من يوميات بلوقر .... كلاكيت # 3

هو : تروحين الحداق
سمر : متى
هو : العصاري
سمر : حبيبي ما يمدي على ما ارجع من الدوام ونتغدى الا صايره الساعة بالخمس
هو : يعني أروح بروحي
سمر : لا شنو بروحك ... آنا ودي أروح بس بعد الدوام صعبه بكون هلكانه
هو : خلاص خليها مره ثانية أروح آنا مع عبدالسلام
سمر : يعني عبدالسلام الهندي أحسن مني ... وبعدين إنت شدعوه لي رحت من غيري تصيد شي
هو : بدينا بالمعاير
سمر : صج لو لأ
هو : بتييين ولا لأ .. إنتي ولو مالتج
سمر : اففففف .... اوكي بحاول اطلع مبجر بس آنا ما أجهز شي مالي خلق
هو : خلاص ... آنا أجهز كل شي وبنشوف من بيصيد اكثر
سمر : طبعااااااا آنا
هو : تراهنين
سمر : أراهن...... هممممم ... من شنو؟؟
هو : اللي تبينه
سمر : هممممممممم ماكو شي في بالي
هو : خلاص آنا أقول لج بس تالي بالبحر
سمر : اهااا يعني بتلزمني برهانك
هو : ناطرج


أعود مسرعة على طريق الملك فهد
الشمس قاتله تخترق بشرتي .... تصل للعروق.... أحس إني على شفا الغليان
أصل برحلة مكوكية مع التحايل على الكاميرات
ارتدي ما يرحني من ملابس فالحر هذه الأيام لا يطاق

وننطلق

ينظر لي بنظرة ماكرة ... كأنه ينتظر اللحظة ليصارحني بالمصيدة التي نصبها لي

سمر : شفيك تطالعني جذيه؟؟
هو : ابد ... شكلج سرحانه .... شتفكرين فيه
ماكو .... أشياء وايد ... خرابيط

عبدالسلام قد قام باللازم .... جهز الطراد بالماء والمشروبات الباردة وخلافه

نبحر معا

اجلس بجانبه .... يأسرني بتعابيره الجادة عندما ينغمس بالتركيز
ينتبه لنظراتي .... يبتسم .... اقترب منه ... احضنه واستند على كتفه

اعترف بأن الحظ كان بجانبي يوم اختياره لي كزوجة ....لم يعدني بشيء سوى أن يكون هو معي بدون أي تكلف وأن نعمل سويا لإنجاح ما سنبدأه معا

سمر .... آنا دفش ... كويتي ... ما اعرف ارتب حجي وأنمق الكلام .... ما أعرف أسوي مثل الأفلام ... ولا ادلع مثل القصص ... ما أعرف أكون وايد ذرب وكل شي بالمسطرة والقلم أو بالشوكة والسجين ... المظاهر كلش ما تهمني ... بسيط بمتطلباتي ... والحياة المتكلفة ترهق بساطتي .... ما اوعدج بالجنة .... بس اوعدج بالأمان والإستقرار ... ما اوعدج بالغنى بس اوعدج بالصدق والصراحه ...بحبج مثل ما احب نفسي ويمكن أكثر ... بخاف الله فيج ... بدير بالي عليج ... وبشتري راحتج براحتي ... اللي قاعده تشوفينة اهو اللي بتحصلين علية من غير تزييف ... آنا مثل ما آنا ... مو صاحب تليفونات ولا لعب ... الحياة علمتني تبي شي مد ايدك وإخذه ... لا تلف وتدور ... وآنا ابيج ..بكل ما تعنيه الكلمة من معنى .... شقلتي؟؟؟

لم اعد محتاجة للتفكير أكثر ... سنتين أمضيناها في محيط عائلي بحت ... علاقتنا ولدت في النور ... أشبعتها الشمس بحرارتها ... لونتها بحقيقة وجودها ... لم يكن هناك ما نخشاه أو حتى نختبئ لنتذوقه .... كسبته كصديق قبل أن أفكر به كزوج ...هو وأنا سالب وموجب .... أنا قمة بالرومانسية ... اغرق بأحلامي وتأسرني خيالاتي ... اكتب نفسي كل ليلة قصيده في محراب فارس يمتطي قلبي لنصل لشاطئ يحتوينا بموج نغتسل به من كل الأشواق .... وهو متزن ... يعرف أي طريق يسلك ... حازم بقراراته .... صريح أحيانا لدرجة مؤلمة ..... يملك من الحنان والدفء كماً ينسيك احيانا انه رجل... هومستمع جيد .... يفهمني كما لم افهم نفسي قط .... هل هناك من داع للتفكير

