.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

7.8.08

الباحثات عن الحب



(1)

تختنق بعبرات محبوسة وهي تحكي لصاحبتها أحداث البارحة

هي : أقول له ياييني خطاب ... عيزت وآنا اردد .. وأهلي ملعوزيني تصوري يقول لي شتبيني أسوي
أنا : حلفي .... هذا شفيه ين!!!!
هي : مادري .. والله مادري ... اهو صار له مدة متغير ويتلكك على أي سبب عشان يزعل
أنا : وشقلتي له؟
هي : قلت له مالي عذر أرد اللي ياي هالمرة ... ما فيه عيب
أنا : انزين؟؟؟؟
هي : تصوري يقول لي لا تردينه ... خمس سنين حب ... ويقول لي لا تردينه ... اللي ذبحني تدرين شيقول لي
أنا : شقال ؟
هي : لعبي غيرها ... إنتي تبين ايي أتقدم لج الحين ... خلج صريحه ليش تسوين لي تمثيليات .. وبعدين آنا كنت واضح معاج من البداية ... انسي سالفة الزواج
أنا : أيا السفلة
هي : نوووو ... لا تسبينه ... آنا مو قاعدة أقول لج عشان تسبينه ... أبيج تشورين علي شسوي؟؟
أنا : شتسوين ... إنتي يبي لج كف عشان توتعين .... حبي ... هذا بايع ... روحي للي شاريج .. من صجج متأملة فيه لما الحين ... هذا تعطينه قفاج وتمشين والقلب داعي عليه مو له
هي : يعني شنو؟
أنا : يعني شنو .... لما الحين تسئلين يعني شنو.... تركيه وجنه العيد ... ووافقي على الخطوبة خصوصا إن الولد اللي يايج زين .... وصدقيني الله بيعوضج

.........
تقفل الخط .... تتحرر دمعة كانت أسيرة قلبها المكسور ... انتهى



(2)


كان لقاءهم صدفة بين أروقة الكلية
زملاء بالكلاس ... صداقة تتوطد .. ثم ............... مشاعر وانجذاب لا يقاوم
تبتدي قصة حب ملونة بالكثير من الأحلام

هي : يمه الله يخليج كلمي أبوي ... آنا أبيه ... أبيه ... واهو يبيني ... من يفكر الحين تفكيركم
الأم : يا يمه يا حبيبتي ادري الولد زين بس يا أمي لا هو من مواخيذنا ولا إحنا من مواخذيهم
هي : ليش ... ليش .... عشان الأصل .... شيللي يفرق ... اهو ولد متربي صح ... وانتى قلتيها إن خوش ريال
الأم : والمذهب .... شلون شنقول حق الناس بنتنا خذت واحد لاهو من مواخيذنا ولا من مذهبنا
هي : ستفرق؟؟؟؟
الأم : تفرق ... باجر عيالج يطلعون عليهم ... وما تقدرين تمنعين هالشي
هي : وشفيهم اهم .. مو كلنا نوحد الله شتفرق
الأم : تفرق وايد ... إنتي تبين تذبحين ابوج بقصتج ... خلاص الموضوع انتهى وإحنا عطينا الناس ردنا
هي : يعني تكسرون قلبي عشان كلام الناس
الأم : باجر تنسين واييج ولد الحلال اللي يطيب خاطرج ... وبس عاد بلا خرابيط
هي : بس آنا أبيه اهو ما أبي غيره
الأم : شيلي الموضوع من راسج خلاص هالولد ما تاخذينه... وابوج ما ثناها .. لا تفتحين علينا بيبان مسكرة

تتركها وتخرج
تنظر من الشباك
إنه الخريف ... فصل تساقط الأوراق
فهل تسقط ورقتها معه



(3)


لازالت طرحة الفرح ملقاة هناك ... وكحل البارحه موشح هنا على أطراف مخدتها

هي : شقول حق أهلي .. شلون ارجع لهم بعد أول ليله شلون اكسر فرحتهم
هو : لا تقولين ... تقدرين تضلين معاي لما تقررين انج بتمشين ماراح امنعج
هي : وشقول لهم ... شنو السبب؟؟؟؟
هو : هذا شي راجع لج .... بس حطي في بالج اللي بتقولينه ممكن أنكره وأحط العيب فيج
هي : ليش أخذتني ... ليش آنا
هو : أهلي اللي اختاروج مو آنا... ويدرون فيني آنا مو صوب الحريم
هي : وآنا شذنبي .... اهلك يدرون فيك وبسوالفك ليش يبلوني فيك
هو : حفظي لسانج لو سمحتي ... وأحسن لج لا نبلش بالغلط

تلملم أطراف كرامتها المهانة وبعثرة أحلامها المهشمة
وثلة من الثياب كانت ........ لعروس


(4)


ترتعش أوصالها كلما تذكرت إن ما يفصلها عنه مجرد لحظات حتى تصل هناك
تدندن مع أصيل

إيه احبك .. هذا حظي اللي انكتب .. دربي اللي أمشيه وادري به صعب

تقف عند الإشارة وتسرح لتغرق بحديث كان يوما نقطة التحول بحياتها .......

