لا طبنا ولا غدا الشر

أصفط سيارتي ... أدخل الجمعية .. القف لي سلة ... اتمشى على الراحه وانا سرحانه مع افكاري ..... تحسون ماعندي شغل .... ومن زود الفضاوة قلت اروح الجمعية ... واذا تبون الصح انا اذا متضايقة اروح الجمعية ... ... مركز سلطان .... سوق شعبي ....اشتري لمجرد الشراء .. خرابيط .. خرابيط .... لين اقول بس

عقبها ارجع البيت وانا مستاااااااااانسه وضميري مرتاااااح على الآخر

المهم مو هذي سالفتنا ....

وانا اتفرفر بين الرفوف واسمع هالحوار الطريف ...

هي : حبيبي تبي هذا
هو : مادري ... اذا انتي تبينه حطيه
هي : آنا عادي عندي ... بس إذا إنت تحبه ناخذه
هو : انتي تاكلينها
هي : مو على طول
هو : يعني ما تحبينها
هي : لا مو مشكلة عندي
هو : انزين ما تبين غير هالنوع
هي : حبيبي اذا انت تحب هالنوع نشتري هذا
هو : في بيضا وفي حمرة
هي : يعني انت ما تحب الخضرا
هو : جنه البيضا احلا
هي : اهم غير عن بعض
هو : ايه طعمهم غير
هي : انتوا تسوونه في بيتكم
هو : مو دايما
هي : انتوا تسوونه
هو : ساعات
هي : يعني ما احطه بالعربانه (حطوا اللي بتحطونه وفكونا ... شو بناااااا)
هو : كيفج

هي : حطه انت تحبه
هو : تعرفين تسوينه عاد
هي : ايه عادي ... سهل ترى (هاااو .... شنهو اللي سهل!!)
هو : مو توهقيني

تضحك والدلع يتكتكت

هي : لا بسأل أمي لا تخاف
هو : لا سألي امي ... تعرف تسويه زين (يا حمش ... ايه ريال .....من اولها امي احسن)

@@
يخرب بيت الدلع والملاقة ذبحني الفضول بعرف شنو هالحمر والخضر وتحبينه وما تحبينه
اللقافة ذبحتني

جان ارجع قري والف صوبهم
ولا جدامي شي قصير جذيه ولابس جينز وتي شيرت احمر
وكاب مكتوب عليه NY
ويمه شي اقصر منه ... وترصص ماله اول من تالي ... وبلكونات طالعه لا تحصى ولا تعد... ومكياااااااج ... مكيااااج ... وحجاب بو دور ونص ... كاسرة رقتبها على جنب وبيدها شنو تهقووووون

قوطي فاصوليا خضرة

ههههههههههههههههههههههههه

طلعت هالمناقشات والمفاصلات والدلع والتدلع وخاطرها وخاطره على قوطي فاصوليا خضرة
بمووووووووت من الضحك

شكله الحبيب توه متزوح ومدلعها على الآخر

اهم اصلا يايين الجمعية ما يدرون شنو يبون .. اللي قوطي فاصوليا سوى لهم ازمه
اشوه انها خضرة

وربي كان بخاطري اقول لهم المعلبات ما تصلح يا أمي ... كلها مواد حافظه ... تييب لكم الكانسر حسافة عليكم وانتوا توكم معارييييييييس


المشهد الثاني

واقف وجدامه العربانه ملياااااانه اغراض ..... متأفف وكاره عيشته ... يرن موبايله ... هلا بو خلود ... هلا حبيبي ... ايه بالجمعية مع الأهل .... لا ياي لكم ما اطوف ... متى تبلش المباراة ... ايه بس خل افتك من هالحوسه ... صار ... سلام ابوي انت

هو : يلتفت عليها .... يالله ما خلصتي ... ماصارت ... ساعة تحوسين
هي : هاااو اصبر شوي ... يعني بالله انت عبالك الجمعية بتخلص منها بساعه
هو : شنو هذا ... شحاطه ... رديه رديه رحم الله والديج .... ما تعرفون الا تشترون وتقطونه بالثلاجه وتنسونه وكله بجبود الخدم ولا بالزبايل
هي : وانت كل ما حطيت شي بالعربانه قلت لي شيليه .... بالله عليك عيل ليش يايبني ... يعني العيال ما ياكلون
هو : ابوي انتي ... لين بغيتي تطبخين لهم انتي اشترى هالشغلات
هي : زين عاد .. بلشنا بالتنقز

تهقون هذول شكثر صار لهم متزوجين
حسيت اني رازه ويهي بينهم وقاطه الإذن مشيت عنهم وانا اقول الله لا يبلانا
ما نبي هوووناااااااا ...

