تتملل في فراشها
تغير وضعها علها ترتاح وتغفو ثانية .... تبعد اللحاف عن قدميها لتطرد الدفء قليلا ...
تغير وضعها علها ترتاح وتغفو ثانية .... تبعد اللحاف عن قدميها لتطرد الدفء قليلا ...
تك تك تك ... تك تك .... تك ... تك
تفتح عينيها ... تحيطها العتمه ... وتبحث عن الساعه
ويزداد ايقاع المطرعلى شباكها
تثب من مكانها ... تزيح الستائر
مطر ...
مطر يغسل اطراف الصباح ...وتغتسل به روح النهار ..... تلتفت لتجده يغط بنوم عميق ... مستسلم لسلطان الأحلام
كانت نائمة عندما عاد من الديوانية ... لم تشعر به وهو يندس بكل هدوء بجانبها ...
تنظر له بتفكر ....
انا لو الله يفكني من هالديوانية جان انا بخير
كانت نائمة عندما عاد من الديوانية ... لم تشعر به وهو يندس بكل هدوء بجانبها ...
تنظر له بتفكر ....
انا لو الله يفكني من هالديوانية جان انا بخير
وتعود لتبحث عن الدفء بين صفحات صدره .... يشعر بها ... يفتح عينيه بكل كسل
"جم الساعة"
"مدري"
"شمقعدج ليش ما تنامين"
تختبئ بصدره .... ثم تهمس
"شبعت نوم ....."
يغمض عينية
ينظر اليها بتعجب وهو يغالب النوم
"ليش .... شعندج"
"قوم .... عشان اليوم يومك"
"يومي!!"
"ايه اليوم يوم الزوج العالمي"
"من قال ... اكو شي اسمه يوم الزوج العالمي!!"
تفكر قليلا ...
"انا ... قررت اسويه يوم الزوج العالمي"
تضحك بشقاوة طفلة
"قوم غسل وبدل وتعال نتريق يميع ... مشتاقه اقعد وياك ... عندي سوالف ترس الإيد .. مالت اسبوع كامل"
"بتريقيني!!"
"ومن ايدي بعد"
يجلس على الكاونتر بجانبه فنجان القهوة متصفحا الجريدة
"شنو تحب تاكل"
"أي شي ... على هواج .. انتي شنو مشتهية"
"اوكي ... شوف يا سيدي المنيو بتكون لغز وانت بتحله"
"لغز!!"
"ايه ... لغز .... بس حله وااايد سهل ... ما ابيك تفكر وايد"
يضحك
"ياحبج للعب"
"معاك بس"
الكل كان نائما مستمتعا بهدوء الويك اند ما عدا قلبين قد اشتاقا للقرب بعد ان سرقت الحياة منهم ما سرقت وغفلوا عن لغة المشاعر
تنهمك بتحضير الإفطار وينهمك هو بقراءة الجرائد ... مع بعض الأحاديث الجانبية... حكايات صغيرة تحكي شوق الروح للروح ..
لحظات قليلة هي كل ما نحتاجه حتى نقترب ممن نحب ... نسمعهم ... نعطيهم اهتمام قد افتقدوه ... نريهم ان الحياة اجمل وامتع بوجودهم ... نتعرف عليهم اكثر .. ادراكنا اننا نكبر وننضج ونتغير بمعدل يومي كنتيجة طبيعية لشروط الحياة وصراع البقاء والحصول على متطلبات منها الضروري ومنها لتدليل النفس .... ونقتنص الفرص حتى نكون معا ... فاليوم نحن هنا ... وغدا .. من يعلم
وقبل ان تتبدل المشاعر ... وتتغير الأولويات ... ونصطدم بواقع كان ممكن تحاشيه .... وحقيقة ان اقرب الناس لك قد اصبح ابعدهم عنك
تشتاق لك روحي يا بعد الشوق كله
والقى هوى روحي بوسط عينك كله
احجي سوالف يومي واسبوعي كله
واحرق بخور الشوق بوسط شعري وانت من تنثره وتفله
واغزل حجي الولهان بلون يوفي وما تمله
وارسم دروب العشق بخط كحلي وانت ظله
كلي انا بروحي .. بزولي .. بكل زيني ملك يدك
قولي انت وحط عينك بعيني .. خفوق اللي يدق بصدرك
من له!!
