آنسة مينشن

من صغري متمردة
:P

. . . ساخر كويتي يقول...

ماشاء الله عليج كتبتي ملاحظات خاصة بشخصيات حفظناها
و عشنا معاها طول عمرنا

وبيني وبينك عمري ما فكرت بهذه المتناقضات

ولكن المشكلة ان اغلبيتها صحيحة

من ناحية ثانية
اذا موضوع الارق حقيقي معاج
فتعوذي من ابليس وانصحك بقراءة القران الكريم فهو خير معين ومبعد لكل هواجس الشيطان الرجيم


قراءة اواخر سورة البقرة ينصحون فيها قبل النوم مع المعوذات واية الكرسي

تحياتي

أتيت متاخرة يقول...

الزين :
حسبي الله على ابليسج
من قريته وآنه أفكر في المدعوة سندريلا

:
:
خالتها أم زوجها زينة معاها لو مراويتها نجوم السما ... وكل ما عطتها ظهرها قال ويييه مالت عليج سليمة صكتج ... لكن ما الومج ... الوم هال........... ولدي اللي اخذج @@ ... آنا ادري ... كله من السحور والطبوب
:
:

مسكينة لو خالتها طلعت جذية
قلنا افتكت من مرت ابوها طلعت خالتها !!!!!!

charisma يقول...

خوش بوست قبل لا انام
مت ضحك على سندرلالا :))))

جنج يمى اتحازينى ترى صج دخت ويتنى النومه :**

تصبحين على خير

Kuw_Son يقول...

انتي حدج خايرته ههههههه :)

صج للحين أشوف كارتونز بس ما افكر فيهم قبل النوم !

الزين يقول...

هذيان

:)))

وانا اقول شنونتشابه فيه

تصدقين وربي اونس شي

وبقمتها عن قريب
الخميس الفجر طايرة

وتييج العلوم تالي

:**

انتي وحشتيني اكثر

الزين يقول...

واي مي

صباح الخير والعنصرية

:)

يختج انا ما احب المدبلج كلش
اصواتهم مدري شلون
والموسيقى مولية
والرسومات تلوع الجبد

وخلاص سامحتج
والنعم في اللي كتبتي عنهم
بس ترى نسيتي ناس وايد
ناس تستحق ان تكون من ضمن القائمة
بالنهايه هذا رايي

:*

مشكوره على سعة صدرج

الزين يقول...

ريلاكس

هلااااااااااااااااا

من وين طالعة

:**

اشتقنا لج وايد

سالفة السنافر ضحكتني
:))

Missed U 2 baby

:**

الزين يقول...

يعقوبووو

تبي الصج
اثنينهم شياطين

:)

منورنا اليوم

الزين يقول...

عبادي

:)

مشكور يالشيخ

الزين يقول...

تراب

جودي ابوت

همممم

بايات

hope 2 chatt with u soon

:**

الزين يقول...

شذر

@@

غيابج كان غريب
لعل المانع خير

طلعنا تستهوينا نفس الشخصيات
ولنا نفس الذوق

غريبة!!

ما اعتقد غريبة
صح لو انا غلطانة

:)

الزين يقول...

ابو لطيف

تدفق جميل

شكرا لك

:)

الزين يقول...

كويتاوي

رحت باتمان الأخير

انا ليش حبيت الجوكر
@@

يمكن عشان الممثل كاسر خاطر لأن مات
او يمكن لأني احب الشريرين

@@

ماني صاحية

:)

الزين يقول...

محارة

ماكو امراء

خلص عندهم

الحين في متسلقين وممثلين ومدعين ومزيفين

غسلي ايدج

:)

قمة بالإحبااااااااااااط

حدي

الزين يقول...

ريووو

ايه طيب بس جيكر

ومع هذا حبيناه

:**

منورتني

الزين يقول...

نجمة

انتي انتقائية حيل

ما احب

وما احب

وماااااااا احب

ليش ياحافظ

كلها شخصيات كرتوينة

حبي يا ماما حبي

:)

ترى الحب وناسه

اشششششش

انا اقصد حب الشخصيات الكرتونية
شوفي لج واحد منهم وحبيه

:**

الزين يقول...

ساخر كويتي

مشكور على النصيحة وبيني وبينك انا ماشية على ورد ما اتركه

الكرسي والمعوذات
ثم الإستغفار

واحيانا اذا ما كنت تعبانه حدي اقرا ياسين

:)

الزين يقول...

اتيت متأخرة

:)

حدها مسكينة

وما تأخرتي
تو الناس
نضيفج ونحطج بعيونا

مشكوره على المرور
ولا تباعدين

الزين يقول...

كاريزما

خوش صورة على فكرة
واهم شي اني ساعدتج تنامين

:**

الزين يقول...

كويت سن

خايرته اخيتك حد الدوسه يا خالد

شكلي يبي لي علاج كرتوني

:)))

لؤلؤة يقول...

الزين وين هايدي !!!
عدنان ولينا !!!
بس عجبتيني يوم نتفتي بوكا..ايه مسودة الويه ماتفتهم :)
تسلمين يا الزين...