هو : آنا ما بغيت اخش عنج ... وصدقيني ... ما كان قصدي اخش عنج ... كل شي صار بسرعة .. ولقيت نفسي منجرف معاج بمشاعر ما قدرت أقاومها
هي : متزوج؟؟؟ ليش ... ليش عيل من البداية ليش؟؟
هو : ما كنت ادري إن إحنا بنوصل هنيه .... ماكنت ادري
هي : يعني آنا المرأة الثانية الحين ... آنا خربت بيت وحده مالها ذنب
هو : لا تقولين جذيه ... اهي ما نقصها شي ... آنا اللي كان ناقصني وانتي ييتي وترستي علي دنيتي
هي : عندك عيال؟؟
هو : ايه
هي : يالله .... ليش ليش ليش
هو : لأني حبيتج .... فلانه .... آنا مو مرتاح بحياتي
هي : وآنا اللي بريحك!!!!!
هو : لا تصيرين قاسية علي
هي : إنت لا تصير قاسي علي وتطلب مني إني أرضى بوضع مثل هذا......إنت ياي تقول لي بعد ما تعلقت فيك ... بعد ما بلشت أشوف الدنيا بعيونك ... بعد ما صار يومي يدور حولك ... شعقبه ياي تقول لي
هو : سامحيني ... ما عندي عذر ... حقج علي ... واللي تقررينه آنا راضي فيه ... ولا تعتقدين انج ما تهميني ... إنتي تعنين لي الكثير
هي : احتاج أفكر ... احتاج أفكر ... آنا ماشية

تتركه ... مجترة الكثير من خيبات الأمل والإحساس بالذنب وفداحة الحدث
سنه .. ثم الأخرى ... ولازلت هناك متواجدة بزاوية مظلمة من زوايا حياته
لين متى؟ .... حياتي وينها ؟... شنو أخذت من هذا كله ؟؟؟؟
يرن الموبايل... هو على الخط ...
الإشارة خضرة
يرن الموبايل مرة آخرى

.................

الموبايل مغلق او خارج منطقة التغطية حاول الإتصال في وقت لاحق

......

تدخل غرفتها تجلس على أرض الغرفة .....

خلاص ما اقدر

انتهى




هناك 76 تعليقًا:

why me يقول...

الزين

بأخر قصة دستي على الجرح ... عاد فهميني

:(

غير معرف يقول...

خوش حوش؟ ههههههههههه هذا الاسم اللي طلع معاي

انا باعلق عن اللي قبل الاخيرة
اشلون البنت تتزوج من غير ماتسال عن ادق تفاصيل حياته؟
يا اما الاهل يغصبون، او ان الزمن والظروف تحتم عليها الاستعجال، صج شي يضيق الخلق استغفرالله =((

اما الاولانية فيا كثرهم، والبنت اذا ماعرفت تفرض كرامتها ماتحصلها من غيرها - الله يعين

kuwaitawy يقول...

والله مادري شقووول يالزين


لأ لأ لأ


صج انربط لساني


عدني سؤال اذا ممكن؟


هذي القصص من تأليفج وهل هي واقع ام خيال؟


اسف عالسؤال؟

فريج سعود يقول...

1
تزوجي لا تصيرين هبلة
2
اذا لهم خلق معارك وحروب بيجاهدون خل يتزوجون
3
جنس بعد شاقول عنه
4
ايييييه هذا قصته قصه وماينفع الكلام عنه بتعليق
بس اقدر اقول كلمة وحدة فقط
الله ما حط تعدد الزوجات عبط
الله حكيم
ولازم تؤمنون بحكمته

محـــــارة يقول...

زيووون بوستج حمل صدق حياة عدد من البنات للأسف

رائع كل ماسطرتيه .. افضل الكلمات اخترتيها ففندتي أجمل معانيها

القصة الرابعه هذي مرت علي وتعور القلب تفاصيلها .. والأولى هذي أغلب البنات يعانون منها .. الثالثه للأسف الله لايحطنا مكانهم بس وااايد بنات قراب لي عايشوا هالموقف المفجع

حياة البنت دوم مهما كانت شخصيتها مهما كانت مؤذيه وقاسيه تبقى هي المتأذيه

الله يعينا ماندري شلون تكون حياتنا بس الله يمنحنا السعاده بالي وهبنا إياه ويعطينا الصبر من عنده سبحانه

Amphibious يقول...

هي : لعبي غيرها ... إنتي تبين ايي أتقدم لج الحين ... خلج صريحه ليش تسوين لي تمثيليات .. وبعدين آنا كنت واضح معاج من البداية ... انسي سالفة الزواج

أنا : أيا السفلة

وايد يازتلي :)))

3bady يقول...