تجلس بجانبه ... تتشارك معه افطاره الذي اعدته ... يتذوق قليلا من كل شي ... ويلتهم احاديثها مغمسة بروح القرب ... تشاركه النكهة ... حلاوة الأناناس .... والقليل من الطماطم المطيب بالإوريجانو ... افوكادو بالروكولا... بيضتين عيون وفرنش توست مع القليل من زيت الزيتون ...
رشفة من القهوة ... تجدد الشوق والرغبه بتناول المزيد ذلك الطبق او الآخر
"سنيوراااا ..... اليوم ريوقج تليانو"
تقهقه بكل ما تحملة من شقاوة طفلة
"انزين .... يعني عجبك؟"
"تبين الصج ... تذكرت قعدتنا الصبح على القهوة اول مرة تريقت معاج هناك"
"اهااااا .... يعني !!"
"يعني شنو ؟؟"
"حليت اللغز؟"
"قبل لا اجاوب .... يوم الزوج هذا حده لين الريوق لو يستمر طول اليوم"
"يمه يمه ... تبي تضمن يومك .......يالله بكون كريمة معاك وبعطيك لين الساعة 12 من الليل"
يبتسم بكل رضا
"روما"
"ياااااااااااااااا حياتي انت ... ياربي هالريال ذكي .... يصير نروح .... اسبوع ... ما ابي اكثر من اسبوع
انا وانت والإسبانش ستبس ... والكولوسيوم .... والفيا دي كوندوتي"
"اخ منج ... احد قال لج من قبل انج شيطانة "
"ايه ... انت ....وبعدين احنا محتاجين نغير ... ونسوي رفرش لحياتنا ... ويمكن نبتدي من يديد ... ما تحس ان احنا ما كنا حول بعض بالفترة الأخيرة ... بليييييييز"
"انتي ما كنتي حولي"
"ادري ... وودي اصلح اللي خربته"
"نصلحه قصدج"
"نصلحه"
وانا اقول ماكو شي ببلاش ....انتي اييبون لج الشياطين تدرسينهم ...... ويوم الزوج العالمي وهالريوق المتعوب عليه ... وعلى بالي السالفه ببلاش"
يقولها مستجمعا نفسه
"حرام عليك .... ترى من صجي انا ولهانه عليك ... طول الإسبوع واحنا مشغولين عن بعض ... وبيني وبينك انا حاسه بتأنيب الضمير ... الفترة الأخيرة لهيت عنك ولهيت حتى عن نفسي"
"طالعنيني بعيوني اشوف ... يمكن اصدقج"
"حرام عليك .... ترى من صجي انا ولهانه عليك ... طول الإسبوع واحنا مشغولين عن بعض ... وبيني وبينك انا حاسه بتأنيب الضمير ... الفترة الأخيرة لهيت عنك ولهيت حتى عن نفسي"
"طالعنيني بعيوني اشوف ... يمكن اصدقج"
تنظر له بكل ما تعرفه من غنج وكيد ...
يبتسم ....
وتبتسم له بالمقابل .... كأنها وجدته في تلك اللحظة من جديد
"ما قلتي لي .... الزوجه مالها يوم؟؟"
"كل يوم يا بعدي ...كل يوم"
هناك 38 تعليقًا:
:*
كنت هناك...اقف بالقرب
اتنصت على حوارك العيار
واستشنق رائحة أرق افطار
وأجزم..ان كيد النساء جبار
:)))
أحيان في عز المعمعه
وفي ظل انشغالنا اليومي بكل شئ
نحتاج ان نخصص يوم للزوج
يوم للحبيب
يوم لصديقه
يوم لقريبه
ويوم لأب وأخر لميمه
نعم...تخصيص يوم بساعات قليله لشخص قريب شئ بسيط ولكنه يعني لغيرنا الكثير الكثير
بوست جميل
باحساس عفوي وبسيط
يخترق القلب ويسرق من البسمه
به دعوة ...لنخصص الايام كما نشاء
ونخلق يوم للحبيب متى ما اردنا ذلك
:))
وأخييييه ....
اخيه على تشتاق لك روحي
تدرين؟
عندما تكتبين بوست لتعرفين قيمته عليك ان تتأملي وجهي وانا أقراه...