ربما كنت ابحث عن ذلك الحب المشبع بالشغف واللحظات المحمومة.... وهو لم يعدني بذلك ... ولكن الحب متى ما اشبع بات الشغف بين أحضان الروتين وأصبحت اللحظات المحمومة نادرة ومقيدة بظروف الحياة
وكان القرار تبعا لصدى العقل والقلب مستكين يأمل بان يجد ما يصبو إليه هناك بين أحضان الأمان الموعود

يهدئ من سرعة الطراد ... انتبه ..... افتح عيني

هو : شكلج غفيتي ....
ابتسم ...
سمر : يعني
هو : شربي ماي حبيبتي .... الشمس حاره ...لا تنشفين

أجهز خيطي .... واقطه بحر
يراقبني من بعيد ... وهو يشعل سيجارته

هو : فيه نبار
سمر : تنقد خفيف ... صغار شكلهم

اجلس بالصدر ويستلم اهو التفر ويشوح كذا خيط

سمر : اهااا معزم تغلبني
يضحك ....
هو : عشان بس اكسر عينج وما تعايريني مره ثانية
سمر : بنشوف

ينبر خيطي ... ارخي عشان تلهم السمجه ... والشطه
هيااااااا .... بصوت منحفض وآنا اسحب خيطي
وكان أول شعم
التفت عليه وكلي تحدي

هو : كملي ... تونا مبلشين

وتأتي سمكته بعد سمكتي
سمر : جنه السالفه صجية .... ما قلت لي شعليه الرهان
يضحك ....
هو : وإذا غلبتج بتعطيني اللي ابيه
سمر : الله يستر... شكلك ناوي علي
هو : نية قشرة ..... هههههههههه
سمر : يمه .... واقول انا شريره

ويتوالى الصيد .... بين دندنة لبعض أغنياتي المفضلة ..... وسالفة اشتاق أن يسردها لي .... ونكته ينطرب بها على صوت قهقهاتي .... ورائحة عطر مغمس برائحة البحر .... وفنجان شاي يتذوقه مع سيجاره عاشقه لشفتيه ... وقبله قد تاهت بين عنقي وكتفي....حتى تكون النتيجة النهائية لصالحه

سمر : ياااااا لهوي ..@@ ..الحين هذا رهانك
هو : ايه ..... شفتي هالنويبيه ... تلحسينها من راسها لين ذيلها
سمر : حراااااااام عليك ما قلت لي السالفة جذيه ...هذا مو رهان ... هذا عقاب .... شلون اسويها
هو : ما اردج البيت ... نبات الليله هنيه ... آنا ابي رهاني
سمر : انت من صجك .... اكيد مو من صجك ... بلا قول لي مو من صجك
هو : سمر ....
سمر : نووووووو
هو : إنتي اللي رضيتي من غير ما تسمعين الرهان
سمر : اطيب خاطرك بشي ثاني .....
اقولها وانا ابتسم ابتسامه ماكرة
هو : أبي رهاني
سمر : أطبخ لك هالويك أند
هو : لا تحاولين

أفكر وأنا مستاءه ... التفت عليه وكلي عزم إني ما اكسر كلمتي ....
سمر : اسويها بس على شرط
هو : من غير شروط
سمر : بلييييييييز ..... مستخدمة سلاحي الفتاك من الدلع والغواية وأنا اقترب منه
هو : أخ منج .... اوكي شنو شرطج
سمر : الساعة اللي شفتها هذاك اليوم
هو : يبتسم .... إنتي شيطااااااانة .... وما اقدر عليج
سمر : يعني؟؟؟؟؟؟
هو : اوكي

ارفع النويبية بيدي الثنتين ........ ويالطعمها الزفر
ايييييييييييييييو ......ايييييييو ..... ايييييو... كانت صج نويبية زفرة


:))))
بس هم آنا اللي غالبه وباجر بروح السوق

شرايكم فيني