1-البنت لي حبت صعب تترك الي حبته .. اما الاصبي يحب اكثر من وحده ولا جنه مهتم
جذي الدنيا علمتني
2- حرام شنسوي فيه اهل ما يقتنعون الحل الافضل انها اتحن لي باجر و اتبين وجهة نظرها
3- الغلط من الاهل المفروض يسإلون عن هالولد مو يقلون بنتهم جذي بنتهم مو لعبة ولا بنات الناس
4- الانسان عنده عقل (تفكير ساعة خير من عبادة الف عام)

يعطيج العافية اختي :)

غير معرف يقول...

كالعادة.. روعة :)

القصة،
الحوار،
التفاصيل،
أحداث لا تتقنها سوى الزين.. الزين وبس ;)

7osen يقول...

اتقنتي اختيار الامثلة

كلها من واقع الحياة واايد صارت وتصير

الاولى اكثر وحدة تقهر
هالنوعية من الشباب ماعنده اي نوع من الاحساس

والبنت بعد تنلام خمس سنوات ومو عارفته عدل.

سالفة مو من مواخيذنا هذي على قد ما اهي غلط على قد ما تخضع لمقايس معينه
يعني احياناً تكون بمحلها


زيون

مبدعة

وفنانة

why me يقول...

4
ايييييه هذا قصته قصه وماينفع الكلام عنه بتعليق
بس اقدر اقول كلمة وحدة فقط
الله ما حط تعدد الزوجات عبط
الله حكيم
ولازم تؤمنون بحكمته

======================

فريج سعوووووووود


شنو تقصد هني ممكن اتوضح لنا بليز??

تعدد الزوجات لظروف معينه .. مو علشان الريال كل ما حب له وحده تزوجها



;p

elq87obi يقول...

مساء الخير الزين

كعادتج مبدعة و مميزة بكتابتج

1
اللي باعج بيعيه أدري صعب خصوصا ًإذا كانت بنت كونها تفكر بقلبها فوايد صعب عليها و الله يعين

2
قعدي حني عليهم فنرة و بعدها إذا شفتي ما في فايدة خليه الله كريم و لا تضيعين عمرج عشان أحد بالنهاية اهوه ريال و راح يقدر يلقى غيرج بس إنتي بنت و وضعج راح يكون صعب لو يتلج فرصة لا تطوفينها

3
على هالريال لا تعليق حده ؟!

4
الرياييل اللي من هالنوعية قصتهم قصة و حالتهم صعبة و مع احترامي لهم أحسهم حيل بايخين من الأساس دامك ما تحبها ليش تزوجتها ؟ زين عشان أهلك شكو تيب منها عيال ؟ بصراحة أحس هالنوعية عذر أقبح من ذنب

بالنهاية لازم الواحد فينا ما يسوي أي خطوة إلا يكون دارسها عدل و فاهم اهوه شقاعد يسوي و فاهم أهله عدل مو يعلق بنات الناس و يلعب بعواطف بنات خلق الله و يكسر قلوبهم و بعدين يقول أهلي ما يرضون و إلا فيهم و فيهم

يعطيج العافيه الزين خليتيني أطلع اللي بقلبي

و مشكورة و يعطيج ألف عافيه

بانتظار جديدج

سلامي لج :)

أبو لطيف يقول...

نشّرق او نغرّب

لسنا نحن من يختار

قد نختار ما نأكل .. ونتمكن منه

قد نختار ما نلبس .. ونتمكن منه

قد نختار اي شيء في الدنيا .. ونتمكن منه

الا الشريك ... فهو قدر مكتوب وينجلي في وقته


وهذه القصص هي الاقل ماساويه

اسال الله ان يبلغكم ويبلغكن بمرادكم ومرادكن

ويبلغني ( بالثانية ) :)

احسنت اختي الكريمة

والله المستعان

bu-saad يقول...

الزين

بوستاتج القدم...اسلوبك جدا ساحر..لج مستقبل كبير باذن الله
و مدونتج كانت محور حديثنا اليوم:)


هذي اخرت الصداقات و الحب !!


جنس!! اتفووا عليه(محشومه) وهمن يبي يقط البلى عليها حسبي الله عليه الي ما يخاف الله.. الغلط من ابوها واخوانها,,,محد يعرف الريال الا الريال من نفس جنسه..وبنظره وحده..معقوله ما لاحظوا عليه او اسمعوا عنه!!


انا اقول يا حلات زمان اول...ابنت اليوم تلعب بلعبتها و باجر عروس بيت زوجها..وهل يوجد احلى من الحب الحلال!!


الزين جوزيتي خيرا..فالقصص التي عرضتها ما هي الا نصائح

شكرا

chــاي أخضر يقول...

بـ غض النظر عن المشهد الثاني


بـ اختصار .. ذاتي .. يضع رغباته قبل حاجيات الآخرين -أو يضعهم أولا وأخيرا = الرجل


أصبتي الحقيقة .. زين

qesat_5ayal يقول...