واحرق بخور الشوق بوسط شعري وانت من تنثره وتفله
ويفتل شعرنا
ونعيش برقه مشاعرنا
ياالزين اللي عافستنا
:))))
انا صار لي ساعه اقرا قضيه شيبت راسي ملييييييييييييييييت
وانتي رديتي لي مودي الحلو الحين
:**
شكرا لانج اجمل صديقه وارق احساس بالدنيا
احم
نحن هنا
:P
مسائج فل
مسائج ياسمين
مسائج فرح
وطلة الغايبين
شلونها الزين ؟
تراني ولهت عليها
..
لـول شقاوتها مقبولة جدا
ومحبوبة أكثر
حكايات رائعة
والحكاية الرابعة راقت لي
:)
سلام
كم أحب المرأة الذكية اللي تلعبها صح وبحب صادق :)
الله يديم المحبة بين الأزواج ودعوة لكل زوجة لتتدارك غلطة إنشغالها عن زوجها وبث جرعات الحب كلما سنحت لها الفرصة :)
قصة موفقة ومغزاها جميل :))
هههه
مسكين عباله صج يوم الزوج العالمي
تسلم يدك يا الزين
بو خالد
مطر ... مطر يغسل اطراف الصباح ...وتغتسل به روح النهار .....
حتى ارواحنا تنغسل بماي المطر :)
يا ربي هالمطر شسوى فينا
صج احنا البنات قلوبنا ورقة كلينكس
حلو التغيير والاختلاء من وقت للثاني
يكسر الروتين وينعش الارواح التي ذابت
وانصهرت في خضم الحياة
buena sierra seniora
:)
منتي هينة يا الزين يا ام الخطط
اي مريمو اي خطة الخثرة
انتي صكيتي عليها :))
انزين هالبوست اهديه اهو و ريوقه من بعد اذنج يعني حق زوجي العزيز
ليش انه ماد البوز شبرين و مطنقر
و اقوله انا ابي 4 ايام بومباي او اصفهان
واللي سلمج زيون توسطيلي :))
و ثوبيلي بالسبانش ستبس و فيا فنتو
:)
مستمتعه وانتظر المزيد
:)
لا اطولين علينا
يا سلام على اللي بيجر ناعم
:)))
كل رجل له مفتاح... تهقين من الفرنش توست؟:)))... بس حلاته مع زبدة لورباك
... وميبل سيراب مال ماركو الساحر
اللي عندنا ما يحب زيت الزيتون... ينقمت من ريحته!!!!
كرهني بالمطاعم الايطالية!!!
.
.
ولهانة عليج صديقتي السايبيرية
يبيله قعدة شاي سَماوَر!
تتمسي بالخير
:))
امبيه الزين اقرى ووانا لاصقه بالشاااااشه ماني قادره اوخر بوست محرض عالرومانسيه مايصير ترى راعونا احنا العزابيه شوي :(
تدرين يالزين والله لو اسوي حق ريلي مو بيض والله لو اسويلة مندي و ادفنه بالشقة ما أشوف حتى فيلجا من اللي شافة مني بالسفر مسيجييييين ..
بس تدرين طريقة عرض القصة وايد حلو يحرك المشاعر بس يوم الزوج امممممم لا مو خوش انا بعلن عليه يوم الزوجة احسن
@@
السفره على حساب منو بالضبط ؟ ;q
زين يصير اروح وياهم محرم ؟
مايبون مرافق اي شي مني مناك ؟
ليش انا استانس على قصصج يالزين؟
الله أأأأبي مثل هالريووق
:)
والله الثانية على
روما
السبنش ستيبس
وفيا دي كوندوتي
وفيا سبيغا
ما أدري أحجز وألحق بعض الناس
:)
زووغه الحوار بينهم
دلــع ما بعده دلــع
:)
واحرق بخور الشوق بوسط شعري وانت من تنثره وتفله
حرقتي قلوبنا ونثرتي مشاعرنا وفليتي وجدانا
:**
واحرق بخور الشوق بوسط شعري وانت من تنثره وتفله
من امس وانا رايحة ورادة عليها
او يمكن من قبل امس
هالجملة علقت بقلبي
:)
الشقاوة انعكاس ارواح الطفولة
اللي فينا
انعكاس حبنا واحتياجنا للي جدامنا
وشوقنا المشتط
:))
وايد حبيتها
احساسها
لهفتها
عيارتها
:)
صباحج حب
:**
الزين .. فيه جذي بالصج ؟
يالييت : )
رابعتج حلوة مثل بلو بيري مفن .. ناعمة، بسيطة، حالية وشقية الى ابعد الحدود ..
