سوالف يهال

رمضان السنه يختلف عن كل سنه ... لأول مرة منذ ست سنوات يكون له وقع مختلف ... إحساس أكبر بالروحانية ... ليس هناك ما يلهيني ... مبتعدة عن كل الرسميات والواجبات الإجتماعية ... ولست من محبي متابعة التلفزيون وسوالف المسلسلات الرمضانية ...قرار اتخذته مع هلال الشهر ... لن يلهيني عن رب العالمين شيء ... سوف أكون قريبة منك ما استطعت يا رب

عصرية أحد الأيام ... بعد ان تلوت ما تيسر لي من ذكر الله .... اشتقت لرائحة البحر ... للهواء المالح وهو يقبل أنفاسي .... افتح الشباك رغم حرارة الجو .... مع كسرة الشمس .... يخلو الشارع الا القطط وصوت سعف النخيل .... اغمض عيني واتنفس بعمق
ويصل إلى اسماعي صوت طفلين يسولفون

الأول : الحين انت ما تدري ... انا صار لي مدة اتدرب ... وكل يوم اشوت بالكرة ... عشان شوتي تصير قوية ... تصدق عاد هذاك اليوم رايحين ماكدونالد نتعشي وقاعد العب كرة ...جان اشووووتها حيييييييييل ولا اصيد القمر
الثاني : الله ... من صجك
الأول : ههههه ... حتى اهو انطفى ....كلش .... ما قام يشب عقب
الثاني : ايه عادي ... انا بعد شتها جان تروح الفضاء ومارجعت يعني انا شوتي اقوى من شوتك لأن الفضاء ابعد من القمر
الأول : قريت قرآن
الثاني : لأ ... ما اعرف
الأول : ايه حتى آنا .. بس أمي قالت لي برمضان الناس يقرون قرآن وايد .. عشان الله يحبهم أكثر
الثاني : أصلا الله يحب كل الناس .... إنت الحين تدري الله ما ينام
الأول : شلون يعني ما ينام ... ما يحس إنه عيزان مثلنا
الثاني : لااااا ... أمي تقول الله ما يتعب .... يعني الله قوي وااااايد
الأول : قوي يعني يغلب المجرمين ... مثل باتمان!!
الثاني : اقوى بعد .... وبعدين اذا صرنا زينين يعطينا فلوس
الأول : شلون ؟؟؟
الثاني : يحطهم بالبنك .... ويقول حق المسئول بالبنك عطهم فلوس
الأول : عيل ليش ما يعطي كل الناس مثل بعض
الثاني : يعني شنو؟؟
الأول : يعني ليش مو كل الناس أغنيا... ليش أكو فقارة
الثاني : @@ مادري ... يمكن ... يمكن ....شدراني فلوسه وكيفه
الأول : ايه والله احنا شعلينا .......... أنت صايم؟؟
الثاني : لا ماصمت ... أمي تقول لما اكبر شوية اصوم
الأول : ايه انا بعد صمت بس تغديت ... بس ما اكلت وايد ... شوية يعني انا صايم
الثاني : انت شنو بتشتغل لين كبرت
الأول : بشتغل شرطي ... عشان اصيد الحرامية ... وانت
الثاني : انا بشتغل رسول
الأول : @@ رسول شلون؟؟ ... اهو الرسول شنو يشتغل
الثاني : يشتغل صلى الله عليه وسلم
الأول : يعني شنو يسوي
الثاني : يسوي صلى الله عليه وسلم
الأول : اييييييييه ...
الثاني : رحت المدرسة
الأول : ايه رحت
الثاني : شنو اسم ابلتك
الأول : اسمه مادري شنو .... جنه اسمها خس
الثاني : ههههههه من صجك ... خس اللي ناكله؟؟
الأول : مادري انا بسميها خس
الثاني : انا اسم ابلتي عذير
الأول : طالع هذا ... اكو اسم عذير
الثاني : ايه اهي اسمها عذير
الأول : قصدك عصير ... انت اكيد ما سمعت اسمها عدل
الثاني : طالع ويهك ... اكو احد اسمه عصير
الأول : ايه البنيات كل شي يسمونهم ... مو مثلنا
الثاني : تصدق بو العز ... امس قاعد اتدورف ولا جان احوش الشمس ... صارت حمممممرة
الأول : جذاب ... اصلا محد يقدر يحوش الشمس ... اصلا الشمس بعييييدة وااااايد
الثاني : آنا ما اجذب ... وانت لما قلت صدت القمر ما قلت لك جذاب
الأول : بس انا ما جذبت .... انا قصيت عليك بس
الثاني : انا بعد اقص عليك
الأول : ههههههههه ..... ادري فيك انت كله تقص ......قوم خل ندش انا يوعان
الثاني : بس ما أذن
الأول : باكل سمبوسه
الثاني : اصبر خل اييب كرتي

يهرولان معا وتختفي اصواتهم تدريجيا مع اذان المغرب
اغلق الشباك وأنا اتذكر مثل أمي دايما تردده
خبري براحة البال يوم كان طولي شبر ... ما اجمل الطفولة وبساطتها