أخرها أطيبها
وأخرها أقواها

:)

mo3ath يقول...

1- باللي مايحفظه وغلطتها 5 سنين ماعرفته وبعدين اهو معطيها الصافي من الأول يعني المفروض ماتشاوره :/

2- اكثر وضع معقد بالدنيا

3- مادي غريب شوي مع انها تصير بس حاليا لاتعليق :)

4- انا مع فريج سعود بهالنقطه بس مع شوية ضوابط علشان لاتصير السالفه سايبه

يعطيج الف عافيه ، عادة متابع صامت بس اليوم نطقت اصابعي :)

Fskra يقول...

el 3shg balwah :P
O eL zawag balwah etha kan ghla6
O el nas sa3at t9er balwah

qe9a9 7elwa o mn waq3na

thanks ya a7laa sis

Super Woman يقول...

دربي اللي امشيه وادري به صعب
ولا تعب ؟؟



مشكله اذا البنت تعلقت ما تقدر تبتعد او تنسى بسهوله
والمشكله اذا مشت على هوا قلبها ونست المستقبل القاسي اللي ينطرها

اهو يبتدي المأساة
واهي تستانس اولها
اهو يتركها بكل برود
واهي تعاني
!!

الرياييل ما يفكرون بباجر
والحريم كله مصدقينهم
ولما تيي الصجيه عادي عندهم يسوون اي شي
والحريم يتحسفون على كل لحظه كانوا وياهم


شلون صايره الدنيا ؟؟
مثل هالبوست



مبدعه زيونه

الزين يقول...

واي مي

:(

سوري حبيبتي

وفاهمتج زين

:*

صقر قريش يقول...

الأولى:

وايد تحصل والولد اذا شاف البنت جذي تفكيرها يلعب فيها لين يقول بس صج اني ريال المفروض ماقول هذا الكلام الي بقوله الي هو هالبنت يحتاج لها راشدي عود من واحد مثلي يخليها تصحصح خمس سنين ومايبي يتزوج هذا اذا تأخر عن الزواج خمس اشهر لازم ينعاف شلون على خمس سنين!! وصدقت رفيجتها اخذي الي شاريج تركي الي بايعج ومثل هالولد شنو يبطون جبدي تدرين جم مره تهاوشت ويا امثالهم مادري ليش جنه بيني وبينهم ثار:).

2:
اما هذي فآنا مع الأم بكلامها لأنهراح تنفتح ابواب
مسكره وراح تصير مشاكل مالها أول ولاتالي لاويمكن البنت تتأذى من أهل الولد والعيال وووو مشاكل كانوا في غنى عنها فليش هالعذاب كل واحد يتزوج من مذهبه احسن واريح.

3:
اما هذي جريمه مرتبكها اهل الزوج واهل الزوجة اهل الزوج ظلموا البنت مع ولدهم الي ماله خص بالحريم واخذاها إلا غصب وأهل الزوجة لأنهم ماسألوا عن وضعه وماتاكدوا من رغبته الفعلية للزواج ووايد تصير هالأمور للأسف.

4:

يحبها ومتزوج ويايب عيال ولايقول لها الي يسوي هالشي بزوجته الأولية يسويه بزوجته الثانيةوالثالثة ولو قدر الرابعة بعد!! هذا ينعاف والمفروض يلاحقونه وانتي بكرامة بالجواتي والنعل
لأنه موكفو.

مشكورة على هالبوست ونصيحة لاتسرفين بالمواضيع العاطفية لأنها راح تسبب ازمة عاطفية للعزابيه(تفلسف زايد مني
بس:) )

الزين يقول...

خوش حووووووش

هههههههههههههههههههههههههه

ذبحني الإسم من الضحك

الحين ما لقيتي احسن منه
:**

يازينج زيناه بس ترى عجبني الصج الصج


تصدقين اعرف قصة مشابهه لواحد يدرس بره ورجع واهله سيده زوجوه اهل البنت عيزوا يسئلون عنه كله يمدحون فيه او ما يعرفون عنه شي الناس
كان حويط واهله حسبي الله عليهم بلشوا البنت فيه

تدرين شلون درت
طلعت بليلة عرسها من الحمام ولا الحبيب لابس قميص نومها
ههههههههه

اللهم لا شماته
لا ربي لا تبلانا
والله مابي اضحك بس شرالبلية ما يضحك

طاف طاف من قلب

اما الأولى فهي هبله والهبلان وايدين

انطر خمس سنين مع واحد عفلنقي وقايل لي انا مو مال زواج

شله ... مينونه
حبيبي تروح انت وغيرك عشر

:)

والله اني قشرة

:**

الزين يقول...

كويتاوي

:)

اسم الله على لسانك

انت تسأل مثل ما تحب افا عليك

القصص من تأليفي كلها
فيها من واقعنا الكثير
وتمت لحياة الكثيرين منا بصلة بشكل او بآخر

بس كلها تأليف والشخصيات خيالية والحوارات ما دارت ابد

لا تعتذر وعزيز وغالي يالشيخ

:)

الزين يقول...