شفيني اليوم على الحلو!!؟؟
داركنس
:**
ومعاهم لمه قوية بعد
:)
استكانة
:)
انتي فهمتي الدعوة صح
انتي قلتيها بمعاني اوضح
اتمنى انها وصلت للكل
للأخت للبنت للأم للأبو للصديق للحبيب للزوج للإبن
عطوهم وقتهم
يستاهلون
وعيشوا اللحظة معاهم
دايما اجمل لحظات السعاده ابسطها يا استكانه
:**
احبش يالغلا
يالله خلصنا لمي شعرج
:)))))
قصة
:)
مسائج الطيب كله بعد قلبي
الزين طيبه دامج طيبة وبخير
وانا ولهت اكثر اكثر اكثر
بالثلاث
:)
الحكاية الرابعه راقت لي اكثر
:)))))))
نيكون
ذكاء المرأة برأي ضرورة
عشان تحكم زمام بيتها
وتملك قلب زوجها
وبالضبط اهي دعوة لكل زوج وزوجه
لكل ام وبنت
لكل اب وابن
لكل صديق
عطوا علاقتكم حقها
واستمتعوا بالقرب
ترى الموضوع يستاهل
الخيلاء
ان كيدهن
:))
تعلمي
بو خالد
:)
يسلم عمرك يارب ويخلي لك حبايبك
من زمان عنك
شالأخبار
كبرياء وردة
انا قلبي وروحي كلها اغتسلت بمطر هذاك اليوم
:**
احنا عشقناها
بونجورنو سنيورا
:))
شفتي شلون
كللللللللش ماني هينة
وعلييييييكم بالعافية البوست والريوق
وييييييه ليش ماد بوزه ياحافظ انتي شمسوية
ويوم اخترتي ما اخترتي الا اصفهان وبمباي
ضربي على شي اقوى الله يهديج
:))
بنثوب اكيد للكل
وكل ما دخلت محل ولا قعدت على قهوة بصوت عليكم
:**
وازينهم اللي يحبون روما واهلها وسوقها وكلها
:)))
Noor
كنت بمدونتك
وراق لي ما قرأت
:)
جندل
لووووووووووول
تعلموا يا معشر النساء
شورانا
تصدقين شوقتيني
@@
لوووووووول
عاد انا مالي غناة عن الأكل الإيطالي
عشق بالنسبه لي
وانا ولهت عليج اكثر بعد قلبي
اينجل
:))))
يا حياتي انتي
الله يبلغنا فيج ويعطيج اللي بخاطرج
:**
ميمة السبيت
:)))
ياحياتي انتي
جربي تسوين يوم الزوجه
بس هاااا
دسي له السم بالعسل مثل ما يقولون
وخلج ذكية
:)
انا شكلي بخربكم على رياييلكم
كويت
:)))
ممكن يتبنونج
شقلتي
ولا تدرين اخاف تقبسنين عليهم
عقب بوستج الأخير الواحد صار يخاف منج صراحه
:$
واي مي
لأنج تحبين كل شي يحرك مشاعرج
:)
ديللي
:)))
من قاااال لج تطوفينها
روحي لحقي عليهم
:*
نجمة
واهي بعد حبتج
وصباحج غطيطة
شفتي الجو اليوم كان عجيييييييب
:**
شهد
:)
نحن من نخلق سعادتنا وواقعنا يا شهد
اكيد فيه
سبمبوت
:))
شوفي سالفة الحلو استكانه دقتنا سلف
واحنا اشتغلنا عقبها
وصباحج احلى مفن
:*
يحليلهم الله لا يغير عليهم إنشاءالله D;
والله ساعات نشتاق لاحبابنا واهما معانا واهما يمنا,, شلون لي شغلتنا دنيتنا عنهم!! بهالحاله نسوي كل الي نقدر عليه إنا نبين لهم غلاهم ونكسر مشاغل الدنيا عنا,,
قصه رائعه
اعجبتني حيل
تقبلي مروري
بدور
إرسال تعليق