المشهد الثالث

بيده الموبايل ويحوس ضايع بين شغل الحريم ... ومنقص ويهه ... يتكلم بصوت يحاول انه يكون واطي
ايه يبه ... هاااا ... شنو لونه؟؟

اكو وردي واكو ازرق واكو بنفسجي
شدراني شمكتوب عليه
بالله عليج انتي مطرشتني اشتري توست مثلا.... ايه ايه ... انزين شالفرق بين مال الليل ومال النهار .... ههههه كلش ما كو سالفة .... خلاص عرفته ... المقوسه!!

@@

وه .. وه ... وه
يغربل ابليس حريم هالأيام .... من الحيا انا جيورت ودخلت صوب حفاظات اليهال

المشهد الرابع

دخلت المكتبه بشوف لي مجلة سخيفة تسوى اتسلى فيها قبل لا انام ... عاد انا اكتشفت ان احسن طريقه عشان اييك النوم انك تقرا اي شي سخيف وما يحتاج تفكير

الأول : كلمها يالله
الثاني : شلون
الأول : شوفها قاعده تطالعك
يعدل كشته
الثاني : شلون شعري حمود
الأول : زين زين يالله عاد خلصنا كلمها ولا بمشي

الأولى : امبيه هيون قاعد يطالعج
الثانية : حلفي ... واي يا قلبي .... شفتي شعره
الأولى : واااااااي رفيجه زوقه ... بس شكله منفس
الثانية : يمكن عنده وحده
الأولى : امبيه امبيه كاهم يايين صوبنا

وهنيه اشتغلت نحاسة الزين .... جك ... جك ... جك بالعداااال جان ارتز بالنص بينهم وآنا اتبوسم ومرتااااااحه على الآخر

البنت تدودهت ورفيجتها سحبتها
الولد اخذ يوتيرن
ورفيجه طلع من المكتبه

جيل يضيق الخلق

صج لين قالوا هم يضحك وهم يبجي


آخر مشهد

الأب : يبا اقعد خل نحاسب
الولد الأول : يبا سعودو كلا كاكاوي
الأب : سعوووود .... تعال هنيه
الولد الثاني : يبا والله ماكليته .... اهو كلاه وعطاني اكمله
الأب : شلون تاكله من غير ما نحاسبه
الولد الثاني : ما قطيت القرطاس

#$%&
يكفخ اخوه
الولد الأول : آآآآي
الولد الثاني : أعلمك بالبيت تفتن هااا

يلتفت عليهم الأبو وعيونه تطلع شرااار
بنته الصغيره : يبه ابي ماي
الأب : روح عزيز ييب حق اختك ماي
الولد الأول : شنو.... خل تنطر لين نروح البيت
بنته الصغيرة : يبه ابي ماي
الأب : عزيز ييب لنا يا يبا بطل ماي
الولد الأول : يبا شنو كله انا كله انا

بصوت مثل الرعد شلع قلبي من الخرعه

روح يييب ماي اقول لك

يمشي واهو يتحلطم

الكاشير : 75 دينار حضرتك

الأب : شنو... 75 دينار على كاكاو وحلاو وخرابيط يهال
الكاشير : ايوا حضرتك
الأب : لا يبا انت اكيد غلطان .. ارجع احسبهم مره ثانية

لا حووووول هووونت خلاااااص

اتلفت ماكو كاشير فاضي .... والزحمة اخنقتني ... وصيحة اليهال
احط سلتي باللي فيها ..... واطلع من الجمعية

ولا طبنا ولا غدا الشر