فريج سعود

1
ايه انا بعد اقول تزوجي لا تصيرين هبلة

2
السالفه يبي لها عزيمة وارادة وطول نفس يا فريج

3
حسبي الله عليه

4
نمبر ون
ونمبر تو
ويمكن باجر يصير في 3
وفووووووووور

ويطلع الريال اكبر ثور اذا سواها

سووووري على الوصف
بس اللي مقتص بوحده شله بالثانية يا سعووود

:)

تحياتي للتعدد
وكله يصير

لو ما يصير!!

بس يقول...

آه يا الزين :(

1. بمان ألي ما يحفظة ، و تزوج أبرك

2. يا حلو الجهاد بس عاد عسى يطلع كفو

3. حسبي الله على أهله التبن

4. بدون تعليق
فالقلب يعشق فبل العين أحيانا ؟

اجار الدين كشمش يقول...

القصص كلها ..عن خمال الريايل

والبناااااات سلااااامات

كلهن ...مغمضات

هذا ياالزين مايصير
فيه تفرقه غير مقبوله

فمالله

الزين يقول...

محارة

تصدقين لو بقص اكثر اكو مواقف صج تكسر القلب وسوالف تبهرج

بس هذا واقع

ماننكر ان الواقع مو دايما مظلم ولا دايما القصص تعيسه

في نهايات سعيده اكيد
وفي شي بالنص

ويعين الله

الزين يقول...

ak-47

ههههههه

ايه حتى انا يازت لي

:)

esTeKaNa يقول...

(1)
يا رخصك يا الغالي!!
هذا مو حب
هذا تعود
وخايفه ما تتعود على غيره
الحب الصحيح ينبت في نور الصبح ماهو اللي يتوارى في ظلام الليل
ياريتها تتزوج
وتحس بقيمة كل لحظة بحياتها
(2)
كل مرحله لها جمالها
وامنياتها واحلامها
ممكن...تكسر مافي قلبها بنية ارضاء والديها
مجرد هالنيه
رغم قسوه اثرها
انا اكيده انها تفتح لها باب اخر من الرضا والسعاده
هناك اختلافات يا الزين ممكن تجاوزها
وهناك اشيا صعب جدا تجاوزها
(3)
يا الله!
الله لا يحطنا بمكانها
:(
(4)
اعقل قرار اتخذته
ستبكبي يومين
لكن افضل من بكاء السنين كلها




مبدعه كعاده زينه قلبي
:*

Shaima'a Alkandari يقول...

اممممممممم

عشان جذي اعتقد ان احسن حب للبنت انها تحب زوجها بس

ray يقول...

كله قاصين عليها

secret يقول...

1. من البداية قال لها مو مال زواج .. يبي يلعب ليش رضت؟ صج يبيلها كف :)

2. قصص مشابهة كثيرة تمر علينا، مآسي، بعايلتنا في ناس ماخذين من المذهب الثاني، و في ناس ماخذين انجليزيات بعد، ماني شايف مشكلة بهالشي ابد، ولا احد من عيالهم طلع معقد بالعكس، أصلا يصير عند العايلة تقبل حق فئات المجتمع كلها شنو المشكلة يعني وايد بتفرق؟ جان فرقت بتلاحمنا ايام الغزو، مدام الرب واحد .. لا و كلنا مسلمين بعد .. الله يهديهم.

3. يالله تفضلي .. القصة الثانية مو من مواخيذهم .. و هذي من مواخيذهم آخر شي طلع كوتوموتو .. اهم شي ان اهله يدرون فيه .. بس صج مشكلة .. لان سهل ينكر هالشي و يحط العيب فيها .. والله حرام

4. اوافق فريج سعود .. بس هم ما لازم يجذب من البداية.

قلب طفله يقول...

( 1 )

مصيبه هالبنت يا مدمغه و لا مدمغه

عيل ترهن عمرها و حياتها لواحد يلعب

عليها و يتسلى فيهاو البلوه تدري !!


( 2 )

كلام الام واقعي مالها الا النسيان :(


( 3 )

حسبي الله على اهله اللي بلو بنت
الناس فيه :(


( 4 )

صعبه تبني حياتها على تعاست غيرها
البعد اسلم لو فيه عذاب .


مبدعه يا الزين قصص واقعيه مع الاسف

kAiKa-MGroMa يقول...

NICE short stories =]

ahaneech.

لؤلؤة يقول...

الحب داخلنا يا الزين

Don Juan يقول...

القصة الثانية تعور القلب :(

و الثالثه ,, هذا اهو و أهله مال واحد يذبحهم بسجين بلاستِك دام انهم يدرون و ما عدلوا حال ولدهم و بلشوا بنت الناس معاه ,, لا و واثق من نفسه بعد !

الزين يقول...

عبادي

1
كلامك صح البنت لين حبت تتعلق حيل ومشكله عاد تعال فجج

2
تهقا حتى لو حنت بتوصل للي تبيه وبتضمن المستقبل جدام

3
تصدق حتى مع السؤال الا مافي شي ينخش ويبين عقب

4
ولو بعد حين يا عبادي ولو بعد حين

:)

يعافيك وساعة المباركه يالطيب
لا تباعد

الزين يقول...

سيدة المطر

حبيبة الزين
هذا قليلا مما لديكم
ما ايي نقطة في بحر ابداعج

:**

الزين يقول...

حسين

الأولي يا حسين تحر مو القصه البنت ضعيفه وغبية ولو صج القصه جان صج لتيتها كف

ما احب الضعاف

وسالفه مواخيذنا هذي قصة يطول الحجي فيها

نخليها يمكن في بوست ثاني لها بروحها

مشكور ياحسين
وهالكلام يحملني مسئولية كبيره يا حسين

صرت اخاف شنو بكتب جدام
ابي دايما اكون مثل ما تتوقعوني واكثر

يسهل الله يالشيخ

:)

الزين يقول...

واي مي

رد يا فريج شتقصد

وضح لو سمحت

:)

الزين يقول...

الكويت حبي

مساء الخيرات

:)

مشكور هذا من طيبك

1

يمكن صعب بس مو مستحيل
ودايما البدايات اسهل من النهايات

2
ايييييه وبعد الحنه ... وبعدها
يمكن تكون النتيجه قلب مكسور
شالفايده

3
حسبي الله وهو الكافي

4
مثنى وثلاث ورباع
تهقا يت من لا شيء
انا ما اقصد اني مع او ضج تعدد الزوجات
بس شيللي يحد ريال مرتاح وسعيد مع زوجته انه يدور بره

مادري
بس رب العالمين له حكمة اكيد

وشكلي انا بنطق من الجنس الناعم

يالله سلام

الزين يقول...

ابو لطيف

اول شي حياك الله وساعة المباركة

وانت صاج لسنا نحن من نختار
حطيت ايدك على السالفه صح

وما عليه الله يبلغك يالثانية ليش لأ

:)))

خطوة عزيزة ومنورنا

الزين يقول...

بو سعد

انت وينك وين اختفيت
علقت عندي مرة وحده من زمااااااان وانحشت

:))))

فقدتك يالشيخ

اهاااا جكيتكم تحشون فيني يعني

يالله تعال علمني شنو قلتوا
الحين الحين
ماكو نحشه يالله علمني اهو
قول
قول
قول

:)))

عجبتني سالفة الجنس تفوااااا عليه طالعة من قلب

وياك يالشيخ
ومرورك اليوم اسعدني جدا

الزين يقول...

شاي اخضر

ترى الرياييل ماهم لغز يبي له حل
انا اتصور انهم مختلفين عنا فقط
نحتاج نفهم مواطن الإختلاف عشان نفهمهم صح

والعكس صحيح

مادر جني شاطه شوي عن الموضوع

تالي الليل وفيني النوم

:)))))


متابعتج لي جدا جدا جدا عزيزة علي
لا تباعدين
تعودت اشوفج

:*

الزين يقول...

قصة

:)

اخرها عوار قلب ياوخيتي
كله عوار قلب بعوار قلب

الزين يقول...

معاذ

1
ايه والله باللي ما يحفظه
اكسر وراه سبع قلل

ثوووووره ومدمغة

2
قصدك اكبر عجز بالدنيا

4
انا اتصور كل الرياييل مع فريج بهالسالفه

:))

تبون العذرانتوا

اخ منكم يالرياييل

حياك الله يالشيخ
وساعة المباركه

الزين يقول...

تعبت وفيني النوم

لي عودة مع البقية

سامحوني وتصبحون على خير

:)

charisma يقول...

حاله حااله
اول قصه قريبه من التحفه الى عندى نفس الحاله

يختج ما ادرى شلون يعيشون على وهم ان بتقدمون لهم بيوم من الايام

الريال كان صريح وقالج ما ابى زواج شماله متمسكه فيه ومستمره معاه

وااى زيونه انا متهاوشه معاها وحدى متنرفزه منهااا وقريت بوستج شبيت ازياده

غباااء وملالاقه اى حب اى بطييخ بهالزمن

سورى زيون ترى انا اتكلم عن العاهه الى عندى

://

الزين يقول...

فسكرة

السالفه كلها بلاوي طلعت
ما تستاهل العنوة يا فسكرتي

شي يلوع الجبد

اليوم انا المود مو شي
حده قوع

:*

الزين يقول...

شلالات

تعب صعب كله خنبقه

شدراني؟؟

اففف لايعه جبدي من الصيف والحر وكل شي

واليوم بعيوني كل الرياييل سوى
يبي لهم حراق

والله بيطقني على هالكلمة خل يجرب
شكلي حدي فيني هوشه صح

:))))

تبين الصج الحين بهاللحظة بعيوني ايه الدنيا مثل هالبووووست

انا شكلي يبي لي اجازة واقب
اختربت حدي

سلام

:*

الزين يقول...

صقر قريش

بتطقها راااااشدي!!!
عيب
الريال ما يمد ايده على مره
آنا اطقها عنك

:)
اترك عنك ولا تتهاوش
كما تدين تدان
باجر ربك يراويه

اما الثانية فآنا اقول لها كبري عقلج واهلج ثم اهلج ثم اهلج

والباجي بح


اما الثالثه لو آنا منها
اروح اقرب محطة بانزين
شوية قاز
وارجع اولع فيه الغرفه
واقول لهم عقب انتحر لأني هددته اني بفضحه انه مو ريال

شرايك فيني وانا شريرة
اصلح صح

:)))

والرابع
تنهيده كبيره من القلب
قلبي معورني عليها
انت لو تعرف شعور البنت اللي بوضعها تكره حياتك
تحس انها مستهلكه ... وساعات مهانة
ومع هذا تسكت لأنها اهي اللي رضت من الأول

قاتل الله الحب يا صقر
او مثل ما يقولون اخوانا اللبنانيين
يخرب بيت الحب شو بيذل

وبعدين تعال قول لي
اذا ما كتب بهالمواضيع شبقى لي
ليكون تبيني اكتب سياسه بس!!!

تمون يالشيخ تموووووون
بيتك ومطرحك والزين اخيتك
تقول اللي تبيه

الزين يقول...

بس

آهيييييين
قلبي على قلبج
شنسوي بعمرنا

ويخرب بيت القلب اللي ما يعرف يعشق الا اللي ما يحصله

:*

الزين يقول...

أجار الدين

يا أجار يا بابا شفيك
نحن لا نتحامل على الرجااااااااال

البوست اسمه الباحثات عن الحب
مو خمال رياييلنا
آنا قاعده اتكلم عن خيارات في حياة البنت ممكن تكون خاطئه وكله في سبيل الحب

بس
ياربي ليش كله على بالكم قاعدين نذم فيكم


رجعت لو بعد؟؟

ابي صوغتي

شلوووووون

الزين يقول...

استكانه

1
راح تتزوج ما عليج
مردها بتعقل
ولا بنعقلها
ولا بنتولاها بالعقال
وكله واحد
:)))
ابيه صايره عنيفه


2
وانا اثني على كلامج
اسم الله عليج
حكييييمة
:**

3
الله يستر
الحافظ الله

4
بعد البكاء
سوف تجد نفسها من جديد
وبترتاح صدقيني
عبئ علاقة من هالنوع متعب
متعب
متعب

بعدي انتي
:**

الزين يقول...

شيما

عفية
عييييييييين العقل بعد قلبي انتي

:**

الزين يقول...

ريووو

@@

منو

شنو

ليش

ويييييييينج؟؟؟؟؟

الزين يقول...

سيكرت

1
:)
كف مني وكف منك
يفتر راسها شوي بس تعقل عقب
شرايك

2
قووول لهم
لما الحين في ناس تفكر بهالعقلية

3
ههههههههههههههههههههه
عجبتني سالفة كوتوموتو
خوش تسمية
يقطع ابليسك يا عسلي
خلاص بعتمدها
وبتدخل بقاموسي

4
شي طبيعي توافق فريج سعود
انت متحيز ومتعصب
وبالنهايه منو اللي مستانس غير الرياييل

عندي تحفظ على هالسالفه
واخاف اتكلم تكرهوني

سلام

الزين يقول...

قلب طفلة

1
لا مو مدمغة
مجوية على راسها

2
حذفي ورى ظهرج وكملي طريجج
هذا ريال وغيره عشر بلا حب بلا خرابيط

3
عندهم بنات وربي بيبلوهم
مع ان بلوتهم مو شويه ولدهم طلع بنتهم

4
صعبه وايد صعبه

:**

الزين يقول...

kAiKa-MGroMa

يا هلا وغلا
من طول الغيبات
مشكوره بعد قلبي وكلج ذوق

:*

الزين يقول...

لؤلؤة

كلنا مخلوقين من تراب

الفرق ان المرآة مغمسه بالمشاعر
والرجل مغمس بالعقل وشي آخر

بالنهاية المعادلة صعبه
او يمكن احنا نصعبها على حالنا

مادري

صباحج طيب

الزين يقول...

دون جوان

الله
سكين بلاستيك
الله يا انت مجرم
تبي تعذبهم يعني

بقول لك سر عن هالنوعية من الناس
تدري شنو يسومونهم

Back stabber

ومعروف عنهم انهم شرسين لو اضطروا يدافعون عن نفسهم

فهذا لا تستبعد عنه يقول اي كلام عن البنت عشان يحمي نفسه

حياك الله

الزين يقول...

كروووووووز

طقييييييييها
هبديها
خل توتعي

بنات اخر زمن
سكه

JooJ o MaJooJ يقول...

1- آآآآآآآخ صعبه و الله صعبة اتزوج من إلي ماتحبه :(
2-لا تعليق وايد قاعدة إتصير بس بتحس بالفرق لي إكبرو غعياله
3-خل إترد بيتهم دامن ما دخل عليها هالسفلة
4-هممممم الريال ماله عذر مو مرتاح هاذي حجة
عجيب البويت :*
جووج

charisma يقول...

هههههههههههه
واى موتينى ضحك على هبديها هههههههههه

باهبدها واهبد نفسى معاها
جود نصحى على الواقع :))))


:***
يحلوج يالزين

The Voice Within يقول...

post mo 9j!!

tislam idich

اجار الدين كشمش يقول...

انشالله انشالله انششششالللله
بس بس بس
اسحبها بس خلاص

بس كلشي ولا تذكريني بالرده ....تو الناسسسسس

حتى الصووووغه اذا تأخرت
تصيييير صوايغ

فمالله

MKSARAT - SAYED SAAD يقول...

صديقتى الرقيقة
اشياء كثيرة تكون جميله مثل ثمرة التفاح تملك رائحة وشكل جميل مجرد ان تنزع قشرتها يتغير شكلها وتتغير رائحتها هذا هو الحب مثل هذه الثمرهيجب ان يحتف بسر جماله والا اصبح كريه
دمتى بكل ود صديقتى زوزوتا
صاحب المكسرات
سيد سعد

الزين يقول...

جووج

:)

اثني على كل اللي قلتيه
ومشكوره على المتابعه

:**

الزين يقول...

كاريزما

:))))))

ايه ترى طلعت من قلب

والله شكلنا كلنا يبي لنا هبده

الزين يقول...

مس نفيسه

انتي وييييييييينج

وين ا ختفيتي

شنو بطلتي تدوين؟؟؟؟

وجودج اليوم مو صج حبيبتي

:**

الزين يقول...

اجار

:)
يازينك وانت تسمع الكلام

ايه ايه
صوايغ ابرك

:)

بحفظ الله

الزين يقول...

مكسرات سيد سعد

صديقي العزيز من ارض الكنانة

وحشتني خااااااالص
عامل ايه ... واخبار الصيف معاك ايه
انت بتغيب فين ياراجل

اعجبني التشبيه
فعلا اعجبني الحب كالتفاحه
:)

ما تغيبش تاني اوي كده والا هدفعك غرامه

:))

غير معرف يقول...

والله ما عندي تعليق بس حبيت أشارك والله يعطيكم العافيه..

جنون إحساس يقول...

بوست مأساوي يحكي لنا عن عالم مليئ بالقسوة ..

آنا أبي أركز على نقطتين:
*الأصيل واللي مو أصيل:
فيها ظلم كبيييير خاصّة للبنت .. قولي الرجل سهله يتزوج لكن البنت من الواجب تزويجها إذا يا الريّال الكفئ , ممكن ايي الريال الصالح والخلوق لكنّه ينرفض بسبب انه مو أصيل !
طبعاً اسئليني شيسوون العائلة إذا بنتهم خذت مو أصيل :)
والله محد يوصل لها ولا يكلمها !


*زواج ذوي المذاهب المختلفة:
هذي أخالفج فيها .. المسألة مو مجرد حب وإعجاب لاء .. مسألة عقيدة راسخة
وجيل يحمل فكر معين راح يتشتت باختلاف مذهب الأم والأب ويمكن تصير عداوة بشأن هذا الموضوع وطبعاً انتي عارفة باقي الموضوع ..


وسلامتج وتعيشين :)

الزين يقول...

غير معرف

حياك الله وساعة المباركه

مدونتك ومكانك

:)

الزين يقول...

جنون احساس

يسلم عمرج يارب

وترى انا من رايج وما اختلف معاج كلش

:)

الوتيــــــــــن يقول...

والله حمست جبدي لأنها ذكرتني بوحده جذي حرتني بسوالفها
**********
بالنسبه لي ماتفرق لأن اليهال اهما اللي يختارون بالاخير المذهب .. وكلنا مسلمين وان اختلفنا
احيانا يكون الاهل على صواب ولهم نظره واحيانا يقع الابناء في الظلم
*************
مشكله هالجنس الثالث
بس اعتقد ممكن لو اهي قويه تقدر تدينه بالفحوصات لها وله
اكرههم مع ان بعضهم مالهم ذنب لكنهم نبته فاسده
********
هاذا حال الريايل ياخذونها زهره شحلاتها وتالي يلفون على غيرها ويقولون آنا مو مرتاح... متزوج ومومتزوج .. آنا شبه منفصل وكل يوم نايم في بيته
الله يهديهم

======
كل عام وانتي بخير عزيزتي الزين
مدونتج